April 6, 2020 khan Dr. Vanlaltanpuia, Lunglei North Bialtu MLA chuan Christian Hospital, Serkawn a thawktute hman atan PPE (Personal Protective Equipment) set 200 a pe. Dr. Lalramzauva, Medical Superintendent, Christian Hospital, Serkawn–in lo dawngsawngin Bialtu MLA-in Hospital mamawhna hria a hetiang thil pawimawh tak mai a rawn pe chu lawmawm tih thu sawiin COVID-19 avanga Hospital inrelbawl dan hrang hrang leh inbuatsaihna te a lo hrilhin an enpui bawk.
He Programme tawi, Kristian Hospital Kawt Serkawn-a hman hi BCM General Secretary Rev. F. Ramdinmawia leh Associate General Secretary, Service Rev. R. Lalbiakliana ten an telpui bakah Christian Hospital-a thawktu thenkhat ten an tawiawm a ni.
Kar hmasa Zirtawp ni khan, Bialtu MLA hian Lunglei North Bial chhunga Ruihhlo ngaite enkawlna hmun (Home) hrang hrang tlawhin thawktu te tan Face Mask leh tanpuina sum a pe a. Chhawmdawlna In Melte tan pawh cheng 7000 leh Artui tukri khat a hlan a ni. He thilpek hi Pi F. Lalrochami, MBKHP President –in dawngin Bialtu MLA hnenah MBKHP leh Chhawmdawlna Ina thawktute hmingin lawmthu a sawi a ni.
Bialtu MLA hian Chriastian Hospital, Serkawn hnenah hian kar hmasa lawk khan Walkie Talkie Set 1 a lo pe tawh bawk a ni.
