Tunkar Pathianni, May 17 hi Mizoram Baptist Kohhran Ni pawimawh 'Kristian Chhungkaw Ni' a ni a. Kohhran tinah hemi pual hian hun hman a ni ang. Kumina Kristian Chhungkaw Chawlhkar thupui atan 'Kristian Chhungkua leh Sum remchem/Khawl' tih hman a ni. Pathianni zing inkhawmah 'Hman aiin sum khawlna thinlung i puang u' tih chu zirho a ni ang a, zan lam inkhawmah 'Sum khawl-mahni leh mi dangte tan malsawmna' tih thu zir a ni ang. Kan tarlan tawh angin Kristian chhungkaw chawlhkar hi tunkar Thawhtanni (May 11) zan atang khan hman tan a ni a, hemi chhung hian Kohhran chhungkaw tin ten Headquarters atanga Kristian Chhungkaw thu zir tur an buatsaih chu zirin, Pathiannni hi 'Kristian Chhungkaw Ni' Special Sunday atan hman chhunzawm a ni dawn a ni.
Kristian chhungkaw Ni lo in tan dan:
Kum 1948 khan North East India Christian Council (NEICC) khatih laia Assem Christian Council (ACC) inkhawmpuia Baptist Kohhran palai zu kalte chuan Assembly (Presbytery) –ah report an pe a; Kristian chhungkaw pawimawhzia hi uar takin an sawi a.Assembly chuan Kohhran tinin bawhzui nisela, May thla Pathianni remchang ber chu Kristian Chhungkaw niah hmang ila; chhungkaw inenkawlna pawimawhzia leh chhungkaw hlutna te hi sermonah thusawitu apiangin sawi thin ni rawh se tiin a rel a.Tichuan, 1948 atangin Kristian Chhungkaw Ni hi kan lo hmang tan ta a ni. Tunah chuan BCM Calendar-ah nghet taka dahin May thla Pathianni vawi 3-na hi kum tin Kristian Chhungkaw Ni atan kan hmang ta a ni.
Kristian Chhungkaw Ni a Inkhawm thawhlawm hi hun rei tak chhung Headquarters ah thawnin, Nau hnuchham tanpui nan pek thin a ni. Assembly in Tualchhung Kohhran mamawh sang zel avanga headquarters a lut tur a tih tlem atang khan he mi ni thawhlawm pawh hi Tualchhung Kohhran tinin anmahni pualin an hmang ta zel a ni.
Kristian Chhungkaw Ni hi Pathianni nimahsela, hetah hian programme hran siam a ni lo. A chhan chu Kristian Chhungkaw Chawlhkar kan lo nei ta a, he chawlhkarah hian thuzir tur leh kar pumpui programme (Kristian Chhungkaw ni telin) siam zel anih tak avangin. Kristian Chhungkaw Chawlhkar lo pian chhuah dan tawite in tarlang nghal ila. Kum 2003 Assembly-a Kristian Chhungkaw Chawlhkar hman nisela tih thu lo lut chu titluk a ni a; Kristian Chhungkaw ni behchhana hman a ni. 2004 Assembly ah Kristian Chhungkaw Chawlhkar hman rawtna lo lut leh pawh remtih niin hman a ni leh a. 2005 Assembly ah pawh a lo lut leh a. Chuti anga a zawna tum thum lai ngaihtuah anih takah chuan Assembly chuan kum tin Kristian Chhungkaw Chawlhkar hi hi hman thin ni tawh rawh se tiin a rel ta a ni. Tichuan tuanah chuan Kristian Chhungkaw Chawlhkar hi kum tin kan hmang thin a ni.
Kristian Chhungkaw Chawlhkara chhung tin zir tur headquarters atanga buatsaih chu zirin urhsun taka hman ziah a ni. He hunah hian Kohhran(pui) inkhawm ni lo, FOD inkhawm leh tul dangte chu ti lo tura hriattirin Kristian Chhungkaw Chawlhkar chu duh thawh taka hman ziah a ni. Kristian Chhungkaw Chawlhkar hi Kristian Chhungkaw Ni nen inzawm chiaha hman thin a ni.
