April 8.2012 hi Isua Krista, thihna hneha a thawhlehna Ni champha, Easter Sunday a ni a, he Ni hi Mizoram Baptist Kohhran chuan serhin Zoram pumah Kohhran hoten programme kan hmang leh dawn a ni. Easter Sunday Chawhma lam Inkhawm ah Headquarters atanga Easter Sunday thupui thlan sa – “Thawhlehna Thiltihtheihna” tih hmangin thusawituten thuchah an puang ang a. Ram pumah Tawngtai thupui thlansa hmangin tawngtairual a ni bawk ang. Chawhnu lamah Kohhran inpawlhona leh zaikhawm awmin zan lamah pawh Inkhawm banah zaikhawm programme siam a ni bawk ang.
THUHRILTU TANPUI NAN.
Thuhriltu-in a chunga Bible chang tar lante tlawhchhanin hetiang hian sermon point a siam thei ang-Lal Isua thawhlehna thiltihtheihna (the power of Jesus ressurrection) chuan-
1. Thihna hnehin ringtute tan thawhlehna min siamsak a, thih hlauhna bawi ata min chhuah a ni (c.f. Heb. 2: 15) 2. Hma lam hun atan beiseina nung leh lawmawm min siamsak a ni. 3. Sual hnehna min pe a ni.(c.f. Rom 6: 12-14) 4. Tho leh nun neitu kan nih angin nun thianghlimin kan nung tur a ni. ……………
THAWHLEHNA ROPUI LEH DANGLAM
Lal Isua thihna hneha a thawh lehna hi khawvel history-a thil thlengte zingah thil ropui ber leh thil lawmawm ber a ni. Amaherawhchu a tho leh ngei a ni tih finfiahna tamtak a awm laiin, a thawhleh ni atanga vawiin thleng hian awih duh lotu tam tak an la awm. Apostol-te khan Lal Isua thawhleh thu hi sawi awihawm tulah an dah loh avangin, a thawh leh dan chipchiar an sawi ngai lo va, a thawh leh ngei thu leh a thawhlehna avanga amah ringtute chanvo ropui takte chu thupui berah an neih mai a ni. Tirhkoh Paula chuan ‘mitthi zing ata ropui taka kaihthawh a nihna chuan Pathian Fapa a nihzia a tilang chiang a’ [Rom 1:4 (lehlin thar)] a ti mai a. Tirhkoh Petera pawhin, ‘mitthi zing ata Isua Krista thawhlehna avangin beiseina nung hmu turin min hring leh a (1Pet.1:3) a ti bawk.
Lal Isua Thawhleh dan:
Bible-ah mitthi tho leh chanchin a awm nual mai. Zarephath hmeithai fapa thi tawh Zawlnei Elija-in a kaihthawh te (1Lalte 17:17-24), Sunem nu fapa thi tawh zawlnei Elisa-in a tih dam te (2Lalte 4:18-37) Jaira fanu thi tawh Lal Isuan a kaihthawh te (Mt.9:18-26 etc), Lazara Lal Isuan a kaihthawh thu (Jn.11) te leh Tirhkohte’n mitthi an kaihthawh thute kan hmu. Heng mi zawng zawngte thawhleh dan hi kan thupuia ‘thawhlehna’ kan tih nen hian a inang lo. Thih theihlohna neiin an nung leh lo va, mihring nunphung pangngaiin an thi leh ngeiin a rinawm.
Lal Isua thawhleh dan danglam em emna chu thihnain a hneh tawh loh nunna neia a thawhlehna hi a ni. Paula chuan, ‘Krista chu mitthi zing ata kaihthawhin a awm a, a thi leh dawn tawh lo tih kan hre si a, thihna chuan ama chungah thu a nei tawh lo’ (Rom 6:9) a ti a, chu ngei chu Lal Isua thawhleh dan chu a ni. Thihna hneha a thawh leh hma zawng khan mihring zingah chutiang nun neia tho leh an awm lo. Chuvangin, Paula vekin, ‘Krista chu mitthi zing ata kaihthawh a ni tak zet a ni, mitthite thawh hmahruaitu a ni... Adama-ah mi zawng zawng an thi ang khan, Kristaah mi zawng zawng tihnun leh an ni dawn. Amaherawhchu, mahni hun theuhvah a ni ang. Thawh hmahruaitu Krista chu a tho hmasa a, a dawtah, a lo kal leh hunah, ama mite’ a ti a ni [1Kor. 15:20- 23 (lehlin thar)]. Thuthlung Hlui hunah Israel fate chuan an buh leh thlai thar hmasate chu Pathian hnenah then thianghlimah an hlan phawt a, chumi hnu-ah a dangte chu an lo thianghlim ve ta a, an an ei ve chauh thin (Lev. 23:9-14). Chutiang chiah chuan, Lal Isua chu thawhlehna kawngah hmahruaitu a lo ni a, amah ringtu zawng zawngte chu amah avangin kan tho leh ve dawn a ni. Kan Mizo hla siamtu pawhin-
‘...Thihnate leh ramhuaite ka ngam ngei ang, Isua thawh angin ka tho leh ang’ Hla ka sa ang, Kumkhuain ka chawimawi ang’ a lo ti a ni.
He nunhlun neia thawhlehna, khawvel history-a la awm ngai lo leh tuma tihtheih loh kan Lal Isuan a kal tlang hi kan chanvo a nih ve avangin a ropuiin a lawmawm em em
