Mizoram Baptist Kohhran chuan kum tinin February Pathianni hnuhnung ber hi BCM chuan Education Sunday atan a hmang thin a. Kuminah pawh February 23, 2014 hian Mizoram Baptist Kohhran Biak In tinah he Ni pual hian Chawhma inkhawm-ah hun hman a ni ang. Headquarters atanga thupui thlan sa "Zirnaah tan i la ang" tih thupui hmangin thusawituten thuchah an sawi bakah Kohhran Nipawimawh Bu-a hemi ni pual thuchah chhiarchhuah tura buatsaih sa chu chhi archhuah a ni bawk ang. Hemi bakah a hnuaia thupui hmang hian tawngtairual neih tur a ni.
1. Kan Kohhran zirna hrang hranga zirna leh zirtirtu leh zirlaite tan. 2. Kan Kohhran miten zirnaah tan kan lak thiam theih nan 3. Mahni Tualchhunga zirtirtute leh zirlaite tawngtaisak nise..................................
Education Sunday lo chhuah dan:
Kum 1960 BCM Assembly chuan High School din ni sela, kum khata Pathian ni vawi khat chu High School pualin Tualchhung kohhran zawng zawngah hman ni se, thawhlawm pawh headquarters ah thawn ni rawh se tiin a rel a. February, 1961 ah High School din a ni; chuta tang chuan July Pathian ni vawi-3 na, ‘Kristian High School Ni’ atan hman a ni.
1988 Assembly chuan Tualchhung kohhran inenkawlna a hautak deuh deuhva, Sawrkar tanpuina bakah School enkawlna budget a awm bawk a, thawhlawm hi chu headquarters ah thawn tawh loh nise; a ni erawhchu hman chhunzawm zel ni rawh se a ti a. Sawrkarin Higher Secondary-a a hlan kai avangin Kristian High School tih chu Baptist Higher Secondary School (BHSS) ti a thlak a ni; Kristian High School Ni tih pawh BHSS Day ti a tihdanglam a ni.
2005 Assembly-chuan BHSS Day hi School din thla February ah hman ni rawh se tiin a rel a. 2006 Assembly chuan BCM hian Institution tam tak a nei a; zirna in pakhat (i.e. BHSS) hming hian a fun kim tawk lo ve; Education Sunday tih ni rawh se tiin hming thar a pe ve leh ta a ni. Heta tang hian kum tin February Pathian ni hnuhnung ber hi ‘Education Sunday’ atan hman a lo ni ta a ni.
.......................................
EDUCATION SUNDAY THUCHAH
Thupui : Zirna-ah tan i la ang. “Gamaliela ke bulah chuan zira seilian ka ni.” T.T. 22:3(b)
Mizorama Missionary hmasa ber Sap Upa leh Pu Buanga (Rev, F. W. Savidge, Rev. J.H. Lorrain) te kha Mizorama zirna lung min phumsaktu (A, AW, B-siamtu) an ni. Chanchin Tha rawn thlen hmasa bertu an nih bakah mawlna ata chhanchuahna (zirna) min petute an ni. Kan Missionary-te an lo chhuah khan Lal Isua rawngbawlna ki pathum Chanchin Tha hrilh (Kohhran din), tihdam rawngbawlna (Damdawi in) leh zirna (School din)-ah bul an tan vek a. Heng rawngbawlna
te hi Kohhranin kan chhunzawm ta zel a ni. Kohhran ropui takin kan lo ding ta a, Damdawi in pawh 2 lai kan nei a. Zirna lamah Mizorama College nei chhun Kohhran kan ni.
Zirna lama kan rawngbawlna: Tun dinhmuna kan Kohhranin zirna lama tha kan thawh nasatna ber chu Mission-ah a ni. Mizoram chhungah chuan Sawrkar school bakah mimal school te a lo tam ta a. Chuti chung chuan Theological College (AICS) kan nei a, College (HATIM) leh Higher Secondary School (KG – Class VII) thleng, Social Work Commerce, Arts, Science leh MLT (Medical Laboratory Technician) zirna leh Nursing School te kan nei a, hengah hian thawktu 139 leh zirlai 1704 (2013 dinhmun) zet kan nei a. R & D Department ah kum tin mi eng emaw zat training kan pe reng bawk a ni. Hemi bakah Kohhran mal leh Pastor Bial ten an din English Medium school 10 chuang tanpuina kan pe a ni. Heng kan zirna hrang hrang neihte hi Mizoramah a tha pawl vek an ni. Nikum 2013 khan HSLC – College ah mi 26 zet Top ten a passed kan nei a, a la
wmawm hle. Kan ram hruaitu engemaw zat leh Officer lian pawimawh tak tak kan neihte hi kan school atanga chhuakte an ni.
Kan dinhmun leh tan lakna tur: Nikumah result tha tak tak kan nei a, amaherawhchu keini Kohhran hian tan lakna tur tam tak kan nei. Lunglei District leh chhim lama awmte hi Sawrkar ngaihsak dawng tlem lam kan ni a. Mizoram hmar lama kan Kohhran mite pawh Aizawl khawpuia mite tih loh chu harsa zawk chan changte kan ni a. Tun dinhmunah hian Sawrkara hna pawimawh Officer pawh kan nei tam ta vak lo. Chuvangin kan ram leh Kohhran kal zel tur thlir pawhin zirnaah tan kan lak a ngai hle. Tin, zirna kan tih hian A, AW, B, atanga BA., MA pass tura zirna chauh a ni lova thiam thil hrang hrang zirna a huap vek a ni.
Zirna kalphung danglam leh kan policy: Hun engemaw lai atang khan kan rama zirna chu English Medium lamah ke kan pen a, mimalin an din a, kohhran pawl thenkhatten an din a, kan kohhran mi tam ber chu Fee petu kan ni. Kan zirna hmunpui Serkawnah leh HATIM-ah kan fate kaltir pha lo tam tak kan awm a, hemi avang hian BCM Education Department chuan kan kohhran leh ram dinhmun te ngun taka thlirin kohhran mal leh Pastor Bial English Medium School din te chu tanpuina pek dan a lo siam ta a ni. Kan ram leh kohhran dinhmun thlirin kohhran chhungkaw tinte tang tlanga mahni hmuna school tha din tura tan lak a pawimawh hle.
Kan mission rawngbawlna hmunah school tha kan pe a, zirtirtu atan kan nula-tlangval tha te kan tir liam a a tha a, hei hi kan chhunzawm zel ang. Hetih rual hian ram chhunga keimahni leh kan tu leh fate tan zirna tha buatsaih turin Zirnaah an i la ang. Lalpan kohhranhote malsawm che u rawh se.
