Regional Committee meeting :
Chawlhlehkar Oct. 1 – 3, 2013 chhung hian Baptist House, Guwahati-ah BCM Mission Field leh School hrang hrang ai awh kal khawm Regional Committee meeting neih a ni dawn. 2014 – 2015 Budget leh Mission rawngbawlna tul dangte relho a ni ang. He meeting hi Rev. Dr. K. Lalrinthanga, AGS i/c Mission in a ho ang.
Mission Partnership Consultation :
Tunkar Sept. 25 – 26, 2013 khan CBCNEI Hall, Guwahati-ah NEICC buatsaihin SIM-NEI hotute leh BCM Mission Coordinator, Regional Director, FD, Assam Field leh HM, Mt. Olive School te Mission rawngbawlnaa thawhho chungchangah an inrawn khawm. BCM leh SIM-NEI kan thawhhona hnuaiah hian Africa (Ghana & Kenya) leh Thailand-ah te Missionary kan tir mek a ni.
Mary a him :
Hmanni lawka firfiak ten Nairobi khawpui, Kenya-a Shopping Mall an beih tum khan Mary chu a him. Kha mi ni kha a bazar tum ni a ni a. Mahse a hma ni chiah khan a lo bazar fel hlauh a, a him a ni. Pathian venhimna avangin lawmthu i sawi ang u.
BMP ten Biak in sa:
BMP Unit Lunglawn mi 23 leh midang 2 te chu Arunachal East Along Biala Pangkeng (Along atanga km. 12) Biak in (30 x 20’ + verandah) sain an Work Camp mek. Sept. 26 – Oct. 4, 2013 chhung an cham ang. Along-ah hian kan Missionary Pu P. Lalrammawia, Evan. te chhungkua an thawk a ni. Adi Galo hnam zinga kan rawngbawlna a ni a, 2013 chhung hian ringthar 20 chuang an nei tawh. Tawngtaipui ang u.
Chakma Salvation Camp :
Sept. 26 – 29, 2013 chhung hian BCM Lunglawn chuan Bolungsuri, Tlabung thlang, Bangladesh ramri bulah Salvation Camp an buatsaih a, Tuichawng Circle Chakma Evan. Team an hmang. Eirawng bawl leh tawngtai turin Mission hruaitute leh mi then khat an kal thla. Thlarau Thianghlim hnathawh i dilsak ang u. (BCM Lunglawn hian an Mission Project angin Parva I, Longpuighat Circle-ah pawh Chakma Salvation Camp siamna sum an tumsak a; Mizoram pawnah pawh hmun 3 velah rawng an bawl dawn).
AGS i/c Mission Field fang :
Guwahati-a Regional meeting zawh hnu hian Rev. Dr. K. Lalrinthanga, AGS i/c Mission chuan Mission Field a tlawh kual nghal dawn. Pathian hruaina i dilsak ang u.
Salvation Camp nei :
Arunachal East Field chuan Oct. 11 – 13, 2013 chhung hian Sille (Assam atanga Pasighat kawng) khuaah Salvation Camp an buatsaih. Camper zawng zawng ten an thinlungah Lal Isua an lawmluh theih nan, i tawngtaisak ang u.
Rabha Thalai inkhawmpui :
Oct. 11 – 13, 2013 hian Dudumari khuaah Rabha Thalai inkhawmpuiah Nl. H. Lalrinpuii, HM, Mt. Olive chu Speaker a ni dawn a, khawmpui hlawhtling tak an neih theih nan, i tawngtaisak ang u.
Ringthar pung chak lo :
Kumin (2013) hian kum hmasa (2011, 2012) lamte aiin ringthar an pung muang deuh tlat mai! Chakma Mission-ah pawh tun ang hunah chuan 300 a pel tawh thin kha a ni a, kumin hi chuan 200 an la tling lo. Kohhran, Pawlho, chhungkua leh mimal te thahnemngai lehzuala kan tawngtai (Luk. 22:44) a tul tak zet. Kan ai awha kan tirh Mission Worker-te hi tang nasa turin fuih ila; keiniho pawh Beiruala Puan In hmun zauh zir kan ni a, thi leh thau pawlhin i han tang thar teh ang u
