Mizoram Baptist Kohhran Hmeichhe Pawl (MBKHP) Inkhawmpui vawi 49-na leh Rorel vawi 64-na ni bawk chu nizan khan tan a ni ta a. He inkhawmpui lian hi Hnahthial Field-a Pandal-a dung feet 200 leh a vang feet 150-a sak, mi 5000-600 vel leng tura buatsaih-ah nghah a ni ta. Tarlan tawh ang khan he Inkhawmpui thupui tur chu ‘I ram lo thleng rawh se” tih a ni. Niuzan lamah hnahthial lam atanga report kan dawn danin mikhual 4000 vel an in report tawh a, in report lo enngemawzat an la awm ni-a thu dawn a ni. Vawiin lamah pawh hnahthil panin palai tur leh Inkhawmpui n chhim tur engngemawzat, Lunglei leh hmun dang atanga kal tum an awm tih thu kan dawng bawk.
Nizan Thlenkim zan-ah inkhawm an thahnem hle a, Palai lawmna leh Inkhawmpui hawnna Inkhawm neiin PPi H. Lalkimi, Asst.Secretary, MBKHP-in Inkhawm a kaihruai a. Hnahthial North leh South Pastor Bial Zaipawl Infinin Opening Song an sa a, Rev. F. Ramdinmawia, Executive Secretary, Lawngtlai-in Pathian thuchah a sawi bakah Zaipawl 6 zet an zai bawk. Inkhawm ban hnu-ah Inpawlhona/Zaikhawm-in a chhunzawm leh a ni.
Vawiin, February 20 (Zirtawpni) nilengin Rorelna neih a ni ang. Kumin MBKHP Rorel tur agenda hi MBKHP Executive atanga lut agenda 10 leh Pastor Bial 23 atanga lut agenda 46 zet a awm a. Amaherawhchu agenda khaikhawm theih leh thuhmun engngemzawzat a awm thung. Agenda langsar zual te chu – 1) Ram tan chawnghei tawngtai/tawngtai khaidiat neih. 2) Mizo hmeichhiate fa neih tam inzirtir. 3)Ruihhlo ngai leh zuarte tan chawnghei tawngtai nei. 3) Missionary te puala chawnghei tawngtai. 4) Ebola natna hlauhawm tak khawvela thlang mek hi a darh zel loh nan leh a veite enkawlna tha damdawi an hmuh zel theih nan ram pum huap chawnghei tawngtai neih. 5) Kum 2015 hian MBKHP ten sum inrenchem leh khawl kawngah hma lak. 6) Kristian chhhung-kaw beihpui neih rawtna te a ni dawn a ni.
Rorel Palai ni ve lo te tan chawhma lamah vantlang inkhawm a awm ang a, chawhnu lamah hmun thumah Seminar thupui hrang hrang hmangin neih a ni ang. Seminar thupui tur chu – 1) ‘Child Rights & Protection’ 2) ‘B.C.M. Kalphung’ leh 3) ‘Hriselna leh Thianghlimna a ni ang a, mahni duhna berah kal theih a ni dawn a ni. A tuk Inrinni chawhma-ah Pathian Biak Inkhawm neiin chawhnu lamah Mission Pualin Pandal-ah tho inkhawm a awm leh ang. Mahni duhna ber-ah kal theih a ni ang. Zan tinin Pathian Biak Inkhawm neih a ni ang a, Pathianni Chawhma Vantlang Inkhawm awmin, Chawhnu lamah Lalpa zanriah(Sacrament) buatsaih a ni ang. Zan lamah Inkhawm a awm leh dawn a ni. Zan lam inkhawm ban-ah hian Inpawlhona/zaikhawm neih chhunzawm thin a ni ang.
Sawi tawh ang khan kumin MBKHP Inkhawmpui-ah hian Speaker bik awm lovin mi hrang hrang-in thuchah an sawi dawn a. Hunpui (Vantlang) inkhawm bika thuchah sawi turte chu hengte hi an ni ang:-
Ningani(Thlenkim) zan : Rev. F. Ramdinmawia, Exe. Secretary-Lawngtlai Area
Zirtawpni zan : Rev. Dr. V. Laldingliana, Exe. Secretary-Aizawl Area
Inrinni zan : PS Lalhmingthangi, Organiser, MBKHP
Pathianni chawhma : Rev. H. Lianngaia, General Secretary, BCM
Pathianni chawhnu ( Sacrament ): Rev. K.V. Thanga, Director, F.O.D. & Worship.
Pathianni zan : LH Sangziki, President, MBKHP
………………………………………………
