Executive Secretary pahnih Aizawl leh Lawngtlai atan thlan thar an ni leh ta a,  E.S Lawngtlai atan Rev. F. Ramdinmawia leh E.S Aizawl-ah Rev. V. Laldingliana te thlan a ni ni.

An chanchin tlangpui:-

Rev. F. Ramdinmawia.

November 1, 1958-ah Mampui khuaah a lo piang a. Upa F. Sangluaia (Late) leh Vawmawii te fapa naupang ber a ni. Feet nga leh inches riat (5’ 8”) a sâng a ni a, Rev.V. Lalzawnga’n Lawngtlai Bazâr-ah Baptisma a chantîr a. Tichuan, kum 1980-1984 chhûng khân Pathian thu E.T.C Jorhat-ah zirin B.Th a rawn zo va. Kum 1984 khân Probationary Pastor-a lâk nghâl a ni a, Lawngtlai Bial-ah dah a ni. Lawngtlai-a a awm chhûng hian tûna BCM Printing Press, Lawngtlaia mi hi bul tanin Manager hmasa ber a ni a, Tichuan kum 1987 BCM Assembly, Sêrkâwn-a neihah khân Pastor puitling atân Rev. Dr. C.L. Hminga’n a nemnghet a ni.

Kum 1987 (Ordain a nih kum)-ah Bial enkawl lovin Missionary-ah a in pe nghâl a. Birpara, West Bengal-ah tirh thlâk nghâl a ni a. Kum 1989, Field puitlinga siam a nih atanga kum 2003 thleng khân West Bengal Field-ah hian Field Director hna a chelh a, West Bengal Field bîk atâna Field Director awm chhun a ni.

Misson Field-a a awm chhûngin, Kum 1990 khân West Bengal Field a Missionary C. Laldinpuii nên inneiin fapa pahnih-Theodore Lâwmsângzuala leh Amos Lalramchhana an nei a. Mahse, Lalpan a hnêna châwl tûrin a fapa upa zâwk Theodore Lâwmsângzuala chu kum 1993 khân hruaisakin an nu C. Laldinpuii pawh chu a kum leh 1994 khân a hruaisak leh ta a. Anni nufa hi West Bengal Field, Mission Thlanmual-ah Krista lokal lehna nghâkin an lei taksa chu thlah liam a ni a. Tichuan Lalpan a fapa naupang zâwk nên Field-a rawngbâwl hna chu kum 2003 thleng khân a thawh chhun zawmtîr a. Field a, a awm hnu hian Indian Evangelical Mission hnuaia Qutreach Training Institute, Tamilnadu-ah Missionary Training neihtîr a ni a, Union Biblical Seminary, Pune-ah B.D a zir bawk a ni. Lunglâwn Bial-ah Pastor hna a thawk leh a, hei hi Bialtu Pastor anga a thawh hmasak ber a ni.

Lalpan rawngbâwlpui tur May 21, 2004 khân F. Lalengmawii pe lehin a ni nên hian fanu duhawm tak Christine Lalmuanpuii an nei a. Hlim takin an fapa Amos Lalramchhana leh an fanu Christine Lalmuanpuii te nên an chhûngin Bial-ah Lalpan rawng a bawltîr a. Kum 2007 khan Lunglei South Area Baptist Council-ah Chairman nihna a chelh a. Rawngbâwl tûra a inpêk tirh atanga tûn thlenga a tuina ber chu Mission rawngbawlna hi a la ni reng a ni. Mission Committee chuan Regional Director atan a ruat angin he hna hi a chelh mek a ni.

 .......................

 Rev. V. Laldingliana

 Pian ni leh naupan lai : Rev.V.Laldingliana hi 1952, April 16-ah Mêlthum, Aizâwl-ah a piang a. A pa chu Pu Saihlîra Vanchhawng a ni a, a nu chu Pi Sângluaii Sailo, (Hmâwngkâwn lal tunu) a ni. Pianpui unau 10 a nei a, amaherawh chu an unaute zînga upa berin 1959 khân a boralsan tâk avângin tûnah hian unau mipa 5 leh hmeichhe 4 a la nei. Ani hi feet 5’, 5’-a sâng a ni.

Tûn hmaa Baptist Kohhran leh Presbyterian kohhran kâra inpawm tawnna thuthlung kan neih avângin, Pastor Liangkhaian baptisma a chantîr a. A pa Pu Saihlîra hi Mizo zînga Serampore, Culcutta atanga B.A. pass hmasa te zînga mi a ni. 1953 kum khân a pa hovin chhûngkuain Mizoram chhuahsanin NEFA lam an pan ta a ni.

A pianthar dân leh Rawngbâwl tûra kohna : A naupan laia a nu leh paten-ni tina chhûngkaw tawngtaina an lo neih pui thinna te chuan a thlarau nun a kaihhruai nasa hle a. Thuhriltu hmingthang tak Dr.Sam Kamaleson leh Rev.Augustin Salina ten Shillong khawpuia rawngbâwlna an neih tumin 1973, April 1st-ah piantharna a lo chang ta a. Hemi tuma amah counsel-tu chu Pathian mi hman Rev.Vânlalnghâka (Shillong) a ni.

BCM-a Pastor thawh tan dân : 1980 khan Yavatmal, Maharastra-ah B.D. zir tûrin BCM Shillong atangin a chhuak ta a, 1983 khân second class-a pass-in B.D. chu a zir chhuak ta a ni. Tichuan May 1.1983 atangin BCM hnuaiah Pro.Pastor hna chu a thawk tan ta a ni.

Rev.B.Thangseia kaihhruaina hnuaiah 1983-1986 chhûngin Pângzâwl bialah Pro.Pastor hna a thawk a. Bialtu Pastor (Rev.B.Thangseia) chuan hemi kum chhûnga rawngbâwlna kawnga a lo enkawlna leh kaihhruaina te chu a tangkaipui hle a ni. Hetianga senior Pastor amah hrethiam tak kaihhruaitu a lo nei hi vânnei a inti hle a, a chungah lâwm thu sawi ba hlein a inhria.

1986 Assembly-ah Rev.Dr.C.L.Hmingan Pastor puitling tûrin a Ordain ta a. Hemi kum vek hian Tawipui Pastor bial enkawl tûrin Pângzâwl Bial atanga transfer a ni. Kohhran te duhsakna hêng bial pahniha a awm chhûngin a dawng nasa hle a. Zorama seilian a nih loh avângin Pastor dang te aiin zir tûr ngahbîkin a in hre thîn. Upa leh rawngbâwltuten hrethiam taka an kaihhruaina te chu a hlut hle a. Hetiang taka rawngbâwlpui tha tak tak Lalpan a pêk avângin a lâwm hle thîn a ni.

Kum 1987 April 7th niah a dam chhûng atâna Lalpan kawppui leh rawngbâwlpui a pêk Nl.Lalroziki Hnamte d/o Dr.H.L.Malsâwma nên BCM Ramhlun North-ah Rev.H.Sangcheman a inneihtîr a. He kohhrana innei hmasa bera record an ni nghe nghe. Lalpa malsâwmna changin-fapa pathum i.e. mipa pahnih leh hmeichhe pakhat an neia. A chanchin ziak laia an fate dinhmun chu a upa ber V.Lalramdina chuan St.Peter Collage, Shillong-ah B.A. (Hons) III zir tûrin a inbuatsaih mêk a. An milai V.Lalpârmawii chu MBBS, RIMS a zir tûr a ni a. Tin an tê ber V.Lalrinawma chuan Mt.Carmel Higher Secondary, Aizâwl-ah Class XI (Sc) a zir mêk a ni.

Mission field lam : 1991 August thla chuan Arunachal Field (tûna East Field, A.P) a missionary-(Field Director) a kal tûra Lalpan a kohna chu chhângin Tawipui bial chu, kohhrante nên inngai êm êm chungin an chhuahsan ta a, (Joshua 1:9 “Lalpa i Pathian chu..i hnênah a awm zêl dâwn alâwm” tih hi Pathian thu an nupa thinlunga lo thleng chu a ni). Tichuan Pasighat hmun chu October 18th ni-ah an thleng ta a. Pu L.H.Lalnghâkmawia te nupa leh a ram miten hlim takin an lo hmuak a. “Lalpan tlâng a lo ruat sak” chu thlenga an in hriat avângin an hlim êm êm a ni. Kum 16 thâwthâng Adi hnam zînga hlim taka chhûngkuaa rawng an bâwl hnuin, 2007-a BCM Pastoral Committee chuan Rev.Dr.P.L.Lianzuala thlâk tûrin Aizâwl East Pastor Bialtuah a ruat ta a. Tichuan May ni 4 zîngah Adi kohhran ten mittui nên an rawn thlah a. A hun tha ber Lalpa tâna a pêkna hnam leh ram chu 2007 May 4 tûkah chhûngkua in an chhuahsan ta a ni.

Rawngbâwl zêlna : May 7, 2007-2011  ah  Aizâwl East Pastor bial a enkawl laiin,  2011 khan North India Mission Field Director atan dah a ni a, tunah hian Delhi-ah a awm mek a ni.