Kristian Chhungkaw Ni May 20,2012

Mizoram Baptist Kohhran chuan May 14 (Thawhtanni) atang khan Kristian Chhungkaw Chawlhkar hmang tanin tunkar Pathianni zan thleng hian an la hmang dawn a. Pathianni, May 20,2012 hi Kristian Chhungkaw Ni (Special Sunday) atan a hmang nghal dawn a ni.

Kum 1948 atang khan BCM hian mumal takin Kristian Chhungkaw Ni hi kan hmang tawh a. He Ni hi kan Zosapte pawh khan an lo ngai pawimawh hle thin a ni. Kum 2003 BCM Assembly chuan he mi Pathianni huam hian Kristian Chhungkaw chawlhkar bik siam nise a ti a. Chawlhkar tluana zir tur pawh a lo buatsaih ta a. Kuminah pawh May 14 - 20, 2012 atang khan Kristian Chhungkaw Chawlhkar hi kan hmang chho mek a, Headquarters atanga Kristian Chhungkaw Thuzir Bu buatsaih pawh zanin hian kan zir zo dawn a ni. May 20, 2012 Pathianni chawhm inkhawm thupui atan ‘Kristian Chhungkaw din pawimawhna’ tih thu hman a ni ang a, zan lamah ‘Kristian chhungkaw din tura mawhphurhna’ tih thupui hmangin thuchah sawi tur a ni ang.

NEICC Annual Session Cum Platinum Jubilee

India hmar chhaka Kristian pawl hrang hrang inzawmkhawm North East India Christian Council (NEICC) chuan May 16-20, 2012 hian Rymbai Presbyterian Biak in, Meghalaya-ah Annual Session vawi 75-na leh Platinum Jubilee lawmna an nei mek a. Thupui atan ‘Lasting legacy, Greater Future’tih a ni. He programme hmang tur hian Mizoram Baptist Kohhran aiawhin AGS, Rev.C. Ngurhnema hovin Baptist Choir, MTKP leh MBKHP aiawhte leh Assembly in palai tura a ruatte an kal a. An zingah hian Jubilee puala chawimawina an hlan tur hruaitu hlui zinga mi Rev.Dr.C.L.Hminga pawh a tel.

Worship Seminar

Bazar Pastor bial chuan an bial chhunga Upa leh Rawngbawltu leh Bial leh Tualchhung Kohhran tina Worship & Music Committee member-te huapin nimin Inrinni (May 19, 2012) khan Bazar Biak inah Seminar on Worship & Music an buatsaih a. Resource person atan Headquarters-a Worship & Music Director, Rev.R. Lalbiakliana an hmang.  

Bial KNP Inkhawmpui

Lawngtlai South Bial chuan May 18-20, 2012 chhung hian Mampui Biak inah KNP Inkhawmpui an nei mek a. Thupui atan ‘Pathian ram leh Naupangte’ tih hmangin Speaker chu Upa C. Thankila a ni.  

Nupa tuak 29 Innei tha

Chhipphir bialtu pastor, Rev.K. Vanlalmuana chuan a bial chhung Bualpui ‘V’ Kohhranah May 6, 2012 khan nupa tuak 29 te inneih that buatsaihin Certificate a hlan.  

Sangau-ah Camping

Bazar Pastor bial(Lunglei) chuan an bialtu pastor, Rev.KV. Thanga speaker-a hmangin Sangau Kohhranah Camping an neihpui a. Anmahni’n senso tum vekin FOD te pualin camping an neih hnuah vantlang pualin camp an buatsaihsak chhunzawm.    

Evangelist-te Rawngbawlna

Evangelist team rawngbawl mekte leh an rawngbawlna hmun kan hriat chin hetiang a ni: Ebenezer Ministry (Speaker: Evan. Vanlalmawii) te chuan Chhipphir bial tuam mekin tunah hian Lungmawi Kohhranah hun an hmang mek. Ambassador For Christ team (Speaker :Upa K. Lawmsanga) Falkawn Kohhranah Camping chhawng hnihna an chhunzawm. Gospel For All team (Speaker: Upa F. Lalnuntluanga) Bualte Kohhranah FOD pual zo tawhin vantlang Camp an tan leh dawn. Chanchin Tha Chhuangtute team (Speaker: Upa K. Lalenga) te chuan Jampui tlang dung-Sakhan leh Phuldungsei Kohhranah. Gospel Messengers team (Speaker: Upa B. Lalthanliana) Shillong bial Madanrting Kohhranah an la nei chhunzawm zel.