November 14, 2020 (Inrinni) khan Lawngtlai South Pastor Bial chuan an bial chhung aṭanga Kohhran Upa nemngheh thar mi pariat (8)-te pualin BCM Biak In, Chandmary-ah orientation an neihpui a, Bial puipa-te bakah Rev. R. Lalnunzira, Executive Secretary Lawngtlai-in a telpui a ni.
He programme hi Rev. K. Laldosanga, Lawngtlai South Bialtu Pastor-in hunserh hmangin a kaihruai a, Training hi thupui hrang hrang hmangin hetiang hian neih a ni; Rev. C. Vanlawma’n Thuhriltu dinhmun leh Sermon buatsaih dan tih thupui hmangin zirtirna a pe a, Upa H. lalnunsanga’n Baptist Kohhran zirchianna chungchang zirtirin, Upa Ainehliana’n Mizoram Baptist Kohhran kalphung a zirtir a, Mizoram Baptist Kohhran Upa-te dinhmun tih thupui hmangin Rev. K. Laldosanga’n zirtirna a pe bawk a ni.
Mizoram Baptist Kohhran-ah hian Kohhran Upa atana nemngheh tharte hi Bialtu pastor leh Bial hruaitute kaihhruaina-in mahni bial theuhah Orientation neihpuiin BCM kalphung leh Kohhran Upa te rawngbawlna atana hriat tur pawimawh hrang hrang te zirtirna neiin hetiang hun hi hman thin a ni a, Kuminah pawh hian hetiang hun hi Bial hrang hrangah neih chhoh mek a ni.
