Lunglei, Serkawn, 22nd January 2020:
January 21, 2020 khan Mizoram Baptist Kohhran, Lunglei Area Pastors’ Meet 2020 chu Sap Upa leh Pu Buanga Hall, Serkawn-ah neih a ni a. Lunglei Area chhunga BCM Pastor kal thei tura beisei chin mi 63-ah 58 an kal a ni.
Hun hmasa lamah General Secretary Rev. F. Ramdinmawia’n Pastor lo kalte lawmna thu sawiin Pastors’ Meet buatsaih a nih chhan a sawifiah a, Key Note Address a pe bawk.
Chawhma hunah “Pastorte inpekna leh rawngbawlna’ tih thupui hmangin paper zirho a ni a, Resource person-ah Rev. Dr. C. Vanlaldika, AGS - Mission hman a ni a, sawihona hun hman zui a ni bawk. Chawhnu lamah Pastorte serh leh sang (rualtlanga hman dan) tih thupui hmangin AGS – Service, Rev. R. Lalbiakliana’n paper a present a, Rev. C. Chhuntluanga, Pastoral Coordinator-in Pastorte tana hriat tur pawimawh hrang hrang te a sawi bawk.
Mizoram Baptist Kohhran hi Area pathumah thenin, Aizawl Area, Lawngtlai Area leh Lunglei (Headquarters) Area ah te then a ni a. Lawngtlai Area Pastors’ Meet hi May 16,2019 khan JH.Lorrain Hall, Baptist House Lawngtlaiah neih a lo ni tawh a, Aizawl Area Pastor Meet pawh July 12-14,2019 khan Baptist Centre, Aizawl-ah neih a lo ni tawh bawk a ni.
Mizoram Baptist kohhran, Lunglei Area huam chhungah hian Pastor bial 39 awmin active Pastor 68 an awm a. Tualchhung Kohhran 188 an awm a ni.
