January 24, 2021 (Pathianni) khan Rev. R. Lalnunzira, Executive Secretary, Lawngtlai, Rev. K. Laldosanga leh Kohhran hruaitu thenkhat-in Thingfal bial tlawhin Biak In sak lai, BCM Zion, Thingfal, BCM Mamte (T) leh BES Thingfal te a hmunah a en.
BCM Zion Biak In sak lai tlawh hmasak ber a ni a, BCM Zion Thingfal hi member 308 niin, Biak In hi 2012 ah sak ṭan a ni a, cheng nuai 35 zet sen a ni tawh a ni. Kohhran member tha tam tak a lut a, sum senso a tlem ang hu-in Biak In hi an sa ṭha hle thung a ni. BCM Headquarters aṭangin ṭanpuina ₹ 200,000/- dawn tawh a ni a, tunah hian Biak In Ceilling, Electric wiring leh ṭul hrang hrang hmabak a la awm nual a ni. BCM Zion Thingfal hian 2020- 2021 chhungin Assembly target ₹825,000/- neiin ₹ 83,890/- zetin Assembly Target an khum bawk a ni.
Hemi Hnu hian BCM Mamte(T) tlawh lehin, anni hi Thingfal khawchhunga Mamte khua sawikhawmho kha an ni. Kum 2014 ah Biak In sa ṭanin tunah hian an sa pum uaih tawh a. Kohhran member 150 awmin, Biak In hi a dung ft 60, a vang ft 30 a ni a sak a ni. Ceilling, Electric Wiring leh ṭul tamtak hmabak an la nei a, thawh chhunzawm mek reng a ni. Biakin sak nan hian ₹ 14,49,157/- hmang a ni tawh a, Kohhran tha tam tak a lut a ni. Biak In sa chung hian Assembly target ₹ 435,000/- chu ₹ 33,390/- zetin an khum bawk a ni.
Mamte (T) an tlawh zawh hian Baptist English School, Thingfal Bial-in an din chu tlawh chhunzawm a ni a, BES hian zirlai 120 neiin, Kg aṭanga Cl-VIII thleng a awm. Zirtirtu leh non Teaching staff, an vaiin thawktu 12 an awm mek a, Monthly fee ₹400/- leh admission fee ₹1,000/- chauh a ni. He school hi BCM headquarters in kum tin ₹ 70,000/- in a ṭanpui ṭhin a, School ram hi bialin a lei a, Building pawh a sa nghal a ni.
