Tunkar Inrinni, February 15,2020  hian Mizoram Baptist Kohhran, Pastoral Department buatsaihin Lunglei khawpui chhunga Kohhran Upa Seminar thawh khatna, Lunglei South huamchhunga Kohhran Upate pualin BCM Chanmari, Lunglei-ah neih a ni dawn. 

He Seminar hi hun hnihah thenin chawhma hun hi Rev. B. Lalrinawma, Bialtu pastor, Electric Pastor Bialin a kaihruai ang a, Rev. F. Ramdinmawia, General Secretary-in Seminar-a topic zirho tura chhawpchhuah te a sawi fiahin Key Note a pe ang. Resource Person Rev. C. Chhuntluanga’n Kohhran Thanlenna leh zauh zel na (Church Expansion) chungchang zirtirin Power Point Presentation a nei zui ang.

Chawhnu lamah Rev. Dr. C. Vanlaldika, AGS – Mission-in Pathian hnena inhlanna hun hmangin Seminar a kaihruai ang a, Thupui Sawihona leh Kohhran tana thil pawimawh hrang hrang sawizauna hun hman a ni ang a, Rev. KV Thanga, Bialtu pastor, Lunglawn Bial-in malsawm tawngtaina-in hun a khar ang.

Lunglei Khawpui chhung-ah hian Kohhran Upa 628 an awm mek a, Lunglei South huam chhung bikah hian Kohhran Upa 381 an awm mek a ni.

He Programme hi February 22 (Inrinni)-ah Lunglei North huamchhunga Kohhran Upate pualin BCM Biak In, Venglai, Lunglei-ah neih leh a ni ang.