Jubilee Balloon 75 KNP Promoter-in a chhuah[/caption]
Karleh Thawhtanni, April 23, 2018 hi Kristian Naupang Pawl (KNP) Din champhaphak (KNP Day) vawi 75-na (Platinum Jubilee) a ni a. Kumin KNP Day thupui atan ‘“Isuan Naupangte a hmangaih” (Marka 10:14) tih thu hman a ni ang. KNP Unit awmna Kohhran hrang hrangah urhsun taka hman ani ang a, Pastor Bial engnemawzat chuan hmei ni denchhen hian KNP Inkhawmpui an hmang bawk. Kumin KNP Day-ah hian kum adanga tih thin ang bawkin Headquarters atangin Tawngtai rual thupui thlan sa, Thuchah tawi chhiar tur te buatsaih a ni.
Tawngtai rual Thupui:-- Kum 75 chhung Pathian min hruaina avanga lawmthu sawina leh Platinum Jubilee min hruai thlen avangin lawmthu sawi ang.
- KNP min dinsaktu Pathian leh Kohhran hruaitu te avanga lawmthu sawina
- KNP member zawng zawngte leh hruaitute avanga lawmthu sawina
Tarlan tawh ang khan kumin KNP Day hi Platinum Jubilee a nih avangin Headquarters atangin a lawm dan tur ruahmanna te siam a ni a. Unit tam zawkin Platinum Jubilee hriatrengna siamin, hei hi KNP Day zing kar emaw, unit ten remchang an siam angin hawnna neih tur a ni ang. Heng bakah hian Tualchhung Kohhran leh KNP Unit ten tul leh tha an tih angin Infiamna leh programme dang te an siam ang.
KNP din tanna hmun, Serkawn Unit KNP te chuan tunkar Thawhlehni (April 17, 2018) khan Platinum Jubilee hawnna programme, BCM mual,-ah an hmang a. Hemi ni atang hian tlai lam leh Pathianni chawhnu-ah te Jubilee lawmna programme an hmang chho mek a, April 23-ah a lawmna hun ropui takin an hmang ang a, tlai lamah Jubilee ruai an theh ang.
...........
JUBILEE CHIBAIBUKNA
KNP memberte leh Hruaitu zawng zawngte Platinum Jubilee Chibai ka buk che u.Serkawn Kohhran Upa rorel thu angin Pi Zoduhi leh Pi Rovi-te kaihhruaina hnuaiah Ni 23.April 1943 Pathian niah Naupang a hranga inkhawmpuina neih a ni a, Serkawn-ah KNP din a lo ni a. 2018 April 23 hi KNP din atanga Kum-75na Platinum Jubilee kum a ni. Jubilee Programme hi Headquater atangin buatsaih a ni a. Hemi bakah hian KNP Unit ten an remchang ang zelin Jubilee lawmna an buatsaih a. KNP Unit hrang hrangten Jubilee hi ruai nen Uar taka hman an tum a, Platinum Jubilee pual hian Souvenir tha tak buatsaih meka ni a, KNP Unit ten Souvenir buatsaihna tur hian sum an thawhkhawm a, Unit tinte hnenah lawmthu kan sawi a, Souvenir hi Unit tinah rawn thawn kan tum ang.
Platinum Jubilee lawmna leh hriatrengna atan a thei Unit ten Lung phun turin an in buatsaih a, thu ziah dan tur pawh Unit tinah thawn a ni a, Unit tam zawkten Jubilee lung mawi takin an phun dawn a ni.
Jubilee Thupui ‘Isuan Naupangte a hmangaih’ (Marka 10:14) tih a ni a. Naupangte Isuan min hmangaih avangin Keini pawhin Platinum Jubilee kan hman atang hian Isua hi Hmangaih zual deuh deuh ila, Atan tangkai zawka nun i tum theuh ang u.
Platinum Jubilee hlim taka hmang theuh turin duhsakna ka hlan a che u.B.Singpari KNP Promoter, Baptist Church of Mizoram
......................
KRISTIAN NAUPANG PAWL (KNP) chanchin tlangpui
RISTIAN NAUPANG PAWL (KNP) hi 23 April, 1943 khan BMS Missionary-te Pi Zoduhi leh Pi Zomuani’n an lo din tawh a. Huna eng emaw chen inkaihhruaina mumal tak awm lova kalpui a nih hnuin, kum 1973 BCM Assembly chuan ‘K.N.P.hi mumal zawka enkawl nise’ tiin a lo rel ta a. Naupangte zingah Pathian ram a lo zau a, a lo ngheh a, a lo lanfiah deuh deuh theih nan inkaihhruaina Dan pawh mumal taka siam a lo ni ta a. K.N.P.hi a din atanga kum sawmnga chuang lai mai chu enkawltu hrang hrangte enkawlna hnuaiah dah a ni a. A din tanni 23 April hi hun eng emaw chen hnuah chhut chian chauh a ni a. Chu chu Assembly-ah thlen a ni a. Kum 2002 Assembly chuan he ni 23 April hi K.N.P. Day atan a lo pawm fel ta a ni.
Kristian Naupang Pawl (KNP) te hi nakin lawka ram leh hnam, kohhran enkawltu tur leh kaihruaitu tur an la nih avangin leh anmahni mai chuan la in enkawl theilo an nih avangin enkawl a, kaihhruai ngai an ni a. Mizoram Baptist Kohhran chuan hei hi hrechiangin anmahni kaihhruaina tur dante siamin hma a la chho zel a. Naupangten an pawimawhna leh Kohhranin a ngaih pawimawhzia an lo hriat zel theihna turin a bik taka anmahni puala ‘NI BIK’ kumtina an neih a, an hman hi Mizoram Baptist Kohhran Assembly chuan tha a ti a. Kumtina KNPten rualkhai tak leh hlim taka an hman theihna turin “BCM NI PAWIMAWH BU’ ah hian dah tel a lo ni ta a ni.
BCM Inchhiarna (Statistics) 2017-2018-in a tarlan danin tunah hian Kristian Naupang Pawl (KNP) member 33338 an awm mek a ni.
Read More Articles:
