Kristian Naupang Pawl (KNP) Platinum Jubilee hriatreng nan Souvenir buatsaih a ni a, April 20, 2018 (fri) zing dar 9:45 khan Sap Upa leh Pu Buanga Hall, BCM Headquarters Office Serkawnah tlangzarh a ni a, Pi B.Singpari, KNP Promoter-in Souvenir siam a nih dân leh hmalâk dânte a sawi hnu-ah Rev. R. Zohmingliana, AGS i/c Service–in a tlangzarh a ni.
Kristian Naupang Pawl (KNP) kum 75 tlinna (Platinum Jubilee) chu April 23 khan Mizorama KNP Unit hrang hrang ten ropui takin an lawm a. Unit tam zawkin ruai thehin Platinum Jubilee hriatrengna lung (Monuments) an siam bawk.
He Souvenir hi Phek 178-a chhah niin, copies 1500 siam a ni a, Article 33 bakah BCM President, General Secretary leh FOD Director te Message a awm bawk. Souvenir siam na senso hi KNP Unit hrang hrang ten hemi puala sum an thawh khawm a ni a, tun hun leh thangthar zel tan pawh lehkhabu rotling leh hlu tak tur a ni.
...................
KRISTIAN NAUPANG PAWL (KNP) chanchin tlangpui
KRISTIAN NAUPANG PAWL (KNP) hi April 23, 1943 khan Baptist Missionary Society(BMS) Missionary-te Pi Zoduhi leh Pi Zomuani’n an lo din tawh a. Hun eng emaw chen inkaihhruaina mumal tak awm lova kalpui a nih hnuin, kum 1973 BCM Assembly chuan ‘K.N.P.hi mumal zawka enkawl nise’ tiin a lo rel ta a. Naupangte zingah Pathian ram a lo zau a, a lo ngheh a, a lo lanfiah deuh deuh theih nan inkaihhruaina Dan pawh mumal taka siam a lo ni ta a. K.N.P.hi a din atanga kum sawmnga chuang lai mai chu enkawltu hrang hrangte enkawlna hnuaiah dah a ni a. A din tanni 23 April hi hun eng emaw chen hnuah chhut chian chauh a ni a. Chu chu Assembly-ah thlen a ni a. Kum 2002 Assembly chuan he ni 23 April hi K.N.P. Day atan a lo pawm fel ta a ni.
Kristian Naupang Pawl (KNP) te hi nakin lawka ram leh hnam, kohhran enkawltu tur leh kaihruaitu tur an la nih avangin leh anmahni mai chuan la in enkawl theilo an nih avangin enkawl a, kaihhruai ngai an ni a. Mizoram Baptist Kohhran chuan hei hi hrechiangin anmahni kaihhruaina tur dante siamin hma a la chho zel a. Naupangten an pawimawhna leh Kohhranin a ngaih pawimawhzia an lo hriat zel theihna turin a bik taka anmahni puala ‘NI BIK’ kumtina an neih a, an hman hi Mizoram Baptist Kohhran Assembly chuan tha a ti a. Kumtina KNPten rualkhai tak leh hlim taka an hman theihna turin “BCM NI PAWIMAWH BU’ ah hian dah tel a lo ni ta a ni.
BCM Inchhiarna (Statistics) 2017-2018-in a tarlan danin tunah hian Kristian Naupang Pawl (KNP) member 33338 an awm mek a ni.
Read More Articles:
