April 23, 2012(Thawhtanni) hi Mizoram baptist Kohhran Naupang pawl "Kristian Naupang Pawl" (KNP) din champha a ni a. Kuminah hian School chawlh a nih loh avangin Unit tam takin hemi ni hian KNP Day pualin hun an hmang thei lo a, amaherawhchu tun Inrinni leh Pathianni-ah te KNP Unit tamtakin Programme siamin KNP Day pual hian hun an hmang dawn a ni. Kumin KNP Day thupui atan chuan “Tho la, naupang kha kai tho la, I kutin chelh rawh, amah chu chi ropui takah ka siam dawn a sin” (Gen. 21:18) tih a ni ang. BCM pumpui huapin tun dinhmunah hian KNP Unit 405-ah member 30,013 an awm a ni.
................... HISTORY:Kristian Naupang Pawl (K.N.P.) hi a tirah chuan Kohhran Naupang Pawl tiin BMS Missionary pahnih- Pi Zoduhi leh Mi Zomuani te chuan kum 1943 khan bul an lo tan a. Naupangte chu Pathianni zing inkhawm hmain Biak inah an inkhawmpui thin bakah Pathian ni zing inkhawmah pawh anmahni pualin thutna hran an siam sak thin a. Hun rei tak chhung chu enkawltu bik pawh awm chuang lovin kan zosap Missionary te kutah an awm a. Hotu an neih ang zelin kohhran engemaw zatah a ding a, Kum 1970 hnu lamah chuan khaw tin deuh thawah a lo ding ta a. Hetianga KNP lo din hi Assembly pawhin tha a ti a. Anmahni enkawl turin BKHP te a ruat a, BKHP hian 1968 atanga 1983 thleng an enkawl a. Chumi hnuah 1984 atangin 2001 thleng Sunday School Committee kutah a dah leh a. Tunah chuan 2001 atangin Kohhran Committee kutah awmin Headquarters-ah chuan FOD kutah dah an ni ta.
Hun lo kal zelah K.N.P. te hian an lo din tanna ni hi hman ve an duh ta a, August ni 19 hi kum tin an hmang ta a. Amaherawhchu August thla hi School naupang exam lai a ni duh riau mai a, an tan harsatna a lo awm ta a. Khaw tam tak atangin K.N.P. Day hun sawn an duh thu, Sunday School Committee-ah a lo lut a. Sunday School Committee chuan February thla inrinni vawi hnihna hi an tan remchang berin a hria a, a ruatsak ta a. Kohhran Calendar-ah pawh hetiang hian dah a lo ni ta a. Hun a lo kal zela, KNP te din tanni hi chhut chian a ni a; kum 1943 April ni 23-ah din a ni tih hriat chian a ni ta a. Chu chu Assembly-ah thlenin kum 2002 Assembly chuan KNP Day atan April ni 23 hi a pawm fel ta a; hetiang hian BCM Calendar-ah pawh chuantir a lo ni ta a ni.
.................................
KNP DAY THUCHAH
From Director,
Fellowship Organsations Department
Kristian Naupang Pawl member zawng zawng te leh KNP hruaitu te chibai ka buk a che u. KNP Day lo inherchhuak leh ah hian Pathian malsawmna in chan theuh nan duhsakna ka hlan a che u. KNP Day hi sikul kal niah te a inherchhuah thin avangin leh puitling angin zan lam inkhawm te siam a rem loh avangin kan Day hi kan hmang thei lo fo thin. Assembly ah ni nghet ruat tur a kan dilna a rem loh avangin kan kal dan pangngai in kan kal zel dawn a ni. Kumin pawh hian KNP Day hi Thawhtanah a inherchhuak a, chuvangin inkhawm programme pawh siam a ni ta lo.
Fellowship Organisations Department lam atangin KNP te tha zawk a kaihhruai anih theih nan KNP Hruaitute pual a Seminar te pawh buatsaih thin tum ani. Chubakah Kohhran inkhawm leh Programme dangah pawh hun leh chanvo tam zawk an neih theih nan hma lak mek a ni bawk. Tin, KNP ten Bial Inkhawmpui mumal zawk a an neih zel theih nan Pastor Bial rorelna lamah pawh an mawhphurhna a dah tel tur a buaipui mek ani bawk.
Kan chanchinbu Naupangte Thian pawhin hma a sawn zel a, Postal Registration pawh kan nei ta. KNP Unit la lo kan la awm nual a, lak vek tum nise, Missionary fate pawh laksak theih reng a ni.
