Mizoram Baptist Kohhran chuan kum tinin February Pathianni hnuhnung ber hi BCM chuan Education Sunday atan a hmang thin a. Kuminah erawh chuan Pathianni vawi thumna- February 21-ah hman a ni ang a,  Mizoram Baptist Kohhran Biak In tinah Pathianni Chawhma inkhawm-ah he ni pual hian hun hman a ni ang.  Headquarters atanga thupui thlan sa “Thu ka pek zawng zawng che u pawm turin zirtir rawh u” (Mat 28:20) tih thupui hmangin thusawituten thuchah an sawi bakah Kohhran Nipawimawh Bu-a hemi ni pual thuchah chhiarchhuah tura buatsaih sa chu chhiarchhuah a ni bawk ang.

EDUCATION SUNDAY  THUCHAH (Src: BCM Nipawimawh Bu)

1960, BCM Assembly chuan, “High School din ni sela, kum khata Pathian ni vawi khat chu High School pualin Tualchhûng kohhran zawng zawngah hman ni se, thawhlâwm pawh Headquarters-ah thawn ni rawh se,” tiin a rêl a. February, 1961-ah High School din a ni; chuta tang chuan July  Pathian ni vawi-3 na, ‘Kristian High School Ni’ atân hman a ni.

1988 Assembly chuan, “Tualchhûng kohhran inenkawlna a hautak deuh deuhva, Sawrkâr tanpuina bâkah School enkawlna budget a awm bawk a, thawhlâwm hi chu headquarters-ah thawn tawh loh ni se; a Ni erawhchu hman chhunzawm zêl ni rawh se”, a ti a. Sawrkârin Higher Secondary-a a hlân kai avângin ‘Kristian High School’ tih chu ‘Baptist Higher Secondary School (BHSS)’ tia thlâk a ni; Kristian High School Ni tih pawh BHSS Day tia tihdanglam a ni.

2005 Assembly-chuan, “BHSS Day hi School din thla February-ah hman ni rawh se”, tiin a rêl a. 2006 Assembly chuan, “BCM hian Institution tam tak a nei a; zirna in pakhat (i.e. BHSS) hming hian a fûn kim tawk lo ve; ‘Education Sunday’ tih ni rawh se tiin hming thar a pe ve leh ta a ni. Heta tang hian kum tin February Pathianni hnuhnûng ber hi ‘Education Sunday’ atân hman a lo ni ta a ni.

Mizoram Baptist Kohhran-in Education hmanga rawng a bawlna hi a zau hle a, Education department-in a huam loh mission leh department hrang hranga zirna hmanga hma a laknate nen chuan a budget pumpui 50% aia tam mah a hmang daih a ni.

1. Hun hmasa.

Mizorama sikul hmasa ber chu 1893-ah hawn a ni a, sawrkar hnathawk leh sipai fate pual a ni; hetiang sikul bawk hi Lunglei leh Tlabung ah 1894 ah din a ni. Sap Upa leh Pu Buanga’n Aizawlah Mission sikul hmasa ber April 1, 1894-ah an hawng a; kum 1897-a Mizoram an chhuahsan khan a tawp lailawk a; 1898-ah  D.E. Jones, (Zosaphluia) chuan a tan ve leh nghal a ni.

Sap Upa leh Pu Buanga’n 1903 March thlaah Lunglei an rawn thleng a, Junly 3, 1903-ah sikul an hawng a, zirlai 24 an nei. An hun hmasa lamah thingtlang khuaa sikul hawn an uar a, rin aia a harsat tak avangin ko an thlak a, khawpui leh a chhehvelah hma an la nasa ta a ni. Pu Kara’n (Rev. HW. Carter) Education a enkawl khan thingtlang mamawh chiang takin a hmu a, sikul an din leh ta zung zung a. Mizoram chhim lamah 1932-ah Primary sikul 25 a awm a, 1952-ah chuan 150 lai kan lo nei ta a ni. Kum 48 zet (i.e. 1904-1952) sawrkarin kohhran kutah kan rama zirna pum pui a dah chhungin hmasawnna nasa tak a thleng. Sawrkar kutah High School - 5, Middle School - 60, Primary School - 366 hlan a ni.

2. BCM Schools.

Sawrkarin kan sikul enkawl a lak hnuah zirna pawimawhzia hriain BCM chuan hma a la ve leh thuai a, February 8, 1961-ah High School (Serkawn Christian H/S) a din ta a ni. Kan ram leh hnam, kan kohhran tana zirna hlutzia kan hre chiang deuh deuh va, Mission-ah pawh kan hmanraw tangkai ber zinga pakhat a nih zel avangin hma kan sawn zel a, 2007-ah kan rama Christian College hmasa ber Higher And Technical Institute of Mizoram (HATIM) kan din leh ta a ni. Tunah hian Mission enkawl sikul 54; Education department enkawl 4; English Medium sikul tanpui thin 14 kan nei mek; belhkhawm chuan 72 a ni. Sawrkar leh mi mal tanpuina tam tak kan dawng.

3. Hmachhawp.

Baptist Higher Secondary School hi Central Board zawm tura kalpui mek a ni a; Mizoram Board pawh la zawm zel a, HSLC level ah Board pahnih zawm neih tum a ni a, tuna Junior Section hi upgrade a ni ang a, Central Board zawm a ni ang. Chu chu kan tan chuan ‘model school’ a ni ang a, Teachers’ Training-na tha leh ngelnghet buatsaih a ni ang. HATIM ah hian job-oriented course hawn belh zel a ni ang a, Deemed-University la ni hial tura tan lak tum a ni. Graduate 20 chuang a thawn chhuak tawh a ni. Thingtlang khuaah English Medium sikul neih zel tul hle a hriat a ni a; kan kohhranin an din theih chuan tangkai tham deuha tanpui a tum ang. Kan ramah education policy thar tha tak hman a lo ni ta; hei hi Zosap missionary ten zirna min lo pek ang kha a ni a, exams leh results chauh thlir lovin; Pathian leh Kohhran, kan ram leh hnam tana mi hmantlak BCM hian chher chhuah zel a tum a ni.

Zosâp missionary-te khân Education hmangin Chanchin Tha min pe a, hnamah min din tih theih a ni a; keini pawhin Education hmangin Chanchin Tha kan pe chhuak a, kan kohhran, kan ram leh hnam tân nasa takin rawng kan bâwl a ni. BCM history hian education, kohhran leh mission-te hi inkawp tlat an ni tih min hrilh. Vawiin thlenga thawktu tam ber a chhawrna leh sum a sên tam berna chu education a ni. BCM Education thiltum chu ‘Pathian ram din’ a ni a; Pathian leh kohhran, ram leh hnam tâna mi hmantlâk chher chhuah pawh a ni.

Pioneer missionary, Sâp upa leh Pu Buanga (F.W. Savidge & J.H. Lorrain)-te khân Mission sikul hmasa ber Aizâwlah dt. 01. 04. 1894 an dina, chhim lamah dt 03. 04. 1903-ah Sêrkâwnah an din. Assam Chief Commissioner, Sir Banfilde Fuller, 1903-a Mizorama lo kalin sawrkâr aiin mission (kohhran)-in zirna tha an pe zawk tih a hmuh avangin Mizoram Education chu kohhran kutah a dah ta nghe  nghe a ni. Tichuan 1904 – 1952 kum 48 lai kohhranin kan rama zirna a enkawl ta a. Namên lovin zirnain hma a sâwn a, Sêrkâwn Middle School chu North East India-ah a tha ber zîngah a tel phâk a ni. Sawrkârin zirna a lâk lêt atanga kum sâwm vêl chu kohhranin tha a thlah deuh va, dik dâwnin a hre lo a ni ang 1961-ah High School dinin theihtâwpin hma a la leh ta a ni. Tûn dinhmun hi thlîr ila, ka ram zirna timawitu leh tihmingthatu chu kohhran school-te an ni.

BCM hian zirna kawngah hma a zauh zêl a, mission Fields-ah, foreign thlengin kan chhuanvâwrte zirtîr hna thawk tûrin a thawn belh zêl a ni. Kan ram chhûng leh pâwnah pawh sikul a din belh zêl bawk. Mission huangah chauh ni lovin, Mizoram chhunga kohhran tân pawh hma a zauh zêl a, kohhran enkawl ‘English Medium School’ pawh 20 a tling têp tawh a ni. Vawiin Education Sunday-ah hian ‘zirna tha hlutzia hre thar leh ila, kan zavai hian Pathian rinchhanin theihtâwp i chhuah ang u’ tiin kan inngên a ni e.