May 5, 2016 hi Mizoram Baptist Kohhran Nipawimawh (Special Day) “Isua Vân Lâwn Ni” a ni a. He Ni hi Pathianni a nih loh avangin Tualchhung Kohhran ten tul leh tha an tih angin Programme an siam thin a. Kuminah pawh Kohhran thenkhat chuan zan lamah Inkhawm an buatsaih dawn a ni. Inkhawm Progamme siam thei Kohhrante chuan Headquarters atanga thupui thlan sa “ …anni chu a then a, vâna hruai chhohvin a awm ta a” ( Luka 24:51) tih thupuia hmangin thuchah an ngaihtla ang.
Kum 2008 Assembly-in Isua Van Lawn Ni hi BCM hian hmang tawh ila ti-a a rêl angin hemi kum atang hian Isua Vân Lâwn Ni hi kan hmang tan a. Hemi ni hi kan Lal Isua a thi a, a thawhleh hnuin a zirtîrte hnênah a inlâr a, chumi hnu chuan an hmuh lai rengin vânah hruai chhohvin a awm a, chhûmin an hmuh phâk lohvah a hruai bo ta a, chumi hriatrengna atân leh Lal Isua vâna a lâwn hi amah ngei chu keini min hruai tûrin vân atangin he leiah hian a lo kal leh dâwn a ni tih kan hriat thar leh thin nan he ni hi hmangin BCM Ni pawimawh zing-ah telh a lo ni ta a ni.
