Nl.F.Zoramthangi (Rabha - Nute-i) (58) Rabha hnam zinga kum 30 chuang zet Missionary-a thawk chu tukin zing dar 8:30 khan A rawng a bawl thin,  a Lalpa hnenah a chawl ta. Vawiin, August 28, 2014 chawhnu dar 02:00 hian Lunglawn-ah Rev. F. Ramdinmawia, Executive Secretary, Lawngtlai-in a vui ang.

Nl. F. Zoramthangi hi February 7, 1956 khan a piang a, a pa chu Vaichana(L) niin a nu chu Aimawii(L) a ni a. July 1, 1979-ah Mizoram Baptist Kohhran hnuaiah Missionary - Evangelist Nurse atan lak a ni a. Assam-Rabha Field, Mendabary-ah post a ni. Kum 1994-ah Missionary Training-in Serkawn-ah a rawn chuak a, MTI(Missionary Training Institute)-ah a training zawh hnu-ah a thawhna hmun ngai-ah bawk a kir leh a, kum 2009 khan cancer a ni tih hmuhchhuah a ni a, chuti chung chuan pachang takin inenkawl chungin a hna a thawk zel a.. kum 2013 ah a natna avangin hreh tak chungin Voluntary Retirement a dil angin pension-in a kal ta a. Rabha hnam zinga a thawh hun chhung hi kum 33 leh thla 11 zet a ni.

Mizoram Baptist Kohhran chuan kan Missionary ropui leh nun pum hlan a, a thawhna hnamte tana inpe zo vek - Nl. F. Zoramthangi a chan ta chu uiawm a ti hle a. Assembly Executive Committee meeting neih lai mek-ah a thih thu leh amah uina thu hi Devotion hmangtu Rev. C. Ngurhnema chuan sawiin, a rawngbawlna avangin lawmthu a sawi bawk.

Tin, a thawhna hnam aiawhin Rabha Baptist Church Union chuan hetiang hian amah an ui zia thu leh an thlahna thu an rawn thawn bawk:-

"Pathian tana a nun leh hun hlana, Rabha hnam boral tur chatuan nun kawng kawhhmuhtu,Nl.F.Zoramthangi,kan missionary ropui,vawiina a Lalpa hnena chawlta,sun nan vawiin 28.08.2014hian RBCU flag ngul chanve a zarin a puala inkhawmna RBCU main office, Debitola-ah RBCU hruaitute leh kohhran hrang hrang hruaitu thei ang ang kalkhawmin Rabha Area missionary te nen hun hman ani.Tin, RBCU Pastorate hrang hrangah amah thlahna inkhawm hman ani bawk. Amah sun nan leh hriatreng nan vawiin hian RBCU Office,zirna in pathum(3) leh weaving and tailoring te khar ani bawk. Tin, kan mizo dan angin a thlanthutna hun kan Field Director ho a hman ani bawk ang. A mah kan hnenah awm tawhlo mahsela,Pathian tana a thawhna leh Rabha hnam a hmangaiha, an tana a thawhna hi kan theihnghilh ngailo ang"