Mizoram Baptist Kohhran, Assembly hnuaia Committee lian pathum zinga pakhat, Mission Committee Meeting, ni hnih awh chu tluang takin an zo ta. He Meeting hi November 11-12, 2014 khan Sap Upa leh Pu Buanga Hall, Serkawn-ah neih a ni a, Nimin tlai khan tluang takin an zo thei ta a ni. Vawiin leh naktuk, (November `13-14) hian Serice Committee an nei mek a, karleh November 18-19 hian Central Committee nei lehin November 20-ah Nomination Committee an thu khawm leh dawn a ni. Nimin-a Mission Committee Meeting chu Rev. H. Sangchema, BCM Presindent-in kaihruai a, Rev. Dr. K. Lalrinthanga, AGS Mission-in BCM Mission Department hmalakna leh rawngbawlna chanchin report a pe bawk. Tun tum meeting-ah hian Annual Working Plan Report thlir letna(Evaluation) neiin, kum thar 2015-2016 Budget tur ruahman te an thlir ho a ni. AGS i/cMission, Rev. Dr. K. Lalrinthanga’n Report-a a tarlan danin Kumin April –  July thla chhungin Missionary 33 lak thar an ni a, January – June 2014 chhungin BCM Mission Field hrang hrang atangin ringthar baptisma chang 2686 nei tawhin, Kohhran thar 29 leh Fellowship thar 27 din a ni tawh bawk. Tun dinhmunah BCM hnuai thawk Mission Worker 892 an awm mek a ni. He Committee hian Mission Promoter ni lai Upa H.S. Lalhmingthanga (Pu Hmingtea) chu a Term 2 a tawp dawn tak avangin Mission Promoter thar tur  atan Upa H.L. Liantluanga, B.A., M.Div. (Missiology), tuna Dhemaji-a Evangelist an thlang nghal a, ani hian April 2015-ah a hna a zawm ang. Tin, FH Lallawmzuala, E.T Aruncahal West leh Benjamin Lalruatfela, Evangelist Teacher, Tripura Field-a thawkte chu Confirm turin 2015 Assembly-ah thlen chhoh a remti a, Jubilee English School, Boro Area a mi chu Boro Baptist Association ten an ngen angin BCM enkawl turin lak an remti bawk, hei pawh hi Assembly 2015-ah thlen a ni ang. Heng bakah hian St,. James H/S Higher Seconadry-a upgrate te, Sikkim Mission Field puitling ni tura buatsaih chhoh te an rel bawk.