Tunkar Pathianni, march 30, 2014 hi Mizoram Baptist Kohhran ni pawimawh - "Martarte Ni" a ni a. He Ni hi Tualchhung Kohhran a thei apiangin Martarte Ni pual hian hun hman tur a ni. A hman dan tur chu Tualchhung Kohhranin tha an tih angin programme an siam ang a, Headquarters atangin Martarte Ni Puala thuchah buatsaih chu chhiarchhuah a ni bawk ang.
Martarte Ni lo chhuah dan:
Mizoram Baptist Kohhran rorelna sang ber, Assembly - 2002-a neih chuan Krista rinna avanga Martarte hriatrengna ni hi hman ni se tiin thu a lo passed a. Assembly thurel chu Administrative Committee chuan bawhzuiin March Pathian ni hnuhnung ber hi kum tinin Martarte Ni atan hmang thin turin a ti ta a ni.
Thuchah:
Martar tih tawngkam hi a lo chhuahna tak chu, Grik tawng “Martus” tih atanga lo awm a ni a, a awmzia chu Thuhretu tih a ni a. Thuhriatpuitu, Tantu, Lamtang tite pawhin a sawifiah theih bawk. Martar tih hi Kristiante rilruah chuan Krista dodalna avanga tuar a, phatsan lova nun chunte nihna sawi nan hman a ni ber. A tirteah chuan Lal Isuan khawvela rawng a bawl lai hmutu apostolte sawina tluka hman a ni a. Kristiante tihduhdahna a lo awm tak fo hnuah chuan an rinna avanga harsatna leh tihduhdahna tuar chhuakte sawi nana hman a ni ta a ni. Kristiante hian Martar tih hi intitatu deuh mah se la, hun a lo kal zela sakhaw dangte pawhin an sakhaw thurin tan avanga thihpui hial an awm ve tho avangin, martar tih tawngkam hi rinna thihchilhtute sawi nan zau takin hman a lo ni ta a ni. Hetiang a lo nih takah chuan Martar tih chu mahni sakhaw vawn leh thurin phatsan duh loh avanga nunna chuntute sawi nan hman a lo ni ta a. Tunah phei chuan ram tana nun chuntute sawi nan pawh hman a lo ni ta zel a ni.
Heng bakah hian Martar han tih chiah theih loh rawngbawlna neih laia nun chunte pawh hi Martar tih hming han pek hi an chakawm hle a; amaherawhchu Martar tih lo chhuahna chhan tak leh ringtu hmasate lo hman dan nen chuan a inan loh avangin, heng hi chu ropui takin chawimawi tlakin an thi a ni.
Kristiante MARTARNA chhan:
Kristiante hi sakhaw hrang hrang zingah martar tam ber kan ni hial awm e. Thuthlung thar kohhran a lo din atanga rei lo teah kristian martarna a thleng a, ringtu hmasa Stephena chu lunga den hlum a ni. Heng hun atanga tun thleng hian kristiante tuarna leh thihna hi a la awm reng a ni. Heng a hnuaia tarlante hi kristiante martarna chhan tlangpui an ni.
- Ringtu hmasate an lo tiak tan tihah dodalna a lo piang chhuak ve nghal a. A dodaltu berte chu Juda hnam an ni a, Tirhkohte thiltihah kan hmuh angin zirtirte hian Judate kut vawi duai lo an tuar a, Stephana leh Jakoba-te pawh Judate kutah an thi a, Kristian martar hmasa an ni ta a ni. He martarna hi a chhan berah chuan Kristian thurin an puan chhuah chuan Juda sakhaw dan a kalh niin an hria a ni ber mai.
- Rom sawrkar hunah tihduhdahna hmasa ber Nero-a hunah a lo thleng a. Heta Kristiante tihduhdahna chhan hi chu Rom khawpui tikangtuah an puh vang a ni. AD 64 July thlaah Rom khawpui a kang chiam a, Nero-a hal nia rin a ni a, chu mi laka Nero-a inthirfihlim nan Kristiante hi a haltuah puh an ni ta a ni. Kristiante hian hun tawpah khawvel meiin a kan ral tur thute an lo sawi thin nen Rom khawpui haltuah puh an ni hi a inhmeh ta viau a ni. He tihduhdahnaah hian mi tam tak an Martar a ni.
- Kristiante martarna runpui lo thlen hi AD 64-313 in kar lai vel khan a ni a, he mi hun chhung hian a khat tawkin a thleng reng a ni. Tihduhdahna karah hian Kristiante chu an pung zel a, Rom lalber Pathian anga an biak ve duh loh avangin Kristian sakhua chu Rom ram chhungah sakhaw phal loh, a zawm a piang sawrkar dan bawhchhia, tihhlum tur tia puan a ni bawk. Chu bakah Kristiante chu an Pathian ni lo pathian dangte pawm lotu an nih avangin pathiante tivuiin, hrite, tamte, lirnghingte leh chhiatna dangte thlentuah an ruat a, chuvangin Kristiante chungah tihduhdahna thlengin tihhlum an tam hle a ni. Kristiante zingah mithiam an lo chhuak a, an dikna au chhuahpuitu Polycarp-a te, Justin Martar-a te mi tam tak, ‘Kohhran Pa’ kan tihte martar hun lai a ni.
- Martarna hi ring lote kut atang chauh ni lovin, Kohhran atangin a awm tho a ni. Kohhran a lo lian zel a, mithiam tam takin Kohhran leh Sawrkar inkawp dan leh Pope thuneina dodalin kohhran khalh dik an tumna lama tihhlum, John Huss-a te, Jerome-a te leh mi dang tam tak an awm a ni. Kohhran leh sawrkar an tanrual avangin, Kohhran thlurpui chuan a kalphung sawiseltute chu sawrkar kut hmangin nasa takin a sawisa thin a ni. Roman Catholic kohhran lian ber atangin nekchepna hi a nasa ber a, Protestant Kohhran zingah chuan Baptist Kohhran hi tuar nasa leh martar tam ber kan ni.
- Hman lai atanga tun thlenga Kristiante martarna chhan lian ber pakhat chu sakhaw hran inhuatna avang hian a ni. Mahni sakhaw thurin chauh dik nia hria, sakhaw dang betu chu hmu ramhuai tlat leh sual tipunluntu anga ngai a, ngaihdan firfiak tak neitu hnen atangin kristiante hian an tuar nasa hle. Hei hian vawiin thlengin khawvel hmun hrang hrangah hmun a luah zel a ni.
- Heng bakah hian Martarna chhan hi kawng tam tak sawi tur a awm. Kristian tam tak khawtlang nuna dikna leh mihring chanvo humhalh sakna tundin tuma beitute sawrkarin a huat em em, entir nan Bonhoefer-a te, Thomas Muentzer-a te leh Martin Luther King Jr. te martarna hi sawi hmaih chi an ni lo. Missionary tam tak hi an rawngbawlna hmuna a ram miten an sakhua leh hnamzia tichhe vek tura an ngaih avangin an sawisa hlum thin bawk a ni.
Kristian hmasa tihduhdah tuartute leh martarte hian anmahni inhumhim nan thilmak an beisei lo. Krista avanga tuarna hi huaisen takin an hmachhawn tawp mai a ni. Pathian Thlarau pawlna changin thlamuang takin an thi thin a ni. Martar hi lo inrinlawk a hneh taka lo hmachhawn lam aimahin a hunah Lalpa Thlarauin huaisenna pein a thlamuan thin a ni. Thihna hmanga Martar hi Kristian mi zawng zawng chan phak a ni kher lo vang, amaherawhchu ringtute hian Krista kan rinna leh a laka kan rinawmna hmang hian thihna hmanga martarte tluka thukin kan nun hi Krista tan a inpek theih a ni.
