Mizoram Kohhran Hruaitu Committee leh Mizoram Baptist Kohhran (BCM) huaihawtin nimin, February 20, 2014 (Ningani) khan Sap Upa leh Pu Buanga Hall, Serkawn-ah Hlamzuih chungchang inrawnkhawmna (Consultation) an buatsaih.He hunah hian Lunglei khaw chhunga Tlawmngai Pawl hrang hrang aiawh (YMA, MHIP, MUP) te, Kohhran Pawl hrang hrang ai awh (BCM, SAD, UPC-NE, EFCI) bakah MJA leh MKHC hruaitute nen an vaiin mi 60 vel an kal khawm a ni.
Inrawnkhawmna hi Rev.H.Lianngaia, Chairman, MKHC leh BCM General Secretary ni bawkin a kaihruai a. Rev. Ralkapkunga (UPC, N.E) Secretary MKHC-in hunserh hmangin Kohhran hrang hrang leh Tlawmngai Pawl bakah MJA aiawh ten hemi chungchanga an Pawl kal dan leh inkaihhruai dan te an sawi theuh hnu-ah Sawihona neiin hetiang hian resolution an siam nghal a ni.
Resolution:
“Mizotena thihna hming hrang hrang kan neih zinga pakhat “Hlamzuih” hi tih bo ngawt chiah kan ngai lo va. Amaherawhchu hlamzuiha thite kan sawngbawl danah leh hlamzuih chin bithliah kan neih hi ennawn thain kan hria a. He thilah hian Kohhran lamin a tih tur chinah chuan mahni Kohhran theuhah tuna kan sawngbawl dan aia tha zawk sawngbawl dan kawng zawn theuh ni se kan ti a. Kohhranin a tih theih bak YMA lamin a tih tur chin Hlamzuiha thi-a ngaih tur chin bithliah (ni 90) leh a sawngbawl dan dang hi lo ennawn ve turin Young Mizo Association (YMA) ah thlen ni se kan ti.” tiin.
He thu hi MKHC hmingin thlen nise tiin lungrual takin an pawm a ni.
