Serkawn: January 23, 2014 Tunkar Pathianni, January 26 hi Phar pual Pathianni (The Leprosy Sunday) a ni a.  He Ni hi Mizoram Baptist Kohhran chuan urhsun taka hmangin Kohhran tinah Chawhma Inkhawmah hemi pual hian inkhawm Progamme siam a ni ang. Headquarters atanga thupui thlan sa “Athlawnin in hmu a, athlawnin pe ang che u”(Matt. 10:8) tih thu hmangin thuchah sawitu-in thuchah a sawi ang a, thupui thlansa hmangin tawngtairualna neih a ni bawk ang. Hemi ni pual Inkhawm thawhlawm pawh Phar Pual atan serhhran a ni ang . Tawngtai thupui: 1)            Mizoramah hian TLM rawngbawlnain hma a sawn chhoh zel avangin lawmthu sawi ila, thahnem ngaia hma la tuten kohhran mit ti mim lova rawngbawl dan an thiam chhoh zel theih nan. 2)            Phar tam takin 2014 chhung hian taksa, rilru leh thlarauva damna an lo chan leh theih nan. 3)            Mizoram kohhran/kristianten he rawngbawlna tlawm tak hi an ngaih pawimawh a, ngaihthah deuh tawh te pawhin Lal Isua ngaih pawimawh rawngbawlna a ni tih hria a hma an lak thar ve leh theih nan.

 ………………….

 Phar Pual Pathianni lo chhuah dan

(January Pathianni hnuhnung ber)

 Kum 1943 atangin Mizoram Baptist Kohhran chuan phar tanpuina hi kan lo pe tawh thin a. Assam Christian Council (ACC) kan tih, tuna North East India Christian Council (N.E.I.C.C) kan lo tih tak hian Assam ram chhunga Phar ho hmun hrang hranga mite tanpui a duh a. 1947-ah Assam Christian Council zawmtu kohhrante chuan September thla chawlhni hmasa ber apiang hi Pharho tawngtaisak nan hmang ila, chumi ni-a thawhlawm pawh chu anmahni tanpui nan pek nise tiin a rel a. BCM pawh A.C.C.-ah member anih avangin he ni hi kan hmang  ve ta a, Kohhran Calender-ah pawh kan lo dah ta a ni. Thawhlawm tling khawm chu Assam huam chhunga (N.E.I.C.C. huam chhung) Phar enkawlna Damdawi Inte hnenah a sem thin a, chutiang chuan hun rei tak kan lo ti tawh thin a ni. Leprosy Mission (TLM) nen kan thawhho hnu hian TLM hi India ram leh khawvel hmun hrang hranga Phar Damdawi In enkawltu an nih avang leh kum 20 dawn lai chu a hotu ber (Promotional Secretary) chanvo kan Kohhranin kan chan tak avang hian hemi nia kan thawhlawm tlingkhawm te chu  The Leprosy Mission-ah hian pek a ni thin. A hun thuah hian hun rei tak chu January Pathianni vawi 4-naah kan hmang thin a; mahse TLM hian January Pathhianni hnuhnung berah an hmang si a. Eng emaw changin a hun hi inrual loh chang a awm thei tih hriain kum 2005 Assembly chuan TLM lamin an hman hun January Pathianni hnuhnung berah hman ni tawh rawh se, a ti a. Chutiang chuan kum 2006 atang khan  kan hmang ta zel a ni.

…………………..

 Phar Pual Pathianni Thuchah 

Unau te u, Phar pual Pathianni khawvel pumah kan lo hmang ho leh thei hi a lawmawm in pharte tan malsawmna ni leh an tana tawngtaisakna ni a nih leh ngei TLM chuan kan beisei e. Khawvelah hian phar vei tam tak awmin kum tinin a vei thar an la awm belh ve reng a, India ramah ngawt pawh hian kum tin mi 150000 vel a veithar an la awm ziah a ni. Hengte hian chatuana nunna Isua Krista an lo neih a, an dinhmun leh chanvo an chan phak tawh loh an lo chan ve leh theih nan kum tinin an dinhmun chhiat zia te, tanpui an ngaihzia te kohhranhote hnenah kan tarlang thin a, kuminah erawh chuan TLM kaltlanga India rama kan rawngbawlhona chanchin tawtein han tarlan kan tum dawn a ni. TLM dinhmun tlangpui: *        South Asia Region Headquarters Delhi a ni a, chumi hnuaiah chuan Mizoram hi a awm. *         India ramah hian TLM in Phar Hospital 14 kan nei mek. *        Phar dam leh  an chhung ten an duh tawh loh te enkawlna (mercy home) 5 kan nei. *        Phar enkawl dam tawhte eizawnna zirtirna atan Vocational Training Centre (VTC) 6 kan nei mek. *        PharHospital thleng phak ve lo leh an natna ngaihthahte tan Community Base Project hmun 36 ah phar natna veite enkawl leh zawnchhuah hna thawh a ni. Kumtina kan rawngbawl dan tlangpui: *        TLMHospital ah te hian kum tinin mi 5000 aia tam enkawl ziah a ni. *        Mercy Home ah te hian mi 300 vel bawr enkawl reng a ni. *        Vocational Training Centre (VTC) 6 ah te hian kum tinin student 1000 velin an zir thin. *        Phar natnain an taksa peng a tihchhitsak mi 1300 aia tam zaisak (surgery) thin a ni. *        Phar natna avanga mit chhia mi 3600 vel kum tinin an mit saiaka enkawl an ni thin bawk. *        Phar naupang leh phar fate school a an admit duhloh 1300 vel chu kumtin lehkha zirtir an ni. *        Phar dam leh mi 450 lai an eizawnna atan chhawmdawlna kumtin siamsak thin an ni. *        Phar chhungkaw 200 tan kumtin chenna in (Low cost house) sak sak thin a ni. *        TLM Centre tinah Councellor ten pharte counseling an neihpui thin a ni. *        Hemi ni a thawhlawm hi Calendar a arsi chhinchhiahna chuang anih angin Headquarters lut tur pawisal kal dan pangngai angin chhunluh tur a ni ang. Khawngaihna thilthlawnpek an tan rawn hlan ve la, Lalpan a van malsawmna in a vur ang.