February 24, 2022 (Ningani) khan Mizoram Baptist Kohhran Hmeichhe Pawl Rorel vawi 72 na chu Mizoram Baptist Kohhran Biak In, Venghlun, Lunglei-ah neih a ni a. Rorel Inkhawm hi Pi PC Lalvohbiki, President, MBKHP-in a kaihruai a, Rorel tan hma hian kum kal ta lama BKHP member ropuina rama kal tate sunna hun hmang in, Rev. R.C. Lalthanzama, Bialtu Pastor Rahsiveng Pastor Bial in member kal ta chhungte tana tawngtai sakna hun a hmang.
MBKHP Secretary Nl. Lalhmingmawii Chongthu hnen atangin Reoprt ngaihthlak a ni a, Secretary Report-in a tarlan danin BKHP hi Pastor Bial 91-ah Unit 457 awmin BKHP Member 32401 an awm mek a, kum hmasa aiin member 533 in an pun belh a, hetih lai hian kum 2021-2022 MBKHP Rorel inakrah Member boral 274 an awm thung a ni.
Kum 2021 chhung khan Mi rethei, kuttualhleichham te tanpuina mi 111 hnenah cheng 3000/- theuh, a vaiin cheng 3,33,000/- an sem thu te, Covid Relief Fund-ah cheng nuai 1 leh Baptist Covid Care Centre tanpui nan cheng nuai 1 an pek thu te tarlangin, April 2021 – January 2022 thleng Bial leh Unit BKHP ten Missionary Support cheng nuai 197, sing 3, sang 4 leh 255 an pek tawh thu te, Buhfaitham atangin cheng nuai 721, sing 8, sang 4 leh 569 hmuh a nih thu te a tarlang a. Tin, MBKHP Chhawmdawlna In, Melte-ah thawktu mi 21 awm mekin, 2021 chhungin mi 138 enkawl an nih thu ta tarlang bawk.
Tuntum rorelah hian MBKHP Executive atanga agenda 3 leh Bial BKHP hrang hrang atanga agenda lut 38 ngaihtuah a ni a, an thu Passed te chu hengte hi a ni:-
- William Carey thlan, Serampore-a mi hi siam ţha turin BCM ah thlen nise
- BKHP rawngbawlna zirchianna neih nise
- Chhawmdawlna In pual leh Christian Hospital, Serkawn-a hman atan Dialysis khawl lei nan Unit tin vawikhat fehchhuah
- AICS thawktute awmna (faculty quarters) tihchangtlun nan leh BCM Hospital Poor Patient Fund atan Unit tinin theih ang anga ţanpui
- BKHP Inkhawm zan apiangin Jail tangte hnenah Thlarau thianghlim harhna a thlen theih nana ţawngțai
- Mizoramah HIV/AIDS lo hluar ta viau hi a lo darh zau zel lohna turin MBKHP ten hma lak ni se
- Thupui hrang hrang hmanga Chawnghei tawngtai neih.
- Kum 2022-2023 MBKHP Plan & Budget hetiang hian pawm a ni: a) Plan: i) Tlawh khat Bial tlawh. ii) Bial ding thar tlawh. iii) Mission Field tlawh. iv) Chhawmdawlna Ina Quarterly Evaluation neih. v) Chhawmdawlna Ina Advance Christmas hmanpui. vi) Hruaitu thla thar tawngtai neih. vii) Bial atanga sawmna a theih ang anga chhan.
- 2022-2023 MBKHP Budget atan cheng nuai 13 chu pawm a ni bawk.
