Tun kar Zirtawpni, April 10, 2020 hi Khawvel puma Kristiante ni pawimawh ber zing ami “Good Friday”a ni a, tin, April 12, 2020 (Pathian Ni) hi Isua Krista Thawhlehna Ni (Easter Sunday) a ni bawk. He hun ropui tak hi Mizoram Baptist Kohhran pawhin urhsun taka hmangin a serh thin a. Kumin hian Good Friday leh Easter Sunday-ah te Headquarters atangin Thupui thlansa neih a ni a. Good Friday (Zing) thupui atan “A thihnaa thi ve turin” (Johana 11:16) tih leh Zan lam thupui-ah “Krista tuarnate hretu” (I Petera 5:1) tih a ni ang.
Easter Sunday zing lam Inkhawm thupui atan “A thawhlehna zarah beiseina nung” (1Peter 1:3) tih thu leh Zan lam thupui atan “Lung chu lum sawnin a awm” (Luka 24:2) tih a ni ang.
Kuminah hian Coronavirus(Covid-19) hri leng avangin Kohhran hote Pathian Biak Inah inkhawm thei lovin, mahni inah inkharkhip-in hun kan hmang a. Good Friday leh Easter Sunday Kohhran Zaikhawm leh Inkhawm programme pawh a pangngaiin kan hmang thei lo a ni. Amaherawhchu heng hunpui pawimawh tak tak-ah hian mahni awmhmun theuhah Lal Isua Krista tuarna te, a thihna leh thawhlehna te ngaihtuah chungin Pathian Pawlna thar dawn theuh i tum ang u.
Kohhran te kan khawhar lutuk hlau in, BCM Communications Department hnuaia Audio Visual Production kal tlanga ‘KHAWNVAR’ programme LPS (12) leh ZONET (Rinna) Channel-ah te heng kan ni pawimawh pual hian special programme te pawh siam a dah a ni a, kohhran ten kan lo ngaihven dawn nia. View and subscribe our Channel : BCM Youtube Channel
