Tunkar Pathianni – Dember -11 hi Mizoram Baptist Kohhran ni pawimawh zinga mi ‘Mission Buh Thar Hlan ni’ a ni a. Hemi Ni pual hian Kohhran tinah “Pe rawh u, chutichuan pêkin in awm ang” (Luka 6:38) tih thupui hmangin hun hman a ni ang. Tawngtai thupui - Pathian hnêna läwm thu sawina leh buh tharte leh thilpêkte hlanna tawngtairualna neih a ni ang a. Headquarters atangin Kohhran tina chhiar chhuah tur thuchah chhiar a ni bawk ang. Hemi ni chawhma lam thawhlawm hi Mission pual hman turin Headquarters-ah thawn tur a ni ang.
BCM Assembly 2016 chuan BCM Ni pawimawh kan neihte paih then ni se, Central Committee-in hma lo la rawh se ti-a a dah bawhzuiin Central Committee-in Ni Pawimawh paih then tura a thlan chhuahte zîngah Mission Buhthar hlan Ni hi a tel ve avângin kum 2017 atang chuan he Ni Pawimawh kan hman thin hi a awm tawh dawn lo a, tun tum hi hemi Ni puala kan hman tawp ber a ni dawn ta a ni.
................
THUCHAH
Vawiin ni pawimawh bik takah hian kohhran mipuite in vaiin BCM Headquarters Office atangin kan Lalpa Isua Krista hmingin chibai kan buk a che u. Kohhran pawl thenkhat aia Mizoram Baptist Kohhran kan danglam bikna chu Missionary hrin kohhran, missionary rilru pu kohhran kan ni hi a ni. Kum 1939 atang daih tawh khan kan rama Bru leh Chakma zingah tirhkoh ruaiin Chanchin Tha hrilin an hnenah rawng kan lo bawl tawh a. He hna pawimawh tak hi kan uar zel theih nan Executive Committee Meeting 18.6.1966 chuan Zoram Baptist Mission (ZBM) a din a. He rawngbawlna-ah hian hma kan sawn zela thil pekte pawh a lo pun zel theih nan kum 1984 Assembly chuan ZBM BUH THAR HLAN NI atan December Pathian ni vawi hnihna zel hi a lo ruat ta a ni.
Kum 2005 thleng khan ZBM Buh Thar Hlan Ni thawhlawm pawh Headquarters-ah chhun luh a ni thin a. Hun a lo kal zel a, ZBM Buh Thar Hlan Ni tih chu Mission Buh Thar Hlan Ni tia thlak a lo ni leh ta a. Hemi nia thawhlawm tling khawm pawh chu Headquarters-ah thawn lovin tualchhung kohhran rawngbawlna atan hman turin Assembly 2005 chuan a lo rel leh ta a. Vawiin ni thleng hian December Pathianni vawihnihna hi Mission Buh Thar Hlan Ni atan hmangin thawhlawm pawh tualchhung kohhranin a chang ta zel a ni.
Thingtlang leh khawpuia chengte pawh, buh ching a, huan, leipui leh lo neite chuan kan buh thar atangin tualchhung mission rawngbawlna atan thahnemngai takin Pathian hnenah i hlan ang u. Tin, hetianga Buh Thar hlan tur nei kher lote pawhin kan huan thlai, kan ran vulh leh sum leh pai, kawng hrang hranga Pathian malsawmna kan dawn atangin tualchhung mission rawngbawlna atan Assembly-in min beisei ang takin phal tak leh pawk taka pe theuh turin kan inngen a ni. Kan buh leh bal, kan sum leh pai chauh ni lovin keimahni ngei pawh hi Lalpa tan he ni pawimawh bikah hian i inhlan thar leh theuh ang u.
