Tun kar Zirtawpni, (April 3.2015) kha Khawvel puma Kristiante ni pawimawh ber zing ami “Good Friday”a ni a, April 5 (Pathian Ni) hi Isua Krista Thawhlehna Ni (Easter Sunday) a ni bawk a.. He hun ropui tak hi Mizoram Baptist Kohhran chuan serhin tunkar ningani zan atang khan Zoram pumah Kohhran hoten Good Friday leh Easter Sunday Programme kan hmang mek a ni. Hemi a nih avang hian Kohhrana thawktute pawh April 2– 6 thleng hian an hna chawlhsanin Good Friday leh Easter chawlh an hmang  a ni

April 2, 2015 (Good Friday Eve) zan khan Kohhran tam zawk chuan Lalpa Zanriah (Sacrament) kilho nan hun an hmang a, inkhawm ban-ah Kohhran inpawlhona leh Zaikhawm programme te siam a ni a. Good Friday -ah Chawhma lamah Inkhawm a awm  a, Headquarters atanga Good Friday thupui thlan sa – ‘Kross thu’ ( 1 Kor.1:18) tih hmangin thusawituten thuchah an puang a. Chawhnu lamah Kohhran inpawlhona leh zaikhawm a awm lehin hetah hian Kohhran tam zawk chuan Chhang ruai leh Sawhchiar te nen hun an hmang a ni. Zan lamah pawh Inkhawm leh Kohhran Inpawlhona zaikhawm Programme te buatsaih a ni bawk a, Kohhran hrang hrangah zaikhawm boruak a nuam hle.