India Finance Bill 2017-in Dt 1/4/2017 atanga hman tan tûrin ni khatah Account pakhata pawisa fai dawn theih zât chu Rs 1,99,999/-ah a fixed a, hemi aia tam (i.e. Rs 2,00,000/- aia tam) pawisa fai ni khatah account pakhata dawn a nih chuan penalty chawi tûr a ni. Hetiang hi a nih avângin Kohhranten thawhlâwm kan thehluh dânah pawisa fai ni lo, cashless (e.g. cheque/draft/bank transfer) hmanga sum kan thehluh a ngai a ni.
Kohhran Thawhlâwm hi Tualchhûng kuta a awm lai hian a hlâwm a tê ber a, Biala a luh chuan a lo lian lehzual a, Office-a thlen meuh chuan hlâwm lian tak a lo ni tawh thîn a. Cash Deposit theih chin siam a nih tâk avângin Offfice a thlen chuan Cashless-a siam a harsa tawh êm êm a ni. Chuvângin hetiang hian Thawhlâwm Thehluh dân tûr ruahmanna siam a ni:-
1. Tualchhûng hian account neih ni se, chutah chuan pawisa fai Rs 2,00,000/- tling lova ni khata thehluh ni se. Tichuan pawisa fai chu pawisa fai ni lo (cashless)-ah siam theih a lo ni ang. Thawhlâwm zawng zawng thehluh zawh a nih hnuah cheque/draft/transfer-a Bial Treasurer hnêna thehluh ni se.
2. Thawhlâwm Pawisa fai cashless (cheque/draft/transfer)-a siam a nih theih nân, Tualchhûng Kohhran Committee-in rem a tih chuan, mi rinawmte account hman hawhsakin hun rei lo zâwk chhûngin a tihfel theih a. Hetianga ti tûr chuan account (hawhsak) neitu hnênah pawisa fai pein aniin a account-ah a dah lût ang a, chumi zât chu Tualchhûng Treasurer hnênah cheque pein emaw, Tualchhûng account-a transfer-in emaw sum pêk lêt leh a ni ang. Tin, Tualchhûng Treasurer-in account an hawhsaka account-ah pawisa fai thehlûtin, aniin Tualchhûng Treasurer hnênah cheque-a pe lêt emaw, Tualchhûng account-ah a rawn transfer lêt leh ang a, Tualchhûng Treasurer chuan Cheque-in Bialah thehluh ni se.
3. Bial dinhmun a in ang lo hle mai a. Bial thenkhatah chuan Tualchhûng Kohhran lian tak tak an awm a, chutiangah chuan Tualchhung Kohhranin account neih a, pawisa fai ni lo va Biala thehluh a tha ber a. Chutih laiin bial thenkhat chu Tualchhûng Kohhran tê tak tê tê awmkhâwm an ni a, chutiangah chuan Tualchhûng Kohhrante tân account hawn a harsat theih avângin Bial account chauh neih pawhin a chinfel theih a beiseiawm.
4. Bial hian Headquarters/ES Office-ah cheque-in thehluh ni se. (Cashless-a sum thehluhna hmanrua atân hian Bank Transfer leh Demand Draft siam ai chuan Cheque-a thehluh mai hian hun leh tha a heh lova, a tha berin a rinawm) Cheque-a Pay tihah hian Baptist Church of Mizoram tih ziakin emaw ziak loh pawhin Thawhlâwm Thehluhna Form nên Cashier (Receipt) hnênah thehluh tûr a ni.
5. A remchân theih chuan Bial hian bank account nei se la, chutah chuan Tualchhûng Kohhrante pawhin cheque/transfer-in Bial Treasurer hnênah awlsam takin an submit thei ang.
6. Pawisa fai ni lo e.g cheque-a mi mal atanga thawhlâwm dawn hi cashless a nih sa avângin nasa takin thawhlâwm thehluhnaah a pui thei a. Hei hi Tualchhûng Kohhrante pawhin mipuite hnênah hriattîr ni se.
7. BCM Headquarters Office leh Executive Secretary Office-te hian State Bank leh Mizoram Rural Bank-ah te account kan hawng ber a, SBI leh MRB Cheque-a thehluh hi duhthusâm chu a ni. Special Thawhlâwm account-ah phei hi chuan MRB-ah chauh account kan hawn avângin MRB cheque hi a tha lehzual ang. Special Appeal te hi a hranga dawn thin a ni a, cheque-a thehluh chu tha ber mah se, a zât (amount) a tam loh thin avângin cheque hrana ti thei lo tân chuan cash pawhin thehluh theih a ni e.
Hei hi thil pawimawh tak BCM Account himna tûr a nih avangin Kohhranten Official-a inhriattîrnaah ngaiin hma lâk nghâl ni se.
Sd/- (REV F.RAMDINMAWIA) General Secretary, BCM
