Tun kar Zirtawpni, April 2, 2021 hi Khawvel puma Kristiante ni pawimawh ber zing ami “Good Friday”a ni a, Mizoram Baptist kohhran pawhin urhsun takin a hmang thin a ni.
Ningani zan (Good Friday Eve)-ah Tualchhung Kohhran engngemawzatin Lalpa Zanriah(Sacrament) an kilho ang. Bialtu pastor leh Bial nei lo Minister leh Headquarters-a hruaitute pawh Kohhran hrang hrangah in sem darhin Lalpa Zanriah(Sacrament hi an buatsaih sak dawn a ni. Good Friday tuk, Good Friday zan leh Inrinni zanah te Isua tuarna lam hawi thuchah te ngaithlak a ni bawk ang.
Tunkar Pathianni, April 4, 2021 hi Kristiante ni pawimawh – Lal Isua Thawhlehna Ni (Easter Sunday) a ni a. Easter Sunday Chawhma leh zan inkhawmah te Krista thawhlehna thuchah ngaihthlak a ni ang.
Kumin hian Good Friday leh Easter Sunday-ah te Headquarters atangin Thupui siam hran a ni lo va, Lal Isua’n thihna hneha a thawhlehna thu chu Kristiante leh Kohhran hote thupui ber a ni thin a, Thuchah sawitute pawhin heng thu hmang hian thuchah an sawi thin a ni.
Kum dangah chuan Pathian Biak Inkhawm bakah Kohhran zaikhawm leh Inpawlhona programme hmangin Thingpui ruai nen Good Friday leh Easter Sunday hi hman thin a ni a, kuminah erawh chuan Kohhran lian leh khawpui Kohhran tam zawk chuan Covid-19 hrileng avanga Inkhuahkhirhna dan-in a sawi angin zaikhawm leh Inpawlhona neih a rem lo va, Pathian Biak Inkhawm erawh chu Kohhran tam zawkin an buatsaih dawn a ni.
Heng hun pawimawh-ah hian Kohhrana thawktute pawh April 1-5, 2021 thleng hian an hna chawlhsanin Good Friday leh Easter chawlh an hmang dawn a, thawktu tam tak chu khual khua leh mahni khaw lamah chhuakin. April 6 (Thawhlehni) ah Office hawngin an kai tan leh ang.
