Oxygen Plant hawnna programme hi Christian Hospital, Serkawn Compound-a Oxygen Plant an dahna hmunah hman a ni a, Rev. Dr. V. Laldingliana, BCM President-in Inkhawm a kaihruai a, Er. Victor Lalrinawma Sailo-in Technical report pe-in, Dr. Vanlaltanpuia, Lunglei North Bialtu MLA-in thu a sawi bawk.

He hunah hian HPC Vice Chairman, Pu Lawmawma Tochhawng, Bamboo Development Board Vice Chairman Dr K Pachhunga, MYC Chairman Dr Vanlaltanpuia te bakah Lunglei DC Pu Kulothungan leh Sorkar mi pawimawh engemawzatin rawn telpuiin, BCM hruaitute leh thawktu te nen mi 50 chuang zet an kalkhawm a ni.

Chief Guest Dr. R. Lalthangliana, Health Minister-in thu sawiin, Oxygen plant bun tura hmalatu te Google.org, Program for Appropriate Technology in Health (PATH), Seattle, USA, GiveIndia te leh CHS thawktute leh Lunglei District MLA leh official-te chungah lawmthu a sawi a. Khuallianin thu a sawi zawh hian Oxygen Plant chu a hawng zui nghal a. Christian Hospital Serkawn-a hman tur Oxygen Concentrator pahnih a pek chu a hlan nghal bawk.

Pu Thongsuanmung Vualnam, PATH pawhin thu sawiin, India ramah hriselna kawnga  hmasawnna lam hna an thawh dan te tawite-in a tarlang a,  Rev. R. Lalbiakliana Associate General Secretary (Service) –in Pathian hnena hlanna tawngtai a neih hnu-ah Dr. Lalramzauva, Director, Medical & Health Department, BCM-in lawmthusawina neiin Rev. Dr. Lalzarliana, Director, BCM Communications Department-in Malsawm tawngtaina-in hun a khar a ni.

Oxygen Plant 800MPL nei tur hian Google.org chuan a khawl rawn pe-in, a bun hna (Installation) hi Support, Program for Appropriate Technology in Health (PATH)  in an rawn thawk thung a ni.  A khawl leh a kaihhnawih hrang hrang belhkahwm hi cheng nuai 150 man vel a ni a.  Hei bakah hian a hmunhma leh a building te buatsaih nan MLA panga - Dr. R. Lalthangliana, Health Minister, Pu C. Lalrinsanga, Agriculture Minister,   Dr. Vanlaltanpuia(Chairman MYC ),  Dr. K. Pachhunga (Vice Chairman, Bamboo Development Board), Pu Lawmawma Tochhawng (Vice Chairman HPC) ten MLA fund atangin cheng nuai 4 theuh an thawhkahwm, a vaiin cheng nuai 20  leh BCM sum atangin cheng nuai 23 hmanga tihpuitlin a ni. BCM Property Department leh Christian Hospital lamin a sak hna leh a tul apiang buaipuiin ruahmanna an siam a ni.

He khawl bun tur hian October, 2021 atang khan hnathawh tan a ni a,  February 2022 ah a khawl hi bun zawh fel niin he khawl hian chatlak awm lovin khum 500 a chawm thei a ni. A plant chhungah hian electrical control panel, compression unit, air dryer, air tank, geolite chamber, 2000 litres oxygen tank leh khawl dang te awmin 250kVA transformer leh backup te pawh bun nghal a ni bawk.