Tunkar Pathianni, November ni 1, 2015  hi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni chawhma inkhawm ah Headquarters atanga thupui thlan sa hmangin thuchah ngaihthlak a ni ang a. Headquarters atanga Inkhawm Programme duansa hmangin Tualchhung Kohhran tinah he ni pual programme hi an hmang dawn a ni.

Kuminah hian thupui atan “Zir la, nunpui rawh” tih thlan a ni a. Pathianni chawhma Kohhran Inkhawma thuchah chhiar tur pawh buatsaih a ni a, chu chu Kohhran tinah chhiar chhuah a ni ang.

...............................

THUCHAH

1. Sunday School lo pian dan: Kum tina kan sawi, Khawvela Sunday School Ni lo pian dan hi, mi tam takin kan ngaihtuahna a lo thar leh theih nan sawi nawn leh ila. Kum 1780 July thla khan England rama khaw pakhat Gloucester-ah Robert Raikes-a leh a thianten Subday School hmasa ber an lo din tawh a. An din chhan ber chu, Pathianni-ah inkhawmnaa tel ve lo naupangte, engmah tih tur hre lo, tei mai mai tam tak an hmuh chuan an tan Pathian thu zirna hun leh hmun buatsaih sak a, tih tur neihtir ve tulin an hria a ni. Pathian thu chu nunchan zirna leh thlarau lama hma an sawn theihna tur a nih theih ngei pawh an ring a ni. Pathian thu zirna hmun an neih chuan nungchang mawi leh nih- phung dik tak kawng chu an zawh chho thei turah an ngai a ni. Chutiang chuan India ramah pawh kum 1800, August thla khan William Carey-a leh a thianten Serampore-ah Sunday School an din a, an tum ber pawh Robert Raikes-a te rilru chiah tho kha a ni. Mizoramah chuan Sap Upa leh Pu Buanga ten March 1, 1896 khan Aizawl-ah Sunday School an a, chu chu keini Mizoram Kristiante tan chuan Sunday School intanna hmasa ber a ni. Mizoram chhim lamah ve thung chuan Sethlun khuaah kum 1902 khan Tv. Thankungan Sunday School a lo din ve leh tawh a, Kristian tlem te an nih lai atangin Sunday School hi a piang nghal a ni.

2. Sunday School leh Kohhran:

Sunday School hi kohhran dinnaah a ding ngei turah kan ngai ta a, a lawmawm hle mai. Khawvel hmun tam takah chuan Children Sunday School tiin, naupang pual atan chauh an hmang a. Mizoramah chuan kohhran tinte hi Sunday School ngai pawimawh lo kan awm hauh lo va. A chhan chu kan Zosap missionary hmasa ber te khan Pathian thu zirna school hi an ngaih pawimawh em vang a ni. Sabbath serh kohhran pawhin Sabbath School te neiin Pathian thuu zir hi mite ngaih pawimawh a ni zel a. Chuvang chuan ringtu nun leh Sunday school hi a inzawm tlat a ni.

3. Sunday School leh Kristian chhungkua:

Ringtu inti chhungkua, Sunday School kal ngaina lo chu kohhranin vantlang nunphung pangngai zawh lovah an ngai nghe nghe a. Chhungkua, Sunday School ngai pawimawh chu pawn lama mite thlir dan pawh a danglam thin. Chuvangin, Kristian chhungkuaah chuan Sunday School hian hmun pawimawh ber lai a luah tlat a ni. Chhungkaw ti ti-a Sunday School-in lalna a channa apiang chhungkua chu chhungkaw zahawm an ni zel thin. Kan fate chu an tet lai atanga Sunday school kan ngainat tir chuan a khawvel hun hman tur kawng chanve a dik tan tawh a ni.

4. Pathian thu chu himna phaw a ni:

Tirhkoh Paulan Ephesi kohhranho hnenah, “Rinna phaw la ula, chumi chuan misual thal alh thei zawng zawng chu in timit thei ang. Thlarau ngunhnam Pathian thu chu la ula, engtikah pawh thlarauva tawngtaiin …ngaihven rawh u” a ti a ni. Thlemna leh harsatna a lo thlen chang hian Pahtian thu hi kan nun inhumhim nan hmang ila, chu chuan kan hrehawmna zawng zawng a tikiang thin a ni. Nun tana hlauhawm, thlemna thlipui leh dotu hmelma te lakah kan himna tur a ni.

5. Kan kawng hruaitu a ni:

Sam 119:105-ah chuan, “I thu te hi ka ke atan te hian khawnvar a ni a, ka kawng atan eng a ni,” tih kan hmu a. Thim thamah chuan eng a awm lohvin kal ngaihna a hre lo thin ang hian, mahni finna leh hriatna ringawta kan kal chuan petek hun te kan nei thin a, chutinag huanah chuan Pathian thu chauh hi kan kal trumna hmun tina min hruai thlengtu a ni thin a ni. Hlauhna leh hmelma lakah pawh kan himna a nih avangin, Pathian thua kan nun tlat hi a pawimawh thin. Chutiang ni tur chuan naupan lai nun atanga Pathian thu zir kan ngaih pawimawh a tul hle a ni. Naupan lai atanga inthlahdah hauh lova Sunday School kal thin tumah an puitlin hnua inchhir kan hre ngai lo. Chuvangin kan kawng hruaitu Pathina thu nung chu kan nuna a nihna tur anga a than chhohpui theihna turin Sunday School kal theuh turin chhungkaw tin te kan insawm thar leh a ni.

6. Pathian thu chu thiltih nei lovin a awm lo:

Isaia 55:11-ah chuan, “Ka kaa thu chhuak chu engmah tih nei lovin ka hnenah a kir leh lo vang a, ka duh ang chu a tizo zawk ang a, thil ti tura ka tirhnaah chuan hlawhtling bawk ang” tih kan hmu a. Hei hi Pathian aw a ni a. Pathianin mihringteah hian hnathawh duh a nei thin. Mi tam takin Pathian thu ngaihsak duh lovin, mahni tha tih dan angin awm kan ching thin a, kan nuna Pathian thu a lal loh rual rualin harsatna kan tawk thin. Mi piangthar, Pathian tana serh rhan tlat te tna phei chuan Pathian thikthu hi a chhe em em mai a, chuvang chuan chutiang mite kal tlanga hnathawh a duh thin. Ama duh loh zawnga kan nun chuan chawp leh chilh pawhin kan chungah chhiatna a thlen duh thin a. Pathian thu nung rengah chuan awm tlat turin ringtute chu kan inbuatsaih fo a tul thin a ni. Pathian rinchhana nung tlatte tan a thutak hi a hun takah chuan chhawrnahawm tak a ni a. Lungngaihna leh hrehawhmna a lo thlen chang pawhin, Pathian thu bawkah kan tlu lut ang a, ani chuan amah ngaihsak a, bel tlattute tumah a phatsan ngai lo. Pathian thu hi a nung a, thil a tithei a, kan mamawh hun atan a takin kawng tinrengin min thawh sak thin a ni.

7. Sawmna:

Kohhran, chhungkua leh mimal tin ten Sunday School hi ngai pawimawh ila, thlarau lama harsatna thleng thei lakah kan him ang a, nun hlimna thuruk leh Pathian thu ngainatna kan nei zel dawn a ni. Chuvangin mi zawng zawngin Pathian thu zirna hmun, Sunday School-ah hian kal theuh i tum ang u.