Mizoram Baptist Kohhran chuan India ram leh Khawvel pum huapa Muslim hel pawl ISIS tihduhdah tuarte pualin tunkar Inrinni, May 16, 2015 zan-ah Biak in tinah tawngtai rual programme a siam. He hun hi Kohhran tinin urhsun leh tihtakzeta hmang turin Headquarters chuan Kohhran tinte a chah a ni.
BCM Administrative Committee April 17, 2015-a neih chuan India ram leh ISIS hnuaia Kristian tihduhdah tuartute tana tawngtaina hi neih ni se, a hun atan Kristian chhungkaw chawlhkar May 16, 2015 (Inrinni) zan tawngtai inkhawm hun hi hman ni se tiin a rel a. Hetiang hian Tawngngtai kaihhruaina siam a ni.
INDIA RAM LEH ISIS HNUAIA KRISTIAN TIHDUHDAH TUARTUTE TANA TAWNGTAINA.
1. India ram leh India ram chhunga Kristian tuartute tan:
India ram hmun hrang hrangah Kristian tihduhdahna hi tun hma atang tawh khan a thleng deuh reng a. Tun hnaiah hian State thenkhatah Kristiante tuarna hi a lo hluar chho leh ta deuhin, sakhaw zalenna palzut tuma hmalakna a lo lian chholeh mek ta niin a lang. Chuvangin Kohhranhote nasa lehzuala kan tawngtai a ngai a ni.
1. India ram roreltuten dik tak leh fel taka ro an rel theih nan leh ram leh hnam hmangaihna tak tak an neih theih nan.
2. India ram hi secular state a nih ang taka sakhaw zalenna tha tak a awm theih nan leh sakhuana avanga inhuatna leh inhmelmakna a bo theih nan.
3. India ram chhung state hrang hrangte zingah inpumkhatna leh in unauna tha tak a awm theih nan.
4. India ram hmun hrang hranga Kristian tihduhdahna tuartute tan, Krista avanga huaisen taka tihduhdahna an hmachhawn theih nan leh chhelna an neih theih nan.
5. Tihduhdahna avanga in leh lo chante leh nunna chan chhungkuaten Pathian thlamuanna an lo neih a, chenna tur in leh lo an neihleh theih nan.
6. Kristiante tuarna hi malsawma a lo awm a, a tiduhdahtuten Lal Isua an lo hmuhna hmanrua a nih theih nan thahnemngai takin i tawngtai ang u.
2. ISIS hnuaia Kristian tihduhdah tuartute tan:
Tunlaiin khawvelah a bik takin Muslim rorelna hnuaiah Kristiante tuarna rapthlak pui pui a thleng nasa hle. ISIS hote chuan Kristiante chu hmelma number one-ah dahin rawng tak takin an sawisain an tihlum thin a ni tih kan hre theuh awm e. ISIS ho chet dan hi tunlai hian a lar hle a, an dinhmun chiang zawka kan hriat theih nan an chanchin tlem lo tarlang ila.
I) ISIS awmzia:
ISIS lam sei chu Islamic State Irag and Syria tihna a ni a. Islamic sakhaw betu, an sakhua atchilh bur mai, ralthuam nena an sakhaw hminga pawl pakhata insiam, rawng taka sakhaw dang betute, a bik takin Kristiante chunga rawng taka che thintute an ni. Muslim ram pali Syria, Irag, Libya leh Nigeria te hi an thuhnuaiah an dah mek a. Egypt, Middle East ram thenkhat, North West Africa leh South East Asia ram thenkhatahte anmahni zawmtu an awm bawk.
2) An inpuan chhuah dan:
June 29, 2014 khan he pawl hian khawvel pumpui Muslim rama sakhuana thil, Politics leh Sipai thuneihna neituah an inpuang chhuak a ni.
3) Khawvelin a ngaih dan:
United Nations chuan mihring dikna(human rights) zah lo taka bawhchhetu-ah a ngai a. U.N bakah Europian Union, United Kingdom, United States, Australia, Canada, Indonesia, Malaysia, Turkey, Saudi Arabia, The United Arab Emirates, Syria, Egypt, India leh Russia te chuan Terrorist pawl pakhatah an ngai a. Khawvel ram hrang hrangin he pawl nena indo hi an puang tawh a ni.
4) An hmalak dan:
a) ISIS hian Jan 24, 2015 khan Kristian mipa 20 leh hmeichhia naupang kum 14 mi an man a, nasa takin an sawisa a, an chanchin hriat zuina a awm loh avangin an that zui veka ngaih a ni.
b) Febuary 6, 2015 khan ISIS ho hian Kristian puitling, mipa naupang, hmeichhe naupang, pitar leh putar thlengin nasa taka sawisain thenkhat an pawngsual a, thenkhat a nungchungin an phum a, thenkhat an lu an tan sak a, thenkhat krawsah an khengbet bawk tih United Nations Office-ah report dawn a ni.
c) Tunah hian ISIS chuan tupawh Muslim rama hnam tenau zawkte chu Muslim an nih duh loh chuan thah mang vek an tum thu an puang a.A bik takin Kristiante chungah khawngaihna leh zahngaihna lan tir lek lovin an che mek a ni.
Heng kan han tarlan bak pawh hi an chet dan leh an thiltih rawng tak tak khawvel hriata an la puanzar loh tam tak pawh a la awm e.
Tawngtai dan tur:
1. ISIS ho hian an thiltih leh an chet dan hi a dik lo a ni tih an lo hriat chhuah a an sim theih nan.
2. Khawvel ram hrang hrangten ISIS ho an dodalna hi a lo hlawhtlin theih nan.
3. ISIS hnuaia tihduhdah tuartute, a bik takin kan Kristian puite tan Pathian thlamuanna leh awmpuina i dil sak ila, chhel tak leh rinawm taka an tuar theih nan.
4. Khawvel ram hang hranga Kristiante hian, kan unaute tihduhdahna rapthlak tak tuar mekte hi Pathian zahngaihna lalthutphah hmaah inlungrual taka kan dinpui theih nan
5. Martar chhungkuaten Pathian thlamuanna an lo chan a, thlarau lam malsawmna thar an dawn zel theih nan.
6. Kristiante tawrhna hian rah tha a chhuah theih nan leh anmahni tiduhdahtute hian Lal Isua an lo hmuhphahna a nih theih nan.
7. Kan unaute tuarna leh thisen hi Muslim hote tan Missionary ropui tak a lo nih a, Muslim ramah Pathian ram a lo thlen theih nan
Heng tawngtai thupui kan tarlan bakte pawh hi thupui thawh belh tur hriatte chuan thawh belh ni se.
