Mizo tawnga Pathian thu zirn, Jubilee Bible School, Serkawn-a din tur atan Dean/Principal ni turin Rev. H. Lalthlamuana chu ruat thar a nih angin a hna hi May 2014 atangin a rawn zawmin Office a luah tan tan. Pu Muanate hi an chhungkuain Ramzotlanga an Quarters tura ruat(JBS Building sak mek bul)ah an khawsa mek a ni.

Sawi tawh thin ang khan Jubilee Bible School hi kumin Theological College panngai-a zir thei lo ten Mizotawnga Pathian thu an zir theih nana buatsaih leh din a ni a. Kumin 2014 August thla hian Batch khatna tan hman tum niin hma lak chhoh mek a ni. [caption id="attachment_4531" align="alignright" width="225"] JBS Foundation Stone laid by Rev.F.Sangvela,President, BCM[/caption]

Mizo tawnga Pathian Thu zirna school din tura rawtna chu Kum 2011 Assembly-ah Lunglei North ABC leh Aizawl East ABC atanga rawtna lo lut chu pawmin Theological Education Board (TEB)-in a tihpuitlin dan tur kawng lo zawngin ruahmanna lo siam sela, Central Committee kal tlangin Executive Committee-ah lo thlen rawh se tiin a rel a.

Theological Education Board chuan October 27, 2011-ah Sap Upa leh Pu Buanga Hall-ah Lunglei khawpui chhunga Kohhran hruaitute ko khawmin ruahmanna chi hrang hrang siamin sawihona neih a ni. He sawihona eng atang hian rawtna mumal tak siamin  a write-up nen Central leh Executive Committee-kal tlangin 2012 Assembly-ah theh luh a ni a, Assembly chuan he rawtna hi pawmin, Theological Education Board -in a tul angin hma la zui zel rawh se tiin a rel a. Theological Education Board chuan ruahmanna awmsa chu bawhzuiin hma lak dan tur a ruahman  a, 2013 Assembly-ah  thlen leh a ni a, ruahmanna hi pawm a ni a, 2014-ah hawn ni se tih a ni ta a ni.

1. A hming sak chhan:

A hma lama sawi tawh angin, JBS kan lo neih tawh kha Mizoram Kohhrana thil thleng pawimawh tak Gospel Golden Jubilee lawmna hriat rengna atana din a nih vang te, hun hmasa lama rawngbawltu chherchhuahna tangkai tak a lo nih thin avang te, hruaitu hmasate hmalakna pawimawh tak a nih vang te leh khatih laia an hmathlir (vision) kha tunlai mamawhna mila chhunzawm leh mai tur kan nih avang te-in a hming a bo hlen loh nan he school din thar tur hming atan hian ‘Jubilee Bible School’ tih hi hman leh ni rawhse tia rawt a ni a, Assembly 2012-in a pawm a ni.

2. A enkawltu leh thawktu turte: 1) Theological Education Board hnuaiah a awm ang a, a hmuna  enkawl turin management Committee (School awmna hmun  Serkawn-ah) a awm ang. 2) Dean of Jubilee Bible School a awm ang a, chu chu a khaipaber a ni ang. 3) Regular zirtirtu 2 an awm ang a, qualification chu B.D chin chunglam a ni. 4) A tul dana zirin part-time zirtirtu atan mi thiam rawih thin a ni ang 5) Thawktu dang pawh a tul dana la ngaihtuah chawp zel a ni ang.  3. Zir tur (Course) te: Heng course-te hi zirtir tura thlan a ni: 1) Certificate in Biblical Studies 2) Missionary Training & Refresher Course. 3) Kohhran Upa Orientation & Refresher Course. 4) Discipleship Training Course. 5) Christian Education Training Course.

Zir tura thlan course  zawng zawng hi vawi khatah tihnghal (implement) vek theih a nih loh avangin,Certificate in Biblical Studies (CBS) Course hian bul tan phawt a ni ang. He course hi thla 4 chhung zir a ni ang a, riahchilh (residential)-a zir tur a ni ang. He Course-ah hian heng subject-te hi a awm ang-

1) Biblical Studies         2) Hermeneutics  3) Theology,  4) History of Christianity, 5) History of Christian Mission     6) ChristianMinistry      7) Major Religions of India 8) Spiritual Formation, Personal Development & Contextual Realities 4. Skill Training:

Mahni intodelhna kawnga sum pai lak luh theihna tur lam- Cement work, plumbing, carpentry, tailoring, shoe repair, etc. te zirtir tel tum a ni ang a, hemi kawngah hian R & D nen thawh dun dan kawng zawn a ni ang.

5.Zir thei chin turte: CBS Course zir thei tur chin chu hengte hi an ni ang- 1) Kohhran Upa, Rawngbawltu leh Tualchhung Kohhrana Fellowship Organisation Hruaitute. 2) Evangelistic Team Speaker leh Team member, regular-a thawk mekte. 3)  Thalai- Class VIII passed chinte 4)  Class VIII hnuai lam, Mizo tawng ziak leh chhiara harsatna nei lo, Kristian nuna        mi puitling chin, rawng-bawlna atana inbuatsaih duhte. 5)  Hmeichhia leh mipa tana zirna (co-education) a ni ang         6. Mess fee & Stipend:

He school-a zir tur hian nula/tlangval leh pa/nu, chhungkaw eibel te pwh an la rawn kal thin turah beisei a ni a. Mahni in lam hna thulhin hun rei fu an rawn awm dawn avangin an ei leh in leh pocket money tal pek loh chuan an chhungkaw tan an hautak dawn a. Chuvangin zirlaite hnenah mess fee leh stipend pek vek an ni ang. Thla tina an dawn tur rate erawh chu school tan hunah tihchian a la ni ang. 

7. Hma lakna kal mek: Kawng hrang hranga hma lak dan chu hetiang hi a ni- 7:1. Textbook buatsaih:

Textbook ziak turin subject hrang hranga zirbingna nei, mi expert-te sawm an ni a, tunah hian lak khawm tan mek a ni. A chunga kan sawi tak Subject hrang hrang te hi a bu hran theuhva siam tum a ni.

7:2. Classroom leh Office:

Bul tanna atan leh building hran neih hmaa luah atan Hqrs. Office Building Block II chhawng chung ber chu Classroom leh office atan Property Committee-in min  saksak a, peih fel a ni tawh a, October 2014 atang khan hetah hian JBS Dean leh Staff pawhin office an kalpui (run) tawh a ni.

7:3. Building Construction:

Kum 2013 Assembly chuan lehlang (non-residential)-a kalpui phawt turin a rel na a, a tak taka han kalpui dawn chuan Lunglei khawpuia mi chauhin an zir dawn si lo va, khawpui pawn lam atanga thla 4 chhung mikhual ni chunga zir tur chuan zir tur inhmuh a beiseiawm loh bakah harsatna kawng hrang hrang a awm thei dawn a. Chuvangin, riahchilh (residential)-a zir theih dan tur ngaihtuah a ni leh ta a. Property Committee chuan Serkawn  Saptui kam, Melte kawng phei chung,  2007 kuma BCM-in Pu Ropianga ram a lei chu JBS tan a pe (allot) a. Lalpa tlang min ruatsak pawh a ni mahna! January 3, 2014 atangin hemi hmunah hian building sak hna tan a ni a, He building hi Hostel, choka leh Dining hall, Classroom leh Office te awm vekna tur a ni a, a dung 40ft, avang 36ft, chhawng 3-a sak phawt tum a ni. Tunah rih chuan mi 20 vel awmna tur Hostel chin chauh tin zawn a ni a, heta tang hian Hqrs. Office bula Building-ah class leh office chu eng emaw chen kan kalpui dawn a ni. Hun kal zelah kan mamawh ang zelin Building hi sak belh leh tihchangtlun zel a ni ang.

11. Zir tan hun tur:

Hostel sak kal mek a nih avang leh textbook te pawh ziak mek a la nih avangin kumin (2014) chhungin session khat- i.e. August – November kan zawh theih chuan, bul tan kum a ni bawk a, tha thawkhat turah ngaih a ni. Kum 2015 atang chuan kum bul atanga tanin, Course dangte pawh kan tan thei turah beisei a ni.

Pathian khawngaihna leh kohhranhote’n tawngtaina, tha leh suma tan kan lakhona avang te, thawktute thawhrimna avangte-in kum 2000 hnu lamah AICS, HATIM leh Lawngtlai Hospital te hlawhtling takin kan sual chhuak tawh a. (A vawrtawp kan thleng tawh tihna chu a ni lo- thawh tur tam tak hengah hian a la awm a, kan thawk zel ang) Heng project huphurhawm tak tak kan pal tlang tawhna atang hian Pathian rinawmna leh ‘ A lama rilru dik tak putute chunga a chakzia tilang tura khawvel ram tina Lalpa mit a len vel ruai ruaizia’ hi a chiang a. Jubilee Bible School din tur pawh hian tawngtaina, tha leh sum nen tang tlang leh ila, a chakzia leh a rinawmna kan hmu leh ngei ang.  Amaherawhchu Ai khaw bei tur ang lekah inngai lo ila: tawngtaina, tha leh sum nen i bei tlang leh ila Mizo tawnga Pathian Thu zirna tha tak kan nei leh ngei ang

_________________