Tunkar Pathianni March 29, 2015 hi Mizoram Baptist Kohhran chuan Martarte Ni atana kan hman thin a ni. Kuminah hian Palm Sunday nen a inrual avangin thusawitu chuan a duh zawk zawk a sawi thei ang a; thusawi turte chuan zing lamah Krista vanga tuarna, zan lamah Isua zuitu (kristian) nih avanga tuarna thupui sawi tur a ni ang.
MARTARTE NI THUCHAH
Vawin ni pawimawh bik tak “Martarte Ni”-ah hian Mizoram Baptist Kohhran member zawng zawngte BCM Headquarters atangin kan Lalpa Isua Krista hmingin chibai kan buk a che u. Mizoram Baptist Kohhran rorelna sang ber Assembly 2002 chuan March thla-a Pathianni hnuhnung ber hi kum tinin “Martarte Ni” atan hman turin a lo rel ta a. Kumin hi vawi 11 lai kan hmanna a lo ni ve leh ta reng mai. Martar kan tihte hi Isua Krista leh a Chanchin Tha avanga tihduhdah tuara an nunna hial hlantute hi an ni.
Isua Krista leh a Chanchin Tha duh lohna leh dodalna hi hmasang atanga vawiin thleng hian khawvel ram hrang hrangah a la awm reng a. Chuvangin kohhran hmasa hun lai atanga vawiin thleng hian Krista leh a Chanchin Tha avanga an nunna hlantu Martarte hi khawvel ram hrang hrangah an la awm reng a ni. Mi dangin an hnung an zui ngam lohna turin martarte hi rawng tak leh rapthlak taka tihhlum an ni deuh zel a. Stephana kha lungin an deng hlum a, Paula kha a lu an tansak a, thenkhat chu thingzainaa zai bunin an awm a, thenkhat chu khandaiha sahhlumin an awm a, thenkhat telsovahte an thlak a, thenkhat silaiin an kaphlum bawk a. Amaherawhchu Krista vanga martar kan tihte hian an chunga thil lo thleng tur hre reng chungin anmahni duhthu ngeiin an nunna an hlan thin a ni. Lal Isua hi phatsan duh ni sela awlsam tea pumpelhna hmu thei vek an ni. Mahse a tawp thlenga rinawm taka Lal Isua zuitu nih an thlan zawk avangin anmahni duhthlanna ngeiin martara thihna hi an hmachhawn thin a ni. Tlanchhe chungin an martar lo tih i hria ang u.
Stephana pawh kha, Thlarau thianghlima khat a nih thu kan hmu a, van lam a en tlat a, a tan van a inhawng a, Pathian dinglama Isua ding a hmuh thute a sawi a. Lunga denghlumtute tan Pathian hnenah ngaihdam a la dilsak zui bawk. Hlau lo leh thlamuang takin a chunga thil lo thleng hi a hmachhawn tih kan hre thei. Polycarp-a pawh kha Isua a phatsan chuan an chhuah leh mai dawn a ni tih an hrilh a. Nimahsela Isua phatsan lova a chunga thil lo thleng tur chu engpawh tawrh a thlang ta zawk a. An halhlum ta a ni.
North Korea leh Muslim ram tam takah vawiin thleng hian Krista leh a Chanchin Tha avanga tuartu tam tak an awm mek bakah, a tawp khawk thlenga an nunna hlantu martar an la awm reng a ni. Vawiin Martarte Ni-ah hian rinawm taka a hnung zuitute avang hian Pathian hnenah lawmthu sawi ila. Khawvel ram hrang hranga Krista avanga tuartuten rinawm taka a tawp thlenga chhel taka an tuar theih nan i tawngtai theuh ang u. Krista avanga martarte hre reng chungin keini pawh i inenfiah ang u. Nitin kan nunah leh hnathawhna-ah te, Krista hnung zuitu rinawm kan ni em tih i inenfiah ang u. Thih thlenga a hnung zuitu rinawm kan nih theuh theihna turin Pathianin min tanpui theuh rawh se.
