February ni 8, 2023, Nilaini khan HATIM Principal office-ah BKHP Day thawhlawm an dawn atanga an lei, Photocopier khawl lian (Xerox machine) pahnih Pathian hnena hlanna neih a ni a. He hunah hian MBKHP Office Bearers te leh HATIM-a thawktute an tel a ni.

He khawl thar Pathian hnena hlanna hi Pu V. Vuansanga, Principal, HATIM-in a kaihruai a. MBKHP Secretary Nl. Lalhmingmawii Chongthu-in report tawi pein – “MBKHP Executive Committee-in 2022 BKHP Day thawhlawm hmanna tur a ruahman zingah – cheng nuai 1 leh sing nga chu (Rs. 150,000/-) HATIM tanpui nan pek ni se ti-a a rel bawhzuiin, January 30, 2023 khan he pawisa hi Principal hnenah hlan a nih thu a sawi a. Pi PC. Lalvohbiki, MBKHP President-in tawngtaiin khawl pahnih hi Pathian hnenah a hlan.

HATIM Principal Pu V. Vuansanga chuan BKHP member zawng zawngte hnenah leh MBKHP hruaitute chungah lawmthu sawiin, BKHP Day thawhlawm hlu leh zahawm tak, HATIM-in a lo dawng ve chu lawmawm a tih thu a sawi a. He sum hmanna atan hian HATIM-in a mamawh leh a awh em em, sum indaih lohna avanga an la neih theih loh Xerox khawl lian lei nan lungrual taka an ruahman nghal thu a sawi a. Institution tan tangkai taka hman a nih tur thu a sawi.