Mizoram TKP Rorêlna 2016 thu passed ûmzuiin, 'Human Trafficking chungchâng leh Ruihhlo that lohzia Inzirtîrna' (Education on Human Trafficking and Drug Abuse) chu September thla atng hian neih tan a ni dâwn ta. MTKP Organiser, Rev. Lianchhunga Khiangte chuan Mizoram hi ruihhlo tawlhrûkna (drug trafficking) lamlian a ni a, mihringa sumdâwnna (human trafficking) hluarna ramah pawh a chang mêk a ni.TKP huang mai ni lo, Mizoram pum pui tuam chhuaka hmalâk tûla hriat a nih avângin Mizoram Sawrkâr nên tangtlânga beih a ni ang tiin, hetiang hian MTKP Hmalâkna tûr kawng nga (5) ruahman a nih thu a sawi:-
1) Campaign Kick Off & Talk Show:
September 29, 2016 (Ningani)-ah Campaign against Human Trafficking and Drug Abuse Kick Off, Ignite Studio, Aizâwlah neih a ni ang a. Human Trafficking chungchânga Mizoram mipuite kaihhruaina tha pe thei tûr talk show changkâng tak neih chhunzawmin, mipuite thlîr phâkin TV kaltlanga thehdarh a ni ang.
2) Inter-Middle School Television Quiz Show:
October 11-15, 2016 hian Lunglei khawpui chhûnga Middle School-te tân Quiz buatsaihin TV-ah live telecast-a pêk chhuah a ni ang a. Programme kârah Human Trafficking chungchâng leh Ruihhlo that lohzia inzirtîrna thu leh hla puanzâr reng a ni ang.
3) Training of Trainers (ToT):
November 25, 2016 (Zirtâwpni) hian Lawngtlai khawpuiah Human Trafficking chungchâng leh Ruihhlo that lohzia zirtîr chhâwngtu tûrte buatsaihin Training of Trainers (ToT) buatsaih a ni ang a. Tel tûrin khawpui chhûng Middle School tin aiawh zirtîrtute leh TKP hruaitute sâwm an ni ang.
4) Mini Clip Videos:
Video clip chi hnih, (i) animation leh (ii) mi lâr hming thate inlanna siam a ni ang a. Advertisement anga TV-a chhuah thin bâkah social media-a thehdarh theih tûra buatsaih a ni ang.
5) Poster Campaign:
Human Trafficking leh Ruihhlo chungchânga mipuite zirtîrna poster buatsaih a ni ang a, langsâr tham leh hmuhnuam takin tlêmtê siam a ni ang.
Hêng bâkah hian, TKP member-te zînga Human Trafficking chungchâng leh Ruihhlo that lohzia inzirtîrna atân Thalai Êntu Special Issue buatsaih a ni dâwn a. Thalai Êntu chhuak pângngaiah section dang, Human Trafficking leh Ruihhlo chungchâng ziakna belh a ni ang. Thu ziak tûr hian mi thiam bîkte sâwm an ni bawk ang. Unit leh Bial lam hriat tûr leh tih tûr awm apiang inhriattîr zêl a ni ang.
