Rev.H.Liangaia[/caption]
BWA General Council Meeting - July 6-12 hmanga Izmir, Turkey-a kal General Secretary, Rev. H. Lianngaia chu nimin July 16, 2014(Nilaini) khan Headquarters Serkawn a rawn thleng leh ta. BWA General Council rorelna hi July 7-11 chhungin nitin neih thin a ni a. He Council-meeting hian Kum 2015-2020 chhung BWA President thar atan Ngwedla Paul Msiza. South Africa chu a thlang a, hei bakah hian Vice President thar atan mi 12 thlan an ni bawk. An thurel lansar zual hengte hi a ni:-
1. Myanmar (Burma) Intihduhdahna a lo tawp a, sakhaw zalenna a lo awm theih nana hma lak (Violence and Religious Liberty in Myanmar) 2. Khawvel hmun tina Eirukna a lo reh theih nana hma lak(Resolution on Corruption). 3. Ukraine rama Russia duh leh duh lo kara buaina a lo reh theih nana hma lak. 4. America rama Refugee tlan khawmte America sorkarin tha taka a lo enkawl theih nana palai hna thawh. 5. Turkey rama Kohhran Hruaitute leh Ringtu mimirte Ringtu tha leh nghet, thih thlenga rinawm ni zel tura Fuih thar lehna leh chak taka hma an lak theih nana hma lakpui. BWA Human Rights Award:BWA General Conference -ah hian Mihringa sumdawnna leh Sex hmanga sumdawnna (Human Trafficking & Sex Trade) dona kawnga thawh that avangin Pastor Ilie Coada, Maldova Baptist Church a mi chu Baptist World Alliance (BWA) Denton and Janice Lotz Human Rights Award for 2014 hlan a ni.
.....................................
TURKEY ZIN REPORT
- Rev. H. Lianngaia
Mizoam Baptist Kohhran member zawng zawngte kan Lalpa leh Chhandamtu hmingin chibai ka buk a che u.
Pathian leh Kohhran zarah khawvel pumpui Baptist Kohhran Rorelna lian-Izmir,Turkey-a ka zu palaina report tawi ka han ziak a, Pathian hminga BWA-in Baptist member zawng zawngte min sawmna thuin a tlang ka han kawm a, theih ang anga tih puitling turin kei pawhin BCM memberte ka han ngen nghal che u a ni.
BWA General Council:Khawvel pumpuia Baptist Kohhran Inthlung khawm (BWA) chuan a din kum 1905 atang khan kum 5 bi zelah Inkhawmpui (Congress) a nei thin a. Inkhawmpui neih loh kum apiangin (kan MBKHP leh MTKP-te ang bawk hian) rorelna ( General Council ) a awm ziah bawk a. Kumin 2014 hi Inkhawmpui neih loh kum a nih avangin Rorel ringawt kum a ni. BWA General Council member hi kan Kohhran atang chuan Rev.Raltawnga nen kan nih lai a ni a; BWA-a committe member nihna hi mi mal hming zela ruat a nih avangin kum 2015 thleng member kan la ni ang. Amaherawhchu BCM kalphung atangin Assembly chuan President leh General Secretary te kal turin a ruat thung a. President hian mi rama zin phalna (visa) a hmuh hman tak loh avangin keimahin ka zu liam thla ta a ni
Turkey Ram:BWA General Council neihna hmun hi Izmir khua (Smurna), Turkey ram hi khu a ni. Thuthlung Thar hun laia Asia tê (Asia Minor) an tih lai kha a ni a, Tirhkoh Paula Piantharna hmun Tarsa khua te, a zin vawi 1-naa a tlawh ram-Derbe, Lustra, Antiokei,etc te awmna ram a ni a; tin, a zin vawi 2-na tuma Makedonia ram atanga kohna a hriat hma zawnga a thuhrilna ram kha a lo ni vek mai a. Thupuan Bua Kohhran 7-te pawh kha Turkey rama awm vek hi lo zu ni a !. A lungchhiatthlakna lai tak erawh chu Muslim ram a lo ni ta khu a ni.
BWA General Council neihna khua Izmir (Smurna):Izmir (Smurna) khua hi Turkey rama khawpui lian 3-na a ni a, an lawng chawlhna hmunpui ber dawttu a ni bawk. Western taka cheibawl a ni. Turkey ram hi a khaw chhak lam chu Asia ram a ni a; Muslim kulmuk tak vek an ni a, an ram khawthlang lam erawh chu Europe ram a ni thung a, Muslim chu a tam ber ni bawk mahse Western taka cheibawl a nih avangin a zalen em em thung a. Bible-a Thupuan Bua Kohhran 7-te zinga tun thlenga khawpui duhawm taka la thang chho zel awm chhun a lo ni tawh a, “Thih thlengin rinawmin awm rawh, tichuan Nunna lallukhum ka pe ang che” tia dem kai lo Kohhran a nihna zarte kha a la zo a ni mahna le ! A khua hi tlang deuh reuhin hla fe atang hian a hual a, phaizawl Tuipui (Mediteranian) kamah a awm a, khawpui mawi leh nuam tak a ni a, Foreigner/ Tourist (khualzin) ho intawllenna hmun,engkim thaw awmnaa mawi a ni. Thosi leh Tho erawh an tel ve lo khu India mite tan a khawharthlak zawk. Malaria leh kawthalo/santen natna ten thla an zar lo nâin Lungphu chawla thi an tam thung an ti.
Kalkawng:Ni 6.July Sunday zing dar 6:05 ah Delhi atangin Turkey ram khawpui (capital) Istanbul panin Turkish Airlines-in kan thlawk a; Delhi atang hian darkar 6:50 chhung zet kan thlawk a. anmahni ram sonaah chuan chhun dar 10:25, India ramahah chuan 12:55pm-ah Istanbul chu kan thleng ta a. ( Istanbul hi a hming hmasaah chuan ‘Constantinople’ tih a ni a. Rom Lal Constantine-a din kha a ni). Darkar 2:35 kan chawlh hnuah anmahni ram dar 1:00pm-ah Izmir panin Domestic flight (Turkish .TK 2324) in kan thlawk leh a, 45mins kan thlawh hnuah Izmir (Smurna) khua chu kan thleng ta a ni.
Ni 7-11.July chhung kha meeting pawimawhin kan khat a ni ber a, Ni 12.July Inrinni zanah mahni ram lam panin kan lo haw leh a, Delhi Thlawhna tum hmunah Rev.R.Lalthanmawia, North Indian Mission a kan hotupain min lo hmuak a, hahdam takin Baptist House Delhi ka thleng leh ta. Kohhranhote min tawngtaipuina avangin Pathian leh Kohhranho chungah lawmthu ka sawi tak meuh a ni.
Tlangkawmna:Hengah te hian Khawvel ram tina Baptist Kohhran member zawng zawngte chu Tawngtai leh theih ang anga tan la tura sawm kan ni a. Khawvel ram hrang hranga Kristian tihduhdahna te, Eirukna te, Politics-a buaina te, Chi inthliarna leh Rethei hnawhchhuah ngaihthahna te a lo reh a, Lal Isua, Remna Lal hi hmun tina Lal leh Chhandamtu a nihna puan chhuah a nih theih nan mahni awmna hmun theuhah Khawvel pumpui Baptist memberte chu Pathian hmingin sawm leh ngen kan ni e.
