Naktuk, Zirtawpni, April 15, 2022 hi Khawvel puma Kristiante ni pawimawh ber zing ami “Good Friday”a ni a, Tin, Tunkar Pathianni, April 17, 2022 hi Lal Isua Thihna hnena a thawhlehna Ni champha "Easter Sunday' a ni bawk a. Heng hun ropui tak tak te hi Mizoram Baptist Kohhran pawhin urhsun taka hmangin a serh thin a. Kum dang angin kuminah hian Headquarters atangin Thupui thlansa a awm lo va, Thuchah sawitu-in tha a tih angin thupui an sawi ang a, Headquarters atanga thuchah chhiar tura buatsaih te chiar chhuah a ni ang.

Ningani zan (Good Friday Eve)-ah Tualchhung Kohhran tam zawkin Lalpa Zanriah (Sacrament) an kil ho ang a, Good Friday tuk leh Good Friday zanah te Isua tuarna lam hawi thuchah ngaithlak a ni bawk ang.  Hetihlai hian Covid Hrileng a la kian fel loh avangin Kohhran thenkhatah chuan Inkhawm bak Zaikhawm Programme siam lo an awm laiin,  Kohhran tam zawkah Inkhawm ban leh Chawhnu lamah te  Zaikhawm Programme  siamin urhsun tak leh hlawk taka hman tumin an inbuatsaih a ni.

............................

Good Friday & Easter Sunday - Headquarters Thuchah (Nipawimawh Prigramme)

GOOD FRIDAY (15 April, Zirtawpni)

Kum tinin Good Friday lo thlen hun ni (tahrik) hi a danglam thin a, movable feast an tih zinga mi a ni. March 20 leh April 23 inkara ni engemaw berah a thleng thin. Kum zabi khatna lai atang tawh khan Kohhran ho ten Zirtawpni hi chawnghei tawngtai neih ni atan an lo serh hrang daih tawh a, Good Friday anga hman erawh a ni lem lo. Kum zabi li na atang chuan Easter Sunday hma a Zirtawpni hnuhnung ber chu Lal Isua Krosa khenbeh a nih hriatrengna niah an serh hrang ta a. Chutatang chuan tuna kan hman chhoh tak zel Good Friday hi a lo intan ta a ni. A tir lamah chuan a hmingah pawh Holy Friday, Great Friday, ti tein an sawi thin a. Mahse kum zabi 6-na vel atangin Roman Kohhranin Good Friday an ti a, chu hming chu a lo pu hlen ta a ni.

Kan Missionaryte kaihhruaina hnuaiah Zoram kristiante pawhin Kristiante ni pawimawh ber pakhatah neihin kan serh a, kan ngaihluin kan la urhsun em em a ni. Pathian biak inkhawm nan leh zaikhawm nante, a remchang chuan Lalpa zanriah Sacrament kilho nante kan hmang thin a. Kan ramah hian kohhran hmasa lamte chuan Lal Isua tuarna rapthlak leh mualphothlak tak chu tuarpuina leh sunna rilru puin, hmun thenkhatah chuan pulpit leh a chhehvela puan dum zarte pawh an lo ching hial thin a ni awm e. A tuarna lam an sawi uar a, hlaahte pawh an sa tam hle thin a. Kan Mizo hla phuah thiamte pawhin chutiang lam hawi zawnga rilru hruai thei turin hla tha leh lungkuai tak tak an phuah nasa hle a. Tun thlenga kan sak tamte an la ni ta zel a ni.

Hun lokal zelah kan rilru put hmangte inthlak danglam ve zelin, chulam hawi zawng ngawr ngawra Good Friday hmang kher lovin, Pathian Fapa tuarna chuan mihringte tan chhandamna leh lawmna ropui tak min thlen sak zawk ziate fiah leh chiang zawka hriatthiamna nen, fakna leh Amah chawimawina hun atana hman dante kan lo thiam ta zel a. Tun thlengin Good Friday hi Kohhran ten thlarau lam malsawmna a thara kan dawnna hun a la ni reng thin.

.........................

EASTER SUNDAY (17 April, Pathianni)

Easter Sunday hi Lal Isua thihna hneha ropui taka a thawhlehna hriatrenga ni atana khawvel pumpuia Kristiante ni serh pawimawh a ni. Tirhkoh Paula chuan Krista thawhlehna chu kan rinna innghahna bul leh a chan chin tha hril innghahna a ni, a ti hial a ni.(1Kor.15:14, 17) Christmas hi mihringte tana lawmna ni ropui tak a nih laiin, Lal Isua tan chuan mihringte chhandamna hna harsa leh khirhkhan tak thawh sak tura tuarna bul a rawn tanna ni a ni ve thung a. Good Friday phei hi chu a hna thawh tlei tlak tura tuarna vawr tawp a hmachhawnna ni a ni a. Easter Sunday hi chu a ropui chung chuang em em a, hnehna leh lawmna ni ropui ber a ni. Khawvel hmun tina ringtute chuan Lal Isua chawimawina hun atan leh a thawhlehna thiltihtheihna hmachhuana khawvel hnehna puan khumna hun atan an hmang thin. Kohhran hmasate hun lai atang leh tun hun thleng pawhin kohhran tam takin Baptisma channa hun atan an hmang thin a. Baptisma chang tharte chu thawhlehna nun thar entirna atan puan var an sin tir bawk thin a ni.

Hun engemawti hnu-ah Easter Sunday hman chung changa a hun thu ah ringtute zingah inhnialna leh duh dan in ang lo a lo awm tak avangin Nicea Council chuan ngaihtuahin, tuna kan hman lai mek Sundaya hman turin a lo rel fel ta a. He rorelnaah hian Rom lal Constantine-a pawh a tel ve a, thusawitu pawimawh tak pakhat a ni. Nicea inkhawmpui atang chuan kristiante chuan Easter hi Sunday ah an lo hmang chho ta zel a ni. A lo thlen hun tahrik ni erawh chu pangngai reng lo chi (movable feast) bawk kha a nih avangin March 22 leh April 25 inkara eng ni berah emaw a thleng thin.

Eng pawh ni se, a hun bi dik tak hi hre lo mah ila, kan hmanna chhan tak Lal Isua hun tawnga thil thlengte kha kan chhandamna kawng min siam sakna a nih avangin, chumi hriatrengna atana kohhran ho ten lungruala kan lo hman chu Pathianin min pawmpui a ni tih a chiang a. Ringtute thinlungah he ni hian Pathian pawlna nung siam sakin rah duhawm tak a chhuah reng thin a ni.