November ni 4 (Pathian Ni)khi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni zing inkhawm ah Headquarters atanga thupui thlan sa hmangin thuchah gnaihthlak a ni ang a. Hei bakaha hian Tualchhung Kohhran ten tul leh tha an tih angin hemi ni pual progamme hi an hmang dawn a ni. Kumin Khawvel Sunday School Ni-a kan thupui chu “Mi bote Krista hnena hruai” tih a ni ang.
Tawngtairual thupui:
1. Pathianin Sunday School min pek avanga lawmthu sawina. 2. BCM Sunday School in hma a sawn zel avanga lawm thu sawina. 3. Sunday School-a thawktute tan – Headquarters, Bial leh Tualchhung Kohhrana Puipate leh Zirtirtute tan. 4. Sunday School zirlaiten hlawkpui nana an hman ngei theih nan.THUCHAH
Khawvel Sunday School Ni kan lo thleng leh ta. Pathian hnenah Sunday School min pek avangin lawmthu i sawi thar leh ang u. Kan hriat tawh thin angin Sunday School hi 1780 kuma Robert Raikes-an Gloucester, England-a a din a ni a. Chuta tang chuan a thang zel a, Sunday School a pung zel bawk a, 1785 kumah chuan Sunday School inzawmkhawm pawl hmasa ber, Society for Promoting Sunday School a lo ding ta hial a, a hnu lawkah Sunday School Society tia thlak a ni.
Khawvel hmun hrang hrangah a darh zau zel a, India ramah pawh kum 1800 khan William Carey leh a thiante pahnihin Serampore-ah an lo din a. Tin, Mizoramah chuan kum 1896, March ni 1-ah Sapupa leh Pu Buanga ten Aizawlah an din a, chhim lamah chuan kum 1902-ah Tv. Thankunga (a hnua Tirhkoh leh Pastor ni ta) leh a thian ten Sethlun-ah an din a ni.
Khawvel Sunday School Ni dintu chu Dr. George W. Bailey a ni thung a. Ani hi America (USA) mi a ni a, Sunday School a tuipuiin khawvel huapa Sunday School rawngbawlnaah mi pawimawh tak a ni. Ama huaihawtin kum 1907 khan khawvel pum huap Sunday School Ni Rome khawpuiah an lo hmang tawh a. A hnuah kum 1910 khan World Sunday School Association ah President atan thlan a ni a. President a nih kum, 1910 ah phei chuan Washington khawpuiah May 22 ah ropui takin Khawvel Sunday School Ni hi an hmang a ni. Khawvel Sunday School Ni hi a remchan dan angin hman a ni thin a, mahse India ramah chuan tuna kan hman lai mek, November Pathian ni hmasa ber hi hman a ni ta reng a ni.
Sunday School hi kan missionary hmasate khan an ngai pawimawh em em a, an rawn din thuai kha a ni reng a, tin, Mizo Kristian hmasa te pawhin an ngai pawimawh em em zel a ni. Kum 1904 Sethlun inkhawmpui-ah khan “Kohhran din tawhnaah chuan Sunday School awm zel rawh se” tiin an lo rel daih tawh a ni. Tunah hian BCM tualchhung Kohhranah Sunday School nei lo kan la awm nual a, Sunday School nei theuh turin tan i la ang u.
He thu ziak lai hi chuan kum 2011 Assembly report hi kan neih hnuhnung ber a ni a (tunah chuan kum 2012 Assembly report pawh hmuh tur a awm), chuta BCM Sunday School dinhmun tlangpui chu - Tualchhung Kohhran 419 ah Kohhran 405 ah Sunday School a ding a, Kohhran member kum 4 chin chunglam 113463 ah member 81688 (72.00%) in hming an ziak a. Sunday School puipa 2013 an awm a, zirtirtu 7779 an awm bawk a, zirtu 72746 an awm thung a ni. Sunday School Hall nei Kohhran 212 an awm a, tin, Sunday School Library nei engemawzat an awm bawk.
Sunday School pawimawhna sawi tur tam tak a awm a, kan sawi seng lovang. Hun rei tak BCM Sunday School lo enkawl tawh Rev. V.L. Zawnga chuan Sunday School pawimawhna hetiang hian a sawi 1. Mizote lehkha thiamna petu, 2. Kohhran dintu, 3. Kohhran ban. Kumin Khawvel Sunday School Ni-a kan thupui chu “Mi bote Krista hnena hruai” tih a ni. Hei hi kan Sunday School thil tum zinga pakhat a ni a, Sunday School dinchhan dik tak a ni bawk. Sunday School-ah hian Pathian thu kan zir a, hriat tam leh hriat zau a tha em em a, mahse chu mai chu a tawk lo. Pathian thu kan zir hi amah kan hnaih theih nan leh a hnen kan thlen theih nan ni se. Tin, Pathian thu kan zirtir hi kan zirtir ten Krista an hmuh theih nan a nih a pawimawh em em a ni.
