LPS Vision chuan Gospel channel thar a siam a. He Channel thar-ah Mizoram baptist Kohhran pawhin Progamme neiin a tel ve dawn a. Channel Hawnna Programme November 1, 2016 khan Kohhran hrang hrangte aiawh te nen neih a ni a. BCM aiawhin Rev. LB. Khawpuimawia Director Communications Department leh Pu Vanlalruata Kawlni, AV Manager-te leh Soloist Nl. Lalneihzeli Sailo (Temi)-ten an hmanpui a ni.
LPS Director Pu Lalsawmliana Pachuau chuan he channel lo pian chhuah dan leh thu kamkeuna a sawi a, Kohhran aiawhte hnen atangin Pathian thuchah tawi ngaihthlak a ni. Pathian thuchah bakah kohhran aiawhte chuan hetianga Pathian thu puanchhuahna tur remchang tak LPSchhungkuain an buatsaih avangin Pu Laldailova Pachuau (L) te chhungkaw chungah lawmthu an sawi a, mipuite an programme lo thlir thin turin an sawm a, an programme chhuah hun turte an sawi bawk. He hunah hian Kohhran hrang hrang atanga zaithiamten hun an hmang bawk. A tawpah tawngtai rualnain he channel thar hi Pathian hnenah an hlan a ni.
LPS Gospel Channel hi November 2, 2016 zan atang khan kalpui nghal a ni a, LPS 12-ah a en theih a ni. BCM-in programme a neih dan chu hetiang hi a ni ang. Zan dar 8-9 pm-ah hun kan nei ang a, he programme vêk hi vawi 3 ala inherchhuak dawn a, 2-3am, 8-9am; chhun 2-3 pm-ahte a lo lang leh thin dawn a ni.
