Tripura-a kan missionary hmasate zing ami - Pi. F. Vanlalremi (68) chu hun rei tak natna-in a chimbuai hnu-in November 7, 2016, tlai dar 5:30 khan Heart Block vangin Serchhip Hoapital-ah thi a, vawiin November 8, 2016 chhun dar 11 hian BCM Serchhip Biak In-ah Krista Pasalthate thlah dan-in ropui taka vui a ni.
Pi. F. Vanlalremi hi July 15,1948 ah a piang a, 1972-ah BCM Missionary ni turin lak a, Tripura Field-ah tirh a ni. 1972-ah Assembly-in a confirm a, a service chhung zawng Tripura-ah hian a awm a, July 16, 2008-ah pension-in a kal ta a ni.
Pi F. Vanlalremi thihna hian rampum a nghawr a, nulat nawmna leh chhungkaw din tura pasal neih pawh thlahlel lo va, Isua Krista Pasala thlang zawktu, Krista pasaltha thihna hian Kohhran mite thinlung a khawih takzet a. Hetiang mi, Lalpa tana mi hrat khawkheng leh thatlai hun zawng zawng Lalpa tana hmang zo vek ngam, Missionary ropui a nei hi Mizoram Baptist Kohhran chuan a chhuang tak zet a, Mizoram Baptist Kohhran chanchin leh a rawngbawlna hnam – Tripura tlangmite leh an Kohhran-ah te a hming a dai tawh ngai lovang.
………………………..
“Pi Remi chanchin hi sawi tur tam tak a awm a, a nulat that lai zawng zawng Pathian tan hmangral,missionary ah pawh chanchin sawi tur tam tak nei, Tripura missionary te zingah harsatna tam tak lo paltlangtu a ni a. Pathian kohna chiang tak hriain ramthimah kal a tuma. Mahse khatih lai khan a awmna kohhran Presbyterian ten ramthim rawngbawlna hi an la nei si lo a, tichuan, Baptist ah lutin BCM Hqrs Serkawn-ah a phei a. Kum 1972 atangin Tripura field-ah hian BCM missionary in a thawk tan ta a ni. Pi Remi hian BCM te hi *Missionary Kohhran* kan nihna hi a rawn tarlang chiang hle a ni.
A thawhna Molsom hnamte hnam mawl leh berh tak takte an la nih avangin naupang inbualna chang pawh hre lo leh Sahbawn hman tur pawh nei lote nitin mi sawm vel hi a bual chang a tam thin a. Ama sawi dan takin khatih hun lai khan Molsom naupang te hi chu Chirha vawknote in bual ang maiin an la bal em em a ni a ti. Chung hote chu Pathian thu hrilhin lehkha a zirtira, tunah Krista avangin hnam fai leh lehkha thiam tak tak an lo ni tawh a ni.
Kum 1980 a Tripura vai leh tlangmite inkarah buaina lian tak a chhuah khan a awmna khua Bagma in zawng zawng kha vaiin an rawn hal sak vek a, ramhnuaiah karhnih chaw pawh ei loin an tlanchhia a,chumi hnua khawchhunga an lut chu Molsom pain chawthing, chi nen a lo eitir a, "Kha mi tuma ka chaw ei kha ka chaw ei tawh zawng zawngah chuan a la tui ber a ni" a ti. Khami kuma Tripura buai kha a na em em a,a chanchin an hriat tawh loh avangin Mizoramah chuan "Nl. F Vallalremi a thi ta" tiin thu a thang hman hial a ni.
Tin, a awmna bul maia Jamatia Kristian lo ni tan ve te pawh an nu leh pa leh khawtlangte'n an sawisak nasat lutuk avangin an in atangin an tlan chhuak a, anni pan tur dang hre ta lo chu Pi Remi inah an tlan lut a, thisen tam tak an hmaia luangte chu Pi Remi hian hmangaih takin a lo tihfai sak veka, a inah hun engemaw chen a lo awmpui a, chungte mite chu kan Pastor pension ta Rev. Indra Poda Jamatia te ho hi an ni. Jamatia Kristian hmasate tawrhna sawi tawh hi chuan Pi Remi hming hi a dai ngai dawn tawh lo a ni.
Amah hi nula hmeltha tak Doctor te pawn nupuia an dil ve hial, mahse pasal neih ai chuan Pathian rawngbawl thlang zawktu a ni a. Hmeiche nunnem tak anga lang, mahse zuam sual awl tak a ni. A thil tih tawh hi chu serious taka ti thin a ni a, amah hian zahawmna hi a keng tel a, a lakah hian zir tur tam tak a awm.
A pain pasal dang neih tir lovin *Isua nen*a lo inneih tir tawh a, tin, amah pawhin a duh ber Krista neiin, a duh ber hnenah chuan thlamuang taka chawl tawh turin min lo liam san ta a ni.
Tun thla mai hian an bial BKHP ten min rawn tlawh an tum a, a hmel hmuh kan lo inbeisei laiin Lalpan a rawng lo bawl tawhna lamah ni lovin, a rawng a lo bawl sak avanga atana chawlhna a buatsaihah chawl zawk turin a lo ko ta zawk a ni.”
Amah thlah nan hei hi a thawhna thin, Tripura missionary aiawhin kan han ziak ve a ni.
- Vanlalmuankima, Field Director, Tripura Field
