Kar hmasa Zirtawpni, January 27, 2023 chhun dar 12:00 khan, Champhai Pastor Bial, Zokhawthar-a BCM Venghnuai Kohhran leh an Biak In thar chu Rev. R. Lalbiakliana, General Secretary-in hawngin Pathian hnenah a hlan a. Kohhran thar leh Biak In Thar Hlanna Inkhawm-ah hian Champhai Bethel Pastor Bial leh Champhai Bial hruaitute leh Kohhran mi thahnem takin an telpui a. Headquarters atangin General Secretary leh a nupui Pi Dr. Irene Colbert, Tv. C.H Lalmuanzuala, Production Assistant, Pu Lalrinpuia, Driver te leh zaithiam Nl. Lalchhanchhuahi, Hnahthial te an tel.

Kohhran thar leh Biak In thar hawnna Inkhawm hi Biak In kawtah neiin, Biak In hawn hnu hian Biak In chhungah lutin Pathian hnena lawmthusawina leh Kohhran thar leh Biak In Thar hlanna Programme hmanzui a ni a. Inkhawm hi Rev. Vanlalnghaka Jongte, Bialtu pastor-in a kaihruai a, Tawngtaihona neiin, Kohhran Secretary-in Kohhran lo pian chhoh dan leh Biak In thar sak dan report a pe a, General Secretary-in thuchah sawiin, Pro.Pastor R. Lalramchhana’n Sum dinhmun tlangpui report a pe bawk. Inkhawm-ah hian Bial leh Tualchhung Kohhran atangin Zaipawl hrang hrang leh fak lam te bak ah Nl. Lalchhanchhuahi hnen atangin fakna hla te ngaihtlak a ni.

BCM Venghnuai, Zokhawthar member te hi kan unau Myanmar Raltlan te an ni a, Champhai Bethel Pastor Bial-ah awmin, tunah hian Kohhran member 500 chuang an awm mek a, Kohhran te an phurin an hlim hle a ni.