Mizoram Baptist Kohhran Missionary, Pu C.L. Remruata (S/o Rev C. Ngurhnema) Kolkata Regional Office-a thawk mek chuan May 23, 2021 (Pathianni) chawhnu dar 1:50 khan RN Tagore Hospital, Kolkata-ah Covid-19 avangin a boral a. A ruang hi May ni 24 (thawhtan) tlai dar 4:20 ah Kolkata atangin, Ambulance- a rawn phurh a ni a, West Bengal Field-a thawktu te, Rev. H. Lalengmawia, Field Director leh Missionary dang pathum in Birpara atangin an rawn belh ve leh ang. Ruahman anga tluang taka an rawn kal thei a nih chuan May ni 26 (Nilai Ni) chawhma dar 10 atanga 12 inkar ah Aizawl rawn lut tura beisei an ni a. YMA Hall, Zotlang Aizawlah vuina inkhawm hmangin, Rev. Dr. R. Zolawma, Bialtu Pastor, Zotlang Pastor Bial, Aizawl in a vuiliam ang.

A CHANCHIN TLANGPUI

 Pu C.L. Remruata hi Rev. C. Ngurhnema leh Pi H. Lalzari te fa upa ber niin, March ni 30, 1974-ah Pangzawl khuaah a lo piang a. Unau pianpui pathum neiin, hetiang hi an unau indawt dan chu a ni: C.L. Remruata H/o Laltluangliani, Rev. PC. Zosangliana H/o Debbie Zirthanpuii, Laltanpuii Pachuau W/o K. Zomuanpuia, leh Helen C. Zothanpuii w/o Jacob T. Vanlawma te an ni. January ni 8, 1988 ah BCM Khuanghlum, Pangzawl ah a pa, Rev. C. Ngurhnema’n ringtu Baptisma a chantir a ni.

Zirna lamah B.A a zo va, Diphu College, Karbi Anglong, Assam atangin a zo a ni. Kum 2003 ah Laltluangliani, Venghlui nen BCM, Chanmari Aizawl ah kohhran dan puitling- in an innei a ni. Hengte hi a fate an ni.1) Catherine Lalbeiseii, 2) Dennis Lalngaihawma, 3)Mercy Lalhriatpuii, 4) Gracy Vanlalroluahpuii, 5) Joicy Vanlalpeki

Pu C.L. Remruata hian Pathian kohna chhanga Missionary-a a kal hma hian an lawina kohhran BCM, Venghlui, Aizawl ah a theih ang tawka inhmang in Venghlui Unit TKP ah President, Vice President leh Secretary nihna te a chelh bak ah, Tualchhung Mission Committee Member ni in Mission lamah pawh a theih ang tawkin a inhmang thin a. Tualchhung Kohhran Zaipawl-ah Conductor ni in, hun engmawchen zaipawl a enkawl bawk a ni. Tualchhung Kohhran Zaipawla a inhman mai bakah, Aizawl Area Baptist Choir term hmasa ber leh The Leprosy Mission Choir ah te member a ni a, Republic Pastor Bial Zaipawl leh Aizawl East Pastor Bial Zaipawl ah te Conductor a lo ni tawh bawk a ni. Tin, a pa rawngbawlna avanga Diphu, Assam-a an awm lai in Diphu Baptist Church ah Conductor niin Zaipawl a enkawl thin bawk.

Pu C.L. Remruata hian rawngbawla a chhuah hma in Thingpuife (Dugar) Company ah hna thawkin Mizoram-a mawhphurtu ber Area Sales’ Officer niin, an chhungkua pawh an inbengbel chho ve mek a. Chung a hna neih ve te chu kal san in,  Pathian kohna chhangin Missionary hna thawk tura inpe in Kum 2011 khan lak a ni ta a ni. AICS ah Missionary Training (Orientation Course) thla thum chhung a neih hnu in, April ni 1, 2012 khan Rev. F. Sangvela, Aizawl E/S chuan BCM Central Church Aizawl-ah a nupui fanau te nen Jharkhand Mission Field-a kal turin a tirchhuak a. Jharkhand Field-a an awm chhung hian Field Headquarters Dumka-ah 2015 thleng a awm hnu-ah, 2015 ah Kurumtand-ah insawn in, kum 2021 January thleng an thawk a ni. Jharkhand Field-a an awm chhung hian an chhungkua pawh hian nuam an tiin an rawngbawlna hmun a mite pawh in an insawn hi an ui hle a ni.

A Rawngbawlna Chanchin Ngaihnawm tak Pu C.L. Remruata’n rawngbawla a hun tam zawk alo hmanna Jharkhand Field Director nilai mek, Rev. K. Lalhnehliana’n a ziak hi ama ziak ang ang hian kan han dah ang e.

Pu Marema min kalsan hian rilru a tihrehawm hle a, rilruah engmah dang a lut thei lo a ni ber e. Amah nena Jharkhand-a rawng kan bawlhona hi chiangkuang zawka kan inhriat chianna a ni a, kum 2 dawn emaw chauh kan thawkho a, mahse lungrual tak leh induhsak takin kan thawk dun a, engkim min share a, a lawmna leh rilru hahna thlengin, rilru-ah a thar reng dawn a nih hi. ITU-a a luh hma ni May ni 11 kha kan inbiak tawp ni a lo ni ta reng mai. A hla ngaihthlak hnuhnung ber pawh hemi kan inbiak ni a ka thawn, amah in ka damloh chauh êm êm lai April ni 15 a min thlamuan tura min thawn, amah thlamuan nan a ka thawn let ve tak ‘God on the Mountain’ tih hla hi a ni ngei ang. A nunah hian zir tur leh sawi tur a tam hle a, rilru leh mitthla-ah a reh tawh ngai lo vang, chung chu tlem a zawng kan thai lang teh ang.

1. Hmangaihna ngah tak a ni. A nun ti hmuhnawmtu, ka zir ruk fo thin leh ka tluk loh êm êm na chu midang chunga hmangaihna a ngah hi a ni. Kan rawngbawlna hnam (Santal) te hi a hmangaihin an thatna tur hi a duh tak tak a ni. A lawmman (hlawh) a tam lo va, chuti chung chuan ui nei hauh lovin kohhran mi mamawhtute a tanpui thin.

   Nikum lockdown chhungte khan Alu te,Buhfai te leh an thil neih ang zawngte mi harsate a sem thin a. Chubakah, thlasikah khua a vawt hle a, mi tam tak an thi hial thin a, chung mite tan chuan tanpuina zawnsakin mutbu lum (blanket) te a leisak thin a, ama thuamhnaw te pawh a pe fo thin bawk.

   Vawi khat chu kan native worker pakhatin a fa a chan a, vui turin kan kal a, kan thawktu chuan phone tê, tha lo tak, rubber-a tawn, signal man tha thei meuh tawhlo hi a hmang a, Pu Marema’n a hmuh chuan ama hmanlai chu phal takin a pe nghal a, a tukah a dang kan lei dun a, a duh ang hmulo mah ila a hlim em em a ni. A neih ang ang a ui lova, midangte tan a inpe a, a nun a hausa hle a ni. Chuvang chu a ni ang, kan mite hian an uiin an ngai êm êm a, a pem dawn pawh khan tap chungin an thlah a ni.

2. Engkim fel taka vawng thlap mi a ni.In leh a vel, in chhungkhur felfai leh uluk taka enkawl a duh thin a, mi kherkhiap erawh a ni lo. Engkim mai kha ziakin a vawng thlap a, ‘note bu te’ a ak reng thin a, tah chuan thil a chhinchhiah Chhungkaw pawisa hmanna thlengin account vawngin a ziak thlap zel a, diary uluk takin a vawng thin bawk. A kohhran enkawlte pawh record tha taka vawng turin a zirtir a, a vawntir vek thin. Field a chhuahsan dawn khan ama bial enkawl kohhrante chanchin (records) chipchiar tak amah thlaktu tan pendrive-ah dahin a hnutchhiah thlap a ni.

3. Kohhran enkawlna kawngah a puitling hle a, kohhran a hmangaih a, kohhran thatna leh zahawmna tur a nih dawn chuan engmah thawh hreh nei lovin hmahruiatu-ah a tang fo Thilpek lamah thahnem a ngai in a tang nasa em em thin a, chulam hawi zirtirna a pe nasa a, nasa takin hmasawnna pawh kan hmu a ni.

4. Patling tak a ni.Chhungkua a ngaihsak hle a, mumal tak leh awmze nei takin a enkawl a, a nupui fanaute tan pa a tlingin amahah an innghat hle a, an thlamuanpui in an ngaina êm êm a ni. Chhung inkhawm a ngai pawimawh a, an chhungkuain an zai ziah Zai a ngaina hle a, ‘personal devotion’ a ngai pawimawh êm êm bawk a ni.

5. Mi taima tak, thil tizung zung mi leh hlim leh phur taka hnathawk thin a ni a, thil tih tur khek (pending) ngai lo mi leh tih tur awm chu bawhzui nghal duh thin a ni a. Thil duh uluk tak leh tha thei ang bera tih duh mi a ni bawk. A kuta tih tur awmah a rintlak a, thil reng rengah a ngaihna a hre êm êm zel a ni.

6. Mi inngaitlawm, inthlahrung leh mi pawisawi hlau tak mi a ni a, a bula awm a hahdam êm êm a ni. A hminga hotu kan nih ve na angah kan thu a ngaichang thiam hle a, a chang chuan a hrehawm zawk hial Rawngbawlna a nih chuan thawh hreh a nei lova, mi inpe tak a ni a. Midang tanpui nuam a ti a, mahse a thiltih that erawh sawilang ngai lo mi a ni thung.

7. Santal tawng a thiam hle a, thiam turin nasa takin a bei a, Santal tawnga kan lehkhabu Sunday School Zirlaibu, Beirual thuzir, , literature lam reng reng letlingtu a ni a, Santal tawng (Font) hi chhut a har êm êm a, amahin Computer-ah a chhu (type) leh vek thin a. Field a chhuahsan khan heti lam tithei kan awm meuh loh avangin kan ui hle mai a, “A theih phawt chuan Kolkata atangin ka lo ti zel dawn nia,” tiin min thlamuan a, mahse a awm ta si lo va, kan va ui tak em!

8. Mi vengva leh leadership quality nei tha tak a ni. Thenrual kawm thiam leh mi polite tak a ni a, mi ngainat a hlawh êm êm a ni. Hetia min awmlohsan chungchangah pawh hian Jharkhand-a rawngbawlna avanga awm kohhran (denomination) hrang hrangte hian thinlung tak takin an ui a, an sûn tak meuh a ni. Jharkhand-ah hian a ni hi Baptist kohhran ta chauh a lo ni lo tih a chiang hle awm

9. Rawngbawlna kawngah retheihna a paltlang nasa hle a, mahse a rin Pathian hnen ata van mana a dawng leh thin. A fate tet laiin a thawhna khuaah sikul a awm loh avangin a nupui fanau te harsa takin, in luahin Dumka-ah an awm a, Santal in (lei In) luahin amahin a thawhna hmunah a parawl a. A fate an lo liana, senso tlemna tur Birpara-ah Mission Sikulah a dah a, a fate nen an awm hrang leh a ni. Tunah Kolkata-ah an awmho ve thei dawn chauh tihin a kalsan ve leh ta si a, an va lainat awm tak em! Chhungkuaa awmho an thlakhlelh ve tawh nen. Tunah chuan a thamral ta!

10. Pu Marema hian Pathian a hmangaih hlein a lang. Pathian thu a tuipui hle a, Pathian hmangaihna leh khawngaihna chu a thu tuipui leh ka hriat ve chinah vawi tam tak a tahpui thin. Pathianin a hmangaihzia leh a khawngihzia thu hi a sawi uar thin hle a Tunah chuan hmangaihtu kiangah thlamuang takin a hahchawl ta!

Sawi tur a va tam em, sawi vek sen a ni si lo! Ni 9.5.2012 ah Jharkhand-ah thawk tanin thil tam tak min hnutchhiah a, a va hlu in, thu a va sawi rei dawn em! Ui tak chungin Jharkhand Field-a a rawngbawlpui ten Kolkata lamah  ni 12.1.2021 khan kan thlahliam kha a ni a, amah avanga Pathian malsawmna tam tak dawngtu Jharkhand Field-a ringtu te leh thawktu te hi khawhar leh lungngaiin kan ngui ruai a ni. Khawhar takin min kalsan mah se, Angel vên khawpuiah chuan Arsi angin kumkhaw tlaitluanin a eng tawh dawn si. Chutah chuan kan tawk leh ngei ang.”

----------------------------------

Jharkhand Field Director nilai mek in a sawi ang hian, Pu CL Remruata hi pa zamtha leh mawngzang tak ni in, rawngbawlna-a mi inpe zo tak a ni a. Mamawhna avang leh thawktu indaihlohna avang in Kolkata Regional Office ah awm tura tih a ni a, Covid-19 avang in an kal hun tur tak ah pawh kal thei lovin an awm a. Hrileng thawh khatna boruak in tlema ziaawm lam a han pan hret khan, January ni 12, 2021-ah Kolkata Regional Office-a thawk tur in Jharkhand Field an chhuahsan a. Kolkatta an thlen thlak hnu hian rei tak pawh an awm hma in April ni 24-ah, a nupui hian Covid symptom khawsik a nei tan a, a tukah a fanu khua a sik ve leh a, ani hi April ni 26-ah khawsik leh symptom dang te nei tan in, a ziaawm mai loh avangin May ni 1-ah R N Tagore Hospital Kolkata ah admit ani ta ani.

A natna hian that lam aiin zual lam a pan zela avangin ITU-ah kar khat vel a awm a, chutah pawh chuan hmasawn lam ai in hniam lam a pan hret hret a, May ni18 ah ICU ah ventilator hmanga enkawl a ni a, ICU-a dah a nih hnu lawk hian ‘Cardiac Arrest’ a nei tih hriat a ni a, CPR hmanga chhan (revive) leh niin, tlemin hma a rawn sawn ve leh hret hret a, tawngtaina nen beiseina sang tak kan neih laiin, ni 22.05.2021 ah a kal in hna a thawk lo (kidney failure) tih hriat a ni leh a, dialysis te tih a nih hnu ah, doctor ten theih tawp an chhuah laiin ni 23.05.2021 dar 1:50 PM ah chatuan ram min lo pan san ta a ni.

Pu C.L.Remruata ruang hi May ni 24 (thawhtan) tlai dar 5:10 ah Kolkata atangin, Ambulance- a rawn phurh a ni a, West Bengal Field-a thawktu te, Rev. H. Lalengmawia, Field Director leh Missionary dang pathum in Birpara atangin an rawn belh ve leh ang. Ruahman anga tluang taka an rawn kal thei a nih chuan May ni 26 (Nilai Ni) chawhma dar 10 atanga 12 inkar ah Aizawl rawn lut tura beisei an ni a. YMA Hall, Zotlang Aizawl-ah vuina inkhawm neih a ni ang a, Rev. Dr. R. Zolawma, Bialtu Pastor, Zotlang Pastor Bial, Aizawl in a vuiliam ang.

Lawmthu

Pu C.L. Remruata damloh chungchang ah hian a thawhpui leh hotu te, Kolkata Mizo Nurse RN Tagore Hospital-a thawkte, Calcutta Mizo Christian Service-a hotu te leh member te, Kolkatta- a Mizoram Sawrkar hotu te leh Mizo awm amah buaipuitu te, a thih hnu-a a ruang phurh dan tur leh thil tul zawng zawng buaipuitu te leh West Bengal Field atanga a ruang rawn zuitu a rawngbawlpui missionary te chung ah Pu C.L. Remruata chhungte leh BCM Puipa ten lawmthu kan sawi tak meuh meuh a. Tin, hmun hrang hranga a chanchin hria-a alo dam leh ngei theih nana thahnemngai taka tawngtaisaktu te leh tawngtai mai piah lama sum leh paia tanpuitu te zawng zawng chung ah lawmthu kan sawi tak zet zet a ni.

ANGEL TEN AN AWMPUI

Thihna hlim kawrah thlamuangin a țhu, Lalpa hnenah hruai tawh turin An nghak Angel rualte'n Tumah rengin an hmu lo, Laikhum kianga Angel chu, Leihringnun herliam hun chuan An hruai ang Lal hnenah Thlamuanin a awm, zinkawng tawp a zawh laiin Chhandamtu hmel duhawm hmu turin. An hruai dawn Angel rualte’n Lawmin an hruai dawn, Lawmman hlu chu chang turin Lungngaih țah a bo tawh ang, An awmpui angel rualte’n Lungkham reng nei lovin, Ram lo thleng tur chu a nghak Vanmi te nen intawhkhawm hun, Nghakhlel takin a thlir Lenrual duhte hnenah chuan, Enru en teh u Nghakhlelin min thlir angelte’n, Ka kal a hun tiin, Thlamuanin a awm, zinkawng tawp a zawh laiin Chhandamtu hmel duhawm hmu turin, An hruai dawn Angel rualte’n Lawmin an hruai dawn, Lawmman hlu chu chang turin Lungngaih țah a bo tawh ang, An awmpui angel rualte’n Thihna hlimkawr i zawh lain, Mangangin i rum thin maw Hlauh tur reng i nei love, Malin i awm lo’ng, Thlamuangin awm la, zinkawng tawp i zawh laiin Chhandamtu hmel duhawm hmu turin, An hruai dawn che angelte’n Hlimin an nghak che, Lawmman hlu chu chang turin Lungngaih țah a bo tawh ang, Thlamuantu i nei tawh si Lungngaih țah a bo tawh ang, Thlamuantu i nei tawh si. (He hla  hi Pu C.L. Remruata khan a duh em em a, a hma atang tawhin a fate hnenah “He hla hi zir u la, ka thih hunah min thlah nan in rawn sa dawn nia”,  tiin a sawi fo thin a ni.) Download PDF : BCM Missionary CL Remruata chanchin