Tunkar Pathianni, November ni 6, 2016  hi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni chawhma inkhawm ah Headquarters atanga thupui thlan sa hmangin thuchah ngaihthlak a ni ang a. Headquarters atanga Inkhawm Programme duansa hmangin Tualchhung Kohhran tinah he ni pual programme hi an hmang dawn a ni.

Kuminah hian thupui atan ““I thu chu thutak a ni” (Joh 17:17).  tih thlan a ni a. Pathianni chawhma Kohhran Inkhawma thuchah chhiar tur pawh buatsaih a ni a, chu chu Kohhran tinah chhiar chhuah a ni ang. Read More Story>>

........................

KHAWVEL SUNDAY SCHOOL NI  THUCHAH

Thupui : “I thu chu thutak a ni” (Joh 17:17).

 - Rev. PC. Liandula Director CED

Khawvêl Sunday School ni kan neih dân:                                 

Pathian thu zirna hmun pawimawh tak Sunday School hi kum 1780-ah khân England rama Gloucester-ah Robert Raikes-a din a ni tih hi pawm dân tlângpui a ni. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School din a ni a. Chumi hnuah Sunday School Society tia thlâk a lo ni leh ta a ni. India ramah pawh kum 1800 khân Baptist Missionary Wiliam Carey-a te thian zaho khân Sunday School an din ve ta a ni. Sâp Upa leh Pu Buanga’n January 11, 1894-a Mizoram an lo luh hnuin March 1, 1896-ah Aizâwl-ah Sunday School chu an lo din ve ta a. Chu chu BCM-in kan rama Sunday School din niah kan pawm a. Mizoram chhim lamah chuan kum 1902-ah Tv. Thankûnga hovin an din ve leh ta a ni.

Khawvêl Sunday School Ni dintu chu Dr. George W. Bailey, America (USA) mi niin, Sunday School rawngbâwlnaa mi pawimawh tak a ni. Kum 1907 khân Khawvêl Sunday School Ni, Rome khawpuiah an lo hmang tawh a. Kum 1910 khân World Sunday School Association-ah President atân thlan a ni. May 22, 1910 khan Washington khawpuiah Khawvêl Sunday School Ni hi ropui takin an hmang a. India ramah November Pathianni hmasa ber hi Khawvel Sunday School Ni at^n hman a ni thin. Mizoram Baptist Kohhran hian kum 1939 atangin Khawv>l Sunday School Ni hi November Pathianni hmasa ber hi kan hmang ta zel a ni. Pathian thutak kan zirna hmun Sunday School hi kohhranten tihlu zaul zel ang u.

I Thu chu Thutak a ni:

Kan thupui chu, “I thu chu thutak a ni,” (John 17:17) tih a ni a. Lal Isua tawngtaina thu a ni. Chu thutak chu Thlarau Thianghlimin ringtute min hruai luh a tumna chu a ni a (cf. Joh 16:13). Thlarau dik tak chuan ama phuahchawpin thu a sawi dawn lo va, Pa hnen atanga a dawn chu a hril zawk dawn, thutak chu min kawhhmuh dawn tih kan hmu nghal bawk. Tichuan “I thu chu thutak a ni,” tih chu a fiah mai awm e. He tawngtaina thuah hian ringtute nun tihthianghlimna atan chu thutak chu a tul a ni tih kan hre thei a, “Anni chu thutakin tithianghlim rawh,” tih chu kan thupui thuhmahruai a ni. Chuti a nih chuan mihring nun bawlhhlawh leh tenawm Pathian thianghlimna hmaa ding tlak lo hi thutaka tihthianghlim a nih a tul hle tihna a ni. Chu thutak hriatna famkim chu Isua Krista-ah kan hmuin kan chang a, “Keimah hi Kawng leh Thutak leh Nunna chu ka ni,” (Joh 14:6-8) tiin Amah ngeiin min hrilh a ni.

Chu thutak chu Pathian Lehkhabu kan tihah hian puanchhuah a ni a, John Milton-a chuan, “Ka mut a chhuahin Bible hi ka khum a ni a, ka ril a tamin ka chaw a ni a, hlauhna hmuna ka ralthuam a ni a, ka dam loh laiin ka dawmdawi a ni a, ka khawharna hmuna ka thian tha ber a ni,” a ti a. A sawi zel danah chuan, “Hna ka thawhin ka hmanraw hriam a ni a, hla ka sakin ka rimawi a ni a, mawlna zan thimah min tifingtu a ni a, khaw vawtin min hmehin ka mei lum a ni,” a ti a nih chu. Thutakah hruai luhin a awm ngei a ni ang. Chu thutak chu Pathian inpuan-chhuahna thu hi a ni e.

Sunday School hian kohhranah hmun pawimawh tak a luah a, naupang leh puitling huapzo tawngbawlna a ni. Thutak kan zirna hmun a ni bawk. Chuvangin Lal Isuan, Pa hnena a tawngtaina, “I thu chu thutak a ni,” a tih zir ve theihna  Lalpan min pe hi i chawinung zel ang u. Queen Elizabeth II chuan, “Bible hi khawvela thil awm tawhah chuan thil hlu ber  a ni a, lal chhungkaw dan bu a ni a, Pathian thusawi nung reng chu a ni,” a ti a ni. Khawvel Sunday School hmang mektute hian Pathian thu kan zir thin hi thu nung, awm reng leh duhawm ber chu a ni e. “Anni chu thutakin tithianghlim rawh, I thu chu thutak a ni si a,” (Joh 3:17)

.......................