Tunkar Pathianni, February 6, 2022, hi Khawvêl puma Baptist Kohhran Inzawmkhawm Pâwl – Baptist World Alliance (BWA Day) a ni a, he Ni pual hian Tualchhung Kohhran tin Pathianni zing Inkhawm-ah hun hman a ni ang, hemi ni-a thawhlawm pawh BWA pualin, BWA Headquarters-ah thawn a ni ang.
Kum 1905, July ni 17 khan London khawpuia Exeter Hall ah khawvel pumpuia Baptist Kohhran inzawmkhawm pawl (BWA) hi din a ni a. Tunah hian khawvel ram hrang hrang 128 atangin Baptist Inzawm khawm pawl 245 an awm a, Tualchhung Kohhran 173,000 (nuai 1, sing 7 leh sang 3) atangin baptisma chang chin (Member puitling) mi maktaduai 49 chuang an awm a ni. BCM hi kum 1978 atangin member a ni a. Kum 5 dan zela neih Inkhawmpui lian (BWA Congress) ah a remchan dan angin Palai leh Zaipawlte pawh a tir ve thin a ni..
BWA din chhan leh tihpuitlin a tum langdsar zualte chu:-- Baptist Kohhran hote inpumkhatna chhawm nun zel a, an zingah thawhhona tha neihtir.
- Chanchin tha hrilhna lama Kohhrante tih nun zel.
- Chhawmdawlna leh hmasawnna lama thawh.
- A ram mite Kohhran hruaitu tha ni tura buatsaih.
- Pathian duhzawnga dikna leh mimal zalenna humhim leh, chi inthliarna dodal, human Rights a awm theih nana thawh.
- Khawvel danglam zelah Pathian thudik puanchhuah leh khawvela retheihna tibo tura hmalak, remna leh muanna a awmna tura thawh.
- Thalai leh hmeichhiate rawngbawlna tih chak, tih te a ni.
