Vawiin, August 26,2019 Chawhma dar 10:30 khan Christian Hospital Serkawn OPD kawtzawlah 34th National Fortnight on Eye Donation pualin hun hman a ni. He hun hi Dr Lalramzauva, Medical Superintendent, Christian Hospital Serkawn in kaihruaiin kalkhawmte lawmna thu a sawi a. Eye Donation Forthnight hi India ram pumah kum tin hman thin niin a tum ber chu mitthlak (eye transplant) mamawhna sang lutuk phuhru thei tura mit pek (donate) pawimawhna mipui te hnena inzirtir a ni, a ti. He Fortnight pual hian Eye Care Centre Aizawl atangin Dr KL Remsanga (Medical Superintendent Rtd) leh Dr C Lalduhkimi leh an staff ten vawiin atanga ni 4 chhung (26th -29th August 2019) a thlawna mit entirna ‘Free Eye Clinic’ Christian Hospital Serkawnah an neih tur thu a puang nghal bawk. 34th National Fortnight on Eye Donation hawngtu Dr.Lalrinthangi SMO, District Programme Manager District Blindness Control Society (DBCS) chuan thu sawiin mipui kalkhawmte chu an mit ngun taka enkawl tur leh mit na an neih emaw mit an tih hliam palh chang ten Doctor pan vat thin turin a chah a. District Blindness Control Society (DBCS) hmalakna hrang hrang pawh sawilangin nikum (2018-19) khan mi 296 te Cataract surgery neih anih bakah naupang 282 leh puitling 563 hnenah a thlawnin tarmit pek chhuah an ni a. Hemi bakah hian School leh Institute hrang hrangah Awareness Campaign neih anih thin thu a sawi. Mit donate-in mit mu lak vek a ngaih loh thu leh mit darthlalang chauh lak anih thin thu a sawi. A mamawh tu te tan mit petu te hlutzia sawiin Donor ni ve tura inziaklut theuh turin kalkhawmte a sawm a ni. Dr KL Remsanga, Aizawl Civil Hospital Medical Superintendent (Rtd ) leh Eye Care Centre Aizawl neitu ni bawk pawhin thu sawiin 26th -29th August 2019 chhungin a mamawh apiang a thlawna mit entirna ‘Free Eye Clinic’ an buatsaih tur thu leh Aizawl pan theilo mit zai ngai te pawh a thlawna zai sak an nih tur thu a sawi a. Mizoram Eye Bank chungchang pawh sawilangin 31st July, 2008 ah Civil Hospital Aizawlah din anih thu leh tun dinhmunah mit donate tura intiam mi 6894 an awm tawh thu a tarlang. Mizoram Eye Bank hian an hmalakna hlawhtling taka kalpui zelin tun dinhmunah mit donate tawh mi 763 (Corneal collection) an awm a. Heng mit donate hmang hian Civil Hospital Aizawl chuan mit thlak (Corneal Transplant) 87 ti tawhin Sri Sankaradeva Nethralaya, Guwahati chuan Corneal Transplant vek 355 an kalpui tawh a ni. Dr KL Remsanga chuan mit donate chu midangte tana malsawmna ropui tak anih thu sawiin kalkhawmte chu Donor ni ve tura inziaklut theuh tur leh an chhungte leh thenrualte pawh mit donate pawimawhzia lo zirtir chhawng ve turin a ngen a ni.