Mizoram Baptist Kohhran Assembly hnuaia Rorelna sangber, Assembly Executive Committee Meeting chu vawiin, January 24, 2017 (Thawhlehni) zing dar 10:30 khan Mizoram Baptist Kohhran Biak In, Serkawn-ah an tan ta. Meeting hi Rev. Lalthangliana Hnamte, BCM President -in a kaihruaia, General Secretary, Rev. F. Ramdinmawia’n report tlangpui a pe. Tun tum Committee Meeting-ah hian thu ngaihtuah tur (Agenda) engngemawzat awmin 2017-2018 Budget pharh a ni bawk dawn a ni. Chanchin kan ziak lai hian Palai kal zat hriat theih chin 185 an ni.
Agenda langsar zual lo tarlang ila : –- Thawktute tan Conduct Rules siam pawm tura thlen
- Pathianni serh chungchang inkaihhruaina tur ruahmanna pawm thu
- Mizoram Chanchin Tha lo thlen kum 125-na (Quasquicentenial) lawmna tur ruahmanna (Report pawm tura thlen)
- Pu Buanga thlan South Ealing Cemetery, London a mi chei chungchang.
- AISSA huaihawt Regional Training (May 2017) thla dawl dilna.
- HATIM Building Block ‘D’ Assembly-a appeal siam dilna.
- Hunthar Biak In, Aizawl atana Special Appeal chungchang.
- Budget Estimate 2017-2018
Heng bakah hian Christian Hospital Lawngtlai Plan thar pawmpui tura thlen te, SIM Building sakpuitlinna tura Appeal siam dilna te, Nomination Committee member 5 thlan thar te, BHSS Principal ruat thar UIpa Lalrinmawia pawm tura thlen te, Pro Pastor -5, Minister atana nemngheh tur thlan te, Thawktu Confirm tur te, Vehicles hlui engngemawzat tihral a, a thar lei dilna te a awm a, Constitution leh Pay Rules thenkhat Hrilhfiah tura thlen leh tihdanglam(amend) rawtna a awm bawk.
Meeting hian naktuk January 25, 2017 thleng a awh ang.
