Tunkar Inrinni, April 23, 2016 hi Kristian Naupawng Pawl (KNP) Din champhaphak (KNP Day) a ni a. Kumin KNP Day thupui atan “In thianghlim tûr a ni" (1 Pet 1:16)tih thu hman a ni ang. Inkhawmna buatsaih theite chuan Tawngtai rual thupui thlansa, Thuchah tawi leh Quiz kaihruaina siamsa te hman tur a ni a. Heng bakah hian Special Item, Infiamna leh hruaitute tul leh tha an tih angin programme an siam thei ang.
Tawngtai rual Thupui:- - KNP member zawng zawngte tân - KNP hruaitute zawng zawng tân - Nu leh pa zawng zawngte tân
Quiz : Bible/BCM Thurin/KNP Thuzir/thil dang atangin
Thuchah tawi -Thupui awmsa hmanga sawi ni se, thusawitu tûr hi Unit KNP-in ruat ni se.
Games : A remchân anga neih tum ni se
KRISTIAN NAUPANG PAWL (KNP) chanchin tlangpui:RISTIAN NAUPANG PAWL (KNP) hi 23 April, 1943 khan BMS Missionary-te Pi Zoduhi leh Pi Zomuani’n an lo din tawh a. Huna eng emaw chen inkaihhruaina mumal tak awm lova kalpui a nih hnuin, kum 1973 BCM Assembly chuan ‘K.N.P.hi mumal zawka enkawl nise’ tiin a lo rel ta a. Naupangte zingah Pathian ram a lo zau a, a lo ngheh a, a lo lanfiah deuh deuh theih nan inkaihhruaina Dan pawh mumal taka siam a lo ni ta a. K.N.P.hi a din atanga kum sawmnga chuang lai mai chu enkawltu hrang hrangte enkawlna hnuaiah dah a ni a. A din tanni 23 April hi hun eng emaw chen hnuah chhut chian chauh a ni a. Chu chu Assembly-ah thlen a ni a. Kum 2002 Assembly chuan he ni 23 April hi K.N.P. Day atan a lo pawm fel ta a ni.
Kristian Naupang Pawl (KNP) te hi nakin lawka ram leh hnam, kohhran enkawltu tur leh kaihruaitu tur an la nih avangin leh anmahni mai chuan la in enkawl theilo an nih avangin enkawl a, kaihhruai ngai an ni a. Mizoram Baptist Kohhran chuan hei hi hrechiangin anmahni kaihhruaina tur dante siamin hma a la chho zel a. Naupangten an pawimawhna leh Kohhranin a ngaih pawimawhzia an lo hriat zel theihna turin a bik taka anmahni puala ‘NI BIK’ kumtina an neih a, an hman hi Mizoram Baptist Kohhran Assembly chuan tha a ti a. Kumtina KNPten rualkhai tak leh hlim taka an hman theihna turin “BCM NI PAWIMAWH BU’ ah hian dah tel a lo ni ta a ni.
BCM Inchhiarna (Statistics) 2013-2014-in a tarlan danin tunah hian Kristian Naupang Pawl (KNP) member 31930 an awm mek a, Mipa - 15878 leh hmeichhia- 16052 an ni.
KNP DAY THUCHAH:
Pathian hruainain April ni 23 KNP Day kan lo thleng leh ta. Kristian Naupang Pâwl member zawng zawngte KNP Day chibai ka bûk a che u.Kum 1943 atangin Pathianin Kristian Naupang Pâwlte a rawng bâwl tûrin min lo din a. Kohhranah tangkai taka vawiin thlenga rawngbâwl theia min siamtu Pathian hnênah lâwm thu i sawi ang.
KNP-te hian chanchinbu ‘Naupangte |hian’ kan nei a, kan chanchinbu hi tluang taka a chhuah chhunzawm zêl theih nân te, kan thuzirte tangkai taka kan zir theih nân te, kan member-pui Isua la nei lo tân te Pathian hnênah tawngtai thîn ang u.
KNP day hi hlim leh nuam taka in hman theih nân Lalpan malsâwm theuh che u rawh se.
