April 23(Thawhlehni) hi Kristian Naupawng Pawl (KNP) Din champhaphak (KNP Day) a ni a. School chawlh a nih loh avangin a hranpa-in KNP Day pual hian Programme siam a ni lo va. Unit thenkhat leh Bial thenkhat chuan nimin leh vawiin-ah te hun hmangin Bial Inkhawmpui nen an hmang nghal a ni. Kumin KNP Day thupui atan “Naupang mai ka ni ti suh” (Jeremia. 1:7) tih thu hman a ni ang
RISTIAN NAUPANG PAWL (KNP) hi 23 April, 1943 khan BMS Missionary-te Pi Zoduhi leh Pi Zomuani’n an lo din tawh a. Huna eng emaw chen inkaihhruaina mumal tak awm lova kalpui a nih hnuin, kum 1973 BCM Assembly chuan ‘K.N.P.hi mumal zawka enkawl nise’ tiin a lo rel ta a. Naupangte zingah Pathian ram a lo zau a, a lo ngheh a, a lo lanfiah deuh deuh theih nan inkaihhruaina Dan pawh mumal taka siam a lo ni ta a. K.N.P.hi a din atanga kum sawmnga chuang lai mai chu enkawltu hrang hrangte enkawlna hnuaiah dah a ni a. A din tanni 23 April hi hun eng emaw chen hnuah chhut chian chauh a ni a. Chu chu Assembly-ah thlen a ni a. Kum 2002 Assembly chuan he ni 23 April hi K.N.P. Day atan a lo pawm fel ta a ni.
Kristian Naupang Pawl (KNP) te hi nakin lawka ram leh hnam, kohhran enkawltu tur leh kaihruaitu tur an la nih avangin leh anmahni mai chuan la in enkawl theilo an nih avangin enkawl a, kaihhruai ngai an ni a. Mizoram Baptist Kohhran chuan hei hi hrechiangin anmahni kaihhruaina tur dante siamin hma a la chho zel a. Naupangten an pawimawhna leh Kohhranin a ngaih pawimawhzia an lo hriat zel theihna turin a bik taka anmahni puala ‘NI BIK’ kumtina an neih a, an hman hi Mizoram Baptist Kohhran Assembly chuan tha a ti a. Kumtina KNPten rualkhai tak leh hlim taka an hman theihna turin “BCM NI PAWIMAWH BU’ ah hian dah tel a lo ni ta a ni.
Kumin KNP Day hi Thawhlehni a nih avangin unit thenkhat chuan in hmang theilo mai thei a. Hmang theite tan a hnuaia mi ang hian hun serh hman dan tur tlangpui buatsaih a ni. Hemi bak hi hmang theite tan chuan mahni remchan dan leh tha tih anga hman mai tur a ni ang. Hemi ni tak hmang theilo, hman hram duh tan pawh mahni remchan hunah hman mai nise a tha ang.
Thupui : “Naupang mai ka ni ti suh”
Bible chhiar tur : Jeremia 1:7; 2 Timothea 3:14-15.
Thupui sawi dan tur tlangpui :
1. Naupangte Isua’n a hmangaih, (Marka 10:13)
2. Naupangte Isua’n a dah hniam lo, (Matthaia 18:1-6)
3. Naupangte Pathianin a hmang duh (Jeremia 1:7)
4. Pathian thu an zir thinte zawm turin Pathianin naupangte a phut (2 Tim 3:14,15)
Tawngtai rualna tur thupui :
1. Naupangten Pathianin thu a pek anga an nu leh pate thu an awih theih nan.
2. An puitlin thlenga an thlah phal tawh loh tur kawng thaa hruai an nih theih nan.
3. Naupangte Missionary rilru pua an thanlen theih nan.
Thuchah :
Vawiin KNP Day a lo thlen hian Kristian Naupang Pawl member zawng zawngte kan Lalpa Isua Krista hmingin chibai ka buk a che u. KNP member zawng zawgte Pathianin thu a pek che u ang taka in nu leh pate thu in zawm zel theihna turin ka duhsakna ka hlan che u a, in vaiin Pathianin malsawmin sual tinreng lakah venghimin hruai zel che u rawh se.
KNP Day hi sikul kal nite a nih thin avangin duhthusam anga hman a theih loh fo thin a, a pawi ka ti hle mai. Engpawh nise, KNP Day lo herchhuak hian kan Lal Isua’n naupangte min hmangaihzia leh A hnenah chatuana van ram cheng ve tura min duhzia min hriatchhuahtir leh se. Keini KNP-te pawhin vawiin atang hian Pathian thupek zawma, kan nu leh pate thu awih lehzual turin tan la thar aleh ila.
KNP member zawng zawngte hian keimahni pualin chanchinbu, thlatina chhuak “NAUPANGTE THIAN’ kan nei tih hre thar leh ila. He kan chanchinbu hi tam takin in la tawh a, la la lo eng emaw zat in awm bawk a. La la lote pawh khan lak ve tawh lo tum ula. KNP member zawng zawngten he kan chanchinbu ‘Naupangte Thian’ hi chhiar theuh I tum ang u. Thu tha tak tak, nundan tha nitina kan nun min kaihtuaitu turte, thawnthu tha leh ngaihnawm tak tek te, mi tumruh leh taima, kan entawn tur chanchin te, hriatna zau zawk kan neih theihna turte, chhiar tur a awm reng a ni. Naupangte Thian chanchinbu chhiar thintute tan chuan tisa leh thlarau lamah hmasawnna tur tam tak a awm a ni. Chuvangin, kan chanchinbu ‘Naupangte Thian’ hi la a, chhiar vek turin KNP member zawng zawngte ka sawmin ka ngen che u a ni.
KNP Day hlim tak leh tluang taka hmang theuh turin ka duhsakna ka hlan nawn leh a che u. Pathianin Sualna chi tinreng lakah venghim zel che u rawh se.
