Mizoram Baptist Kohhran chuan kum tinin February Pathianni hnuhnung ber hi BCM chuan Education Sunday atan a hmang thin a. Kuminah pawh February 22, 2015 hian Mizoram Baptist Kohhran Biak In tinah he Ni pual hian Chawhma inkhawm-ah hun hman a ni ang. Headquarters atanga thupui thlan sa “Zirna hmanga ênna” tih thupui hmangin thusawituten thuchah an sawi bakah Kohhran Nipawimawh Bu-a hemi ni pual thuchah chhiarchhuah tura buatsaih sa chu chhiarchhuah a ni bawk ang. Hemi bakah a hnuaia thupui hmang hian tawngtairual neih tur a ni.
Tawngtai rual thupui: 1. Missionary te hmanga zirna min petu Pathian hnenah lawmthu sawina. 2. Kan Kohhran Mission school leh ramchhunga school a zirtirtu leh thawktute tan. 3. Zirna kawngah Kohhran mite kan harh zel theih nan. Mizoram chhung leh ram pawna zirlaite tan.
................
Education Sunday lo chhuah dan
BCM rorelna sang ber Assembly, kum 1960-a neih chuan High School din a rel a. A din dan tur Education Department-in an ruahman a. 1961-ah kan lo din thei ta a. He School hi enkawl zui zel a ngai dawn a, tawngtaisak fo a tul bawk a, pawisa eng emaw zat a tul bawk a. Kum khata chawlhni vawi 1 chu High School pual atan khaw tin Kohhranin hmang se tiin a rel nghal bawk a. High School ngaihtuahtu bik Committee, Board of Governor chuan July thla chawlhni vawi thumna hi a ruat a. He mi ni hi High School tan tawngtaina leh zirna pawimawhna sawina ni a hman a ni thin a.
High School chu Mizoram sawrkarin Higher Secon-dary-a a hlankai tak avangin Baptist Higher Secondary School tiin thlak a lo ni a; a hun thuah pawh kum 2005 Assembly chuan a din ni February 8, 1961 anih avangin February thlaah hman nise a ti a; Ni pawi-mawh dang kan hman thinte nen insu buai lo turin February Pathianni hnu-hnung ber hi hman a ni ta a. A hming thuah pawh zirna In pakhat ringawt huapa hmang lovin BCM zirna in dang zawng zawng pawh huapin 2006 Assembly chuan Education Sunday a lo ti ta a. (Src: BCM Handbook)
..................
Education Sunda Thuchah
ZIRNA HMANGA ENNA
Bible chhiar tur: Ephesi 5:8-10
Vawiin Education Sunday (Zirna pual Pathian ni)-ah hian zirna pawimawhzia kan ngaihtuah thar leh a pawimawh hle mai. Missionaryte kan rama an lo chhuah hma kha chuan kan ram hi a thim hle mai. Chanchin Tha >ng nei lovin Setana leh a hmanrua sual bawihah kan awm a. Zirna sikul eng mah a awm loh avangin mawlna avanga khawvel >ng hmu pha lovin kan awm bawk a ni. Vawiina kan thupui hi chawhma inkhawmah hun neitu in sawi sela, Thu chhiar tur buatsaih hi Kohhran Secretary in chhiar chhuah tur a ni. Zan inkhawmah tawngtai thupui dah sa hmangin tawngtai rual neih ni se. Programme kimchang siam a ni lo va, Tualchhung Kohhran kutah dah a ni.
1. A, AW, B neih leh zirna bul tan: Mizorama Missionary lo chhuak hmasa ber, Sap Upa leh Pu Buanga (Rev. F.W. Savidge leh Rev. J.H. Lorrain) te 11st January 1894-a an lo chhuah khan zirna sikul kan la nei lova, A, AW,B pawh kan la nei lo. Anmahni in zir chawpin thla thum chhungin Mizoram tana zirna lungphum A,AW,B an lo siam chhuak ta a. Chu chauh ni lovin Mizorama sikul hmasa ber chu 1st April 1894 khan Aizawlah an lo din ta a ni. Mizo naupangte lehkha an zirtir a, 1897-a Mizoram an chhuahsan thleng khan. Kum 1898-a Rev. D.E Jones-a lo chhuah khan Mission sikul chu a rawn thar thawh leh ta a ni. Sap Upa leh Pu Buanga Mizoram chhim lama Missionary tura an rawn chhuah leh khan 3rd July, 1903 ah Lungleiah sikul an hawng leh ta a. Heta tang hian thingtlangah sikul an hawn belh zel a. Sawrkarin Mission rawngbawlna a hmuh in tha a ti a, Mizoram zirna chu Missionary te kutah a dah ta a, April 1904 khan Sawrkar chuan Rev. F.W.Savidge leh D.E Jones te chu Honorary Inspector of school hmasa ber atan a lo ruat ta a ni..
2. Zirna hmanga Enna: Missionaryte kuta zirna awm chu a lo hlawhtling ta em em a, Chhim lamah Serkawn chu zirna hmunpui a ni a. A tira Primary school chu kum 1915 ah chuan Middle English School a lo ni ta a. Heta zir chhuakte hian zirna meichher chu chhi darh in thingtlang hmun hrang hrangah zirtirtu atan dah an ni a. A tira mipate chauh zirna chu hmeichhiate tan pawh a lo nit a zela, Pathian thu Chanchin Tha leh zirna chuan Zoramah Enna a lo thlen ta a ni. Missionary te kuta zirna a awm chhung hian zirna in a ken tel hmasawnna pawh a lang tel zel a. Kum 1917 khan Zosapte hmalaknain Serkawnah Hockey khelh tan a ni a, 1920 khan Badminton leh Valley ball khelh tan a ni bawk. Infiamna chauh ni lovin Lungleiah Boy Scout din a ni a, Mizorama Scout lo awm tanna pawh Serkawna Zosapte bul tanna bawk a ni. Mizoramah pawh Sawrkar hmalakna a lo lian sawt ve zel a kum 1952 chuan zirna chu Mission kut atangin Sawrkar (Assam hun lai) in a lo la ve leh ta a ni.
Zirna hi hmasawnna bul leh innghahna ber a nih avangin sawrkar pawhin nasa takin hma a la zel a tunah chuan Mizoramah zirna kungpui University thlengin kan lo nei ta a.Mizoramah chauh nilovin thangtharte chuan khawvel ram changkang ber berah te lehkha an lo zir ve thei ta a ni.
3. BCM leh zirna : Tunah chuan Sawrkar leh mimalte thlengin zirnaah tan an lak laiin Kohhran pawhin hma lak nan kan la hmang zel a. Zirna bul thut (Elementary) atangin College thlengin kan la kalpui ta zel a ni. Kan Missionary te hun laiin kum 1952 khan Nursing School (ANM) Course chu tan a ni a, lo phuisui zelin tunah GNM zirna Nursing School puitling a lo ni ta a. Kum 1961 khan Christian High School Serkawnah din a ni a, 1977 khan +2 niin tunah hian KG 1 atangin Class XII thleng kan nei a, kan Higher Secondary School ah hian Arts, Science, Commerce, Computer Application leh MLT (Medical Laboratory Technician) zirna kan nei mek a ni.
Kum 2007 khan BCM chuan Residential College (HATIM) chu a lo din ve leh ta a. Mizorama Christian College awm chhun a ni a. Degree Course hrang hrang- Computer Application, Commerce, Arts (English) leh Social Work department te kan nei. State chhunga College tha ber pawl a lo ni ta. BCM Education Department chuan HATIM leh BHSS bakah Comprehensive School pakhat leh Primary school pakhat a enkawl a, hengte bakah Tualchhung Kohhran leh Bialten an din English Medium School 20 te tanpuina kan pe a, School thenkhat tanpui ngai tawh lote kan nei bawk. Zirnaah tan la zel ila, tunah hian Kohhran pawl thenkhat an harh chhuak a, zirna an lo uar ta hle a, hetih lai hian Mizorama zirna sulsutu ber Kohhrante hian zirna hi i uar zel ang u. (Ni Pawimawh bu 2015)
