Mizoram Baptist Kohhran chuan kan ramin Covid-19 hrileng thawhhnihna a hmachhawn mek doletna atan theihtawp chhuahin hma a la ve zel a. Tunhnaiah Covid dona atan hian CM Relief Fund-ah cheng nuai 10 a pek luh bakah Kohhran mal leh Pawl hrang hrang (BKHP, BMP leh TKP) ten an veng chhunga Task Force Duty te tanpuina te pe-in Covid Care Centre hrang hrangah rawngbawlna leh tanpuina an theih ang ang in an pe bawk. Sawrkar ngenna ang in Biak In Hall te Community Quarantine Centre atan hman chhoh mek a ni bawk a, kan hriat theih chin ah Aizawl ah Luangmual, Shalome,  leh Venghlui  ten an Biak In Hall te Community Quarantine Centre ah an hman tir a, Lawngtlai ah Salem leh Nazareth ten an Biak In Hall Community Quarantine Centre ah an hmantir bawk.

Hetihlai hian Myanmar ram politics buaina avanga zohnahthlak raltlante chhawmdawlna atan Myanmar ramri depa Pastor Bial hrang hrang-ah BCM R&D chuan tanpuina a sem bawk a, heng tanpuina an sem hi a vaiin cheng 76,760 an hlan bawk a ni. Headquarters atanga Myanmar raltlan te chhawmdawlna pek bak ah hian Tualchhung kohhran leh Fellowship Department thenkhat raltlan te chhawmdawla luangchhuak an awm nual bawk a ni.